ءماجىلىس دەپۋتاتتارى اسكەردە ساربازدارمەن بىرگە جاتتىعىپ جاتىر

ماسەلەن، ءماجىلىس دەپۋتاتى سامات نۇرتازا اسكەري ءومىر جايلى ويىمەن بىلاي دەپ ءبولىستى.

«تاڭعى ساعات 06:00 وياندىق. تاۋدىڭ تاڭى سۋىق ەكەن. بۋشلاتتاردى كيىپ، جاتتىعۋعا كىرىستىك. توسەك جيناپ، ءوز پالاتكامىزدىڭ جان- جاعىن جيناستىردىق. سۋدىڭ قادىرىن وسىنداي جەردە بىلەدى ەكەنسىڭ. ەكى بوشكە سۋ 217 ادامعا. تاڭعى اس ساعات 07:55 تە. وعان دەيىن بارلىعىمىز جاتتىعۋ جاسادىق. قيراپ قالعان سۇيەكتى سىقىرلاتتىق. اسحانا دا جىلجىمالى البەتتە. قاراقۇمىق پەن بوتقا بەرىپ جاتىر» - دەدى سامات نۇرتازا.

حالىق قالاۋلىسى ول جەردە تەك جاتتىعىپ جاتپاعانىن جەتكىزدى.

«اسكەريلەردىڭ ءومىرى جاۋاپكەرشىلىكپەن اۋىر. جالاقىلارى دا ايتارلىقتاي كوپ ەمەس. شەكاراشىلار جەكە سۇحباتتا 170000-220000 ت گ ارالىعىندا جالاقى الاتىنىن دا ايتىپ قالدى. ەڭ قىزىعى، تەوريا جۇزىندە شەكارا بەكەتىنىڭ جاۋ شاپقان كەزدەگى ومىرشەڭدىك ۋاقىتى 15 مينۋت ەكەن. ياعني شەكارا بەكەتىنىڭ مىندەتى - جاۋدى 15 مينۋت ۇستاپ تۇرۋ. بولدى.

ويلاپ قاراساڭ، قيىن- قىستاۋ زاماندا، جاۋمەن بەتتەسەتىن دە وسى شەكاراشىلار. اينالامىزدا جۇرگەن ساربازداردىڭ بارلىعى - 2003 -جىلى دۇنيەگە كەلگەن جىگىتتەر. ناعىز پاتريوتتار. كوزدەرىندە وت. بۇيرىقتى ەكى ايتقىزباي ورىندايدى. قازاقستاننىڭ ءار ايماقتارىنان جينالعان بالالار. اقىرىنداپ «الىمجەتتىك» تۋرالى سوزگە تارتىپ ەدىم، «بىزدە جوق»، «بىلمەيمىن»، «بۇرىن بولعان شىعار» دەگەن جاۋاپ الدىم. ءلايىم سولاي بولعاي. ارينە، مىنەز- قۇلقىنان، ساربازداردىڭ ءجۇرىس- تۇرىسىنان كىم «ليدەر»، كىم «مومىن» ەكەنى سىرتتاي بايقالادى. ەر- ازامات ۇجىمىنىڭ ءوز اتموسفەراسى بولاتىنى دا انىق. مۇمكىندىگىمىزشە، ساربازداردىڭ تۇرمىس- تىرشىلىگى تۋرالى جازارمىز»، - دەپ وي ءبولىستى.

ال دەپۋتات بولات كەرىمبەك كۋرسانتتارمەن بىرگە الاتاۋدىڭ شىڭدارىن باعىندىرعانىن جەتكىزدى.

«الماتى شىڭىن باعىندىردىق. 3475 مەتر بيىكتىكە شىقتىق.15,4 شاقىرىم جول جۇردىك. 22064 قادام ءجۇرىپ وتتىك. دەنساۋلىققا پايدالى جاتتىعۋ بولدى»، - دەپ جازدى ول الەۋمەتتىك جەلىدەگى پاراقشاسىندا.

ايتا كەتەيىك، ءماجىلىس دەپۋتاتتارى ماكسيم روجين، بولات كەرىمبەك، ولجاس قۇسپەكوۆ جانە سامات نۇرتازا شەكاراشىلارمەن بىرگە اسكەري ءومىردىڭ تۇرمىس- تىرشىلىگىمەن تانىسىپ جاتىر. ماقسات - اسكەردەگى جاعدايدى ءوز كوزىمەن كورۋ، تانىسۋ، ءبىلۋ.

دەپۋتتاردىڭ اسكەري ومىرمەن تانىسۋ جوسپارى 16-31-شىلدە ارالىعىندا جالعاسادى. العاشقى 5 كۇندە ولار ساربازدارمەن بىرگە جاتتىعۋ جۇرگىزسە، قالعان كۇندەرى قىتاي جانە قىرعىز ەلدەرىمەن شەكتەسەتىن شەكارالىق ايماقتىڭ تىنىس- تىرشىلىگىمەن دە تانىسادى.

بۇعان دەيىن ءماجىلىس دەپۋتاتتارى الماتى وبلىسىنىڭ تاۋلى ايماعىنداعى لاگەردە شەكاراشىلارمەن بىرگە دايىندىقتان ءوتىپ جاتقانىن جازعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى