قاي اۋرۋ تۇرلەرى بويىنشا اسكەرگە شاقىرىلعاندار بوساتىلادى
ازاماتتاردى مەرزىمدى اسكەري قىزمەتكە شاقىرۋدان بوساتۋعا جاتاتىن اۋرۋلاردىڭ تىزبەسى «قازاقستان رەسپۋبليكاسىنىڭ قارۋلى كۇشتەرىندە، باسقا دا اسكەرلەرى مەن اسكەري قۇرىلىمدارىندا قىزمەت وتكەرۋ ءۇشىن ادامدار دەنساۋلىق جاعدايىنا قويىلاتىن تالاپتاردى بەكىتۋ تۋرالى» قورعانىس ءمينيسترىنىڭ 2020 -جىلعى 22 جەلتوقسانداعى № 722-بۇيرىعىمەن بەكىتىلگەن.
«بۇل تۇرعىدا ادامدار ىشكى اعزا اۋرۋلارى، حيرۋرگيالىق پاتولوگيا، نيەۆرولوگيا، كوز اۋرۋى جانە باسقا دا دەرتكە قاتىستى مەرزىمدى اسكەري قىزمەتكە شاقىرۋدان بوساتىلادى»، - دەلىنگەن قورعانىس مينيسترلىگىنىڭ «قازاقپارات» اگەنتتىگىنە بەرگەن جاۋابىندا.
اتاپ ايتقاندا، قورعانىس مينيسترلىگى قاي ساناتتاعى ادامدار اسكەري قىزمەتتەن بوساتىلۋى مۇمكىن ەكەنىن جانە اسكەر قاتارىنا شاقىرىلمايتىنىن ءتۇسىندىردى.
قولدانىستاعى زاڭناماعا سايكەس، مەرزىمدى اسكەري قىزمەتكە شاقىرۋ بويىنشا مەرزىمىن كەيىنگە قالدىرۋ نەمەسە بوساتۋ شەشىمى اسكەرگە شاقىرۋ كوميسسياسىنىڭ قۇزىرەتىندە.
بۇل تۇرعىدا كەيىنگە قالدىرۋ وتباسى ءارى دەنساۋلىق جاعدايىنا، وقۋىن جالعاستىرعاندارعا، كاسىبي قىزمەتىن اتقارىپ جۇرگەن پەداگوگتەرگە، اۋىلداعى دارىگەرلەرگە، پارلامەنتتىڭ نەمەسە جەرگىلىكتى وكىلدى ورگانداردىڭ دەپۋتاتتارىنا قاتىستى بولادى.
سونىمەن قاتار، الدىن الا تەرگەۋ امالدارىنا تارتىلعان نەمەسە قىلمىستىق ءىسىن سوت قاراپ جاتقان ادامدار جاۋىنگەرلىك جيىندارعا شاقىرتىلمايدى.
بۇدان بولەك، ازاماتتىق اۋە كەمەلەرىنىڭ ۇشۋ ەكيپاجىنىڭ مۇشەلەرىنە، ءتيىستى ءبىلىمى بار ازاماتتىق اۆياتسيا ينجەنەرلەرى، مەحانيكتەرى جانە تەحنيكتەرىنە، سونداي- اق قۇقىق قورعاۋ ورگاندارىنىڭ ءبىلىم بەرۋ ۇيىمدارىندا العاشقى كاسىپتىك دايارلىقتان ءوتىپ جاتقاندارعا قاتىستى اسكەرگە شاقىرۋدى كەيىنگە قالدىرۋ ءتارتىبى قاراستىرىلعان.
