امەريكالىق كومپانيا عارىشقا ۇشاتىن ءۇش جولاۋشىنىڭ ەسىمىن جاريالادى
ولار كاسىپكەر جانە سالاۋاتتى ءومىر سالتى بويىنشا جاتتىقتىرۋشى كەيشا شاحافف پەن ونىڭ قىزى اناستاتيا مايەرس، سونداي-اق وليمپياداشى دجون گۋدۆين، دەپ حابارلايدى قازاقپارات CNN-گە سىلتەمە جاساپ.
«مەن ەكى جاستا بولعاندا اسپانعا قاراپ، بىلاي دەپ ويلاۋشى ەدىم: «ول جاققا قالاي بارسام بولادى؟ ءبىراق مەن وسىنداي مۇمكىندىك بولاتىنىن تۇسىنبەدىم. عارىشقا انتيگۋادان ءبىرىنشى بولىپ بارۋ عارىشتىڭ قولجەتىمدى ەكەنىن دالەلدەيدى»، - دەدى كەيشا شاحافف.
اناسى مەن قىزى كوممەرتسيالىق ەمەس Space for Humanity ۇيىمى ءۇشىن 1,7 ميلليون دوللار جيناعان ۇتىس ويىنىن جەڭىپ الدى. ولار عارىشقا ۇشاتىن كاريب تەڭىزىنىڭ العاشقى تۇرعىندارى بولماق.
18 جاستاعى اناستاسيا مايەرس شوتلاندياداعى ابەردين ۋنيۆەرسيتەتىنىڭ ستۋدەنتى، ول فيلوسوفيا مەن فيزيكا ماماندىعىندا وقىپ جاتىر. 80 جاستاعى دجون گۋدۆين، 1972 -جىلى ميۋنحەندەگى كانوەدە ەسۋ وليمپياداسىنىڭ قاتىسۋشىسى، پاركينسون اۋرۋىمەن اۋىرادى.
«ماعان 2014 -جىلى پاركينسون اۋرۋى دياگنوزى قويىلعان كەزدە، ول مەنىڭ تولىققاندى ءومىر سۇرۋىمە كەدەرگى كەلتىرۋىنە جول بەرمەدىم. بۇل [عارىشقا ۇشۋ - رەد.] قيىندىقتارعا تاپ بولعان ادامداردى شابىتتاندىرادى جانە قيىندىق ارمانعا جەتۋگە كەدەرگى بولماۋ كەرەكتىگىن كورسەتەدى»، - دەدى ول.
گۋدۆين - Virgin Galactic-پەن عارىشقا ۇشۋ بيلەتتەرىنىڭ العاشقى يەگەرلەرىنىڭ ءبىرى. Virgin Galactic عارىشقا ۇشۋعا 800-گە جۋىق بيلەت ساتتى، ونىڭ 600 ى 250 مىڭ دوللارعا جانە تاعى ەكى ءجۇزى 450 مىڭ دوللارعا ساتىلدى.
كومپانيانىڭ باس نۇسقاۋشىسى- استروناۆت بەت موزەس تە بورتتا بولادى. موزەس Virgin Galactic-پەن ءۇش رەت عارىشقا ۇشقان جانە 2019 -جىلى كوممەرتسيالىق عارىش كەمەسىندە جولاۋشى رەتىندە عارىشقا ۇشقان العاشقى ادام بولدى. Galactic 02 دەگەن اتاۋعا يە ۇشۋ 10-تامىزعا جوسپارلانعان. Virgin Galactic العاشقى عارىش ۇشىرىلىمى 29-ماۋسىمدا ءوتتى. ول ءبىر جارىم ساعاتقا سوزىلدى. بورتتا ەكى ۇشقىش پەن Virgin Galactic كومپانياسىنىڭ استروناۆت- نۇسقاۋشىسىنان بولەك ءۇش يتاليالىق ۇشقىش وفيتسەرلەر بولدى. ولار ءبىرقاتار عىلىمي تاجىريبە وتكىزدى. كەمە ەڭ جوعارعى ۇشۋ نۇكتەسىنە جەتكەندە يتاليا اسكەري-اۋە كۇشىنىڭ 100 جىلدىعىنا وراي ۇلتتىق تۋىن كوتەردى.
بورتتا تۋريستەر بولماسا دا، بۇل كوممەرتسيالىق رەيس ەدى. سەبەبى وفيتسەرلەر ءۇشىن يتاليا قورعانىس مينيسترلىگى اقشا تولەدى.
