تاريحي تۇلعالار قىزمەتىن باعالاۋدىڭ عىلىمي ءادىسناماسى ازىرلەنبەك
مۇنداي يدەيانى مەملەكەت تاريحى ينستيتۋتىنىڭ پەرسپەكتيۆالىق مىندەتتەرىن تالقىلاۋ اياسىنداعى جيىندا عالىمدار ۇسىندى، دەپ حابارلايدى قازاقپارات عىلىم جانە جوعارى ءبىلىم مينيسترلىگىنە سىلتەمە جاساپ.
«مۇنداي ءادىسنامانىڭ قاجەتتىلىگى تۇركىستاندا وتكەن ۇلتتىق قۇرىلتايدىڭ ەكىنشى وتىرىسىندا تاريحي سانا- سەزىمدى جاڭعىرتۋ باسىمدىعىندا ايتىلعان نەگىزدەردەن تۋىنداپ وتىر. بۇل جونىندە مەملەكەت باسشىسى قاسىم- جومارت توقايەۆ «ادىلەتتى قازاقستان - ادال ازامات» اتتى سويلەگەن سوزىندە «كەيبىر ادامداردىڭ قالاۋىمەن جالعان ءومىربايانى ادەيى قولدان جازىلعان كەڭەس ءداۋىرىنىڭ قايراتكەرلەرى بار. ونداي جاساندى تۇلعالاردىڭ ەسىمىن ءتۇرلى نىساندارعا بەرۋدى دوعارۋ قاجەت… وسى سالاداعى بارلىق راسىمدەردى ءىس جۇزىندە رەتتەۋ ماڭىزدى. وندا ايماقتاردىڭ ەرەكشەلىگىمەن قاتار، جالپى ۇلتتىق باسىمدىقتار دا ەسكەرىلۋى كەرەك» دەگەن بولاتىن. سوندىقتان دا، قازىرگى ورنىقتى دامۋ تۇرعىسىندا تاريحي تۇلعالاردى باعالاۋ ماڭىزدى»، - دەپ جازىلعان مينيسترلىكتىڭ الەۋمەتتىك جەلىدەگى پاراقشاسىندا.
ينستيتۋت عالىمدارى اتالعان ءادىسنامانى دايىنداۋدا «جەرگىلىكتى، وڭىرلىك جانە ۇلتتىق» دەڭگەي بويىنشا توپتاستىرۋدى باسشىلىققا الماق.
«وسىعان دەيىنگى 1992-2023 ج. ج. تاريح عىلىمى بويىنشا قورعالعان ديسسەرتاتسيالارعا نازار اۋدارساق، 772 ديسسەرتاتسيانىڭ 55 ءى ءتۇرلى كەزەڭدەگى تۇلعالاردىڭ قوعامدىق- ساياسي قىزمەتى، مۇرالارىنا ارنالعان. دەگەنمەن دە، قازىرگى كۇن تۇرعىسىندا تۇلعالاردىڭ تاريحي شىنايىلىعىن قالپىنا كەلتىرۋ، تاۋەلسىز قازاقستاندى قالىپتاستىرۋعا ۇلەس قوسقان قايراتكەرلەر تۋرالى دا پايىمدالۋى ۇلتتىق وتانشىلدىق قۇندىلىعى مەن وزىندىك موتيۆاتسيا باستاۋىنىڭ ءتۇرلى كوزدەرىن كەڭەيتۋگە مۇمكىندىك بەرەدى»، - دەلىنگەن اقپاراتتا.
