امەريكالىق سارباز سولتۇستىك كورەيا شەكاراسىن ءوز ەركىمەن كەسىپ ءوتتى

ا ق ش ارمياسىنىڭ وكىلى راستاعانداي، ۇستالعان جىگىت - قاتارداعى جاۋىنگەر ترەۆيس كينگ.

دەرەككوزگە سەنسەك، ول بۇعان دەيىن وڭتۇستىك كورەياداعى كەمپ حامفريز تارتىپتىك بولىمىندە قىزمەت ەتىپ جۇرگەن جانە قارۋلى كۇشتەردەن بوساۋ ءۇشىن ا ق ش- قا بارا جاتقان.

پاسپورت باقىلاۋىنان وتكەننەن كەيىن ول امالىن تاۋىپ قايتا ورالعان.

ءسويتىپ سولتۇستىك كورەيامەن شەكاراداعى دەميليتاريزاتسيالانعان ايماققا اپاراتىن ەكسكۋرسيالىق تۋرعا قوسىلادى.

بۇل وڭتۇستىك كورەيالىقتار مەن تۋريستەر ءۇشىن تارتىمدى تۋريستىك ورىن سانالادى.

مەملەكەتتىك دەپارتامەنت پەن ا ق ش قورعانىس مينيسترلىگى ترەۆيس كينگتىڭ الگى ەكسكۋرسيا كەزىندە ادەيى، ءوز ەركىمەن شەكارادان وتكەنىن ايتتى.

الايدا ازىرگە ەشبىر مەكەمە ونى اسكەردەن قاشتى دەپ مالىمدەگەن جوق.

سول ەكسكۋرسياعا قاتىسۋشىلاردىڭ ءبىرى CBS تەلەكومپانياسىنا بەرگەن سۇحباتىندا ساربازدىڭ كۇلگەن كۇيى سولتۇستىك كورەياعا قاشىپ كەتكەنىن ايتتى.

«العاشىندا مەن مۇنى ءازىل دەپ ويلادىم، ءبىراق ول سودان قايتىپ كەلمەدى. سول كەزدە عانا جىگىتتىڭ قالجىڭداماعانىن ءتۇسىندىم»، - دەيدى ول.

ا ق ش مەملەكەتتىك دەپارتامەنتىنىڭ وكىلى مەتتيۋ ميللەر دەپارتامەنتتىڭ پەنتاگونمەن بايلانىستا ەكەنىن جانە قاجەت بولعان جاعدايدا كەز كەلگەن كومەكتى كورسەتۋگە دايىن ەكەنىن ايتتى.

العاشىندا ساربازدىڭ اتى- ءجونى قۇپيا ساقتالدى، ويتكەنى اق ءۇي اۋەلى ونىڭ تۋىستارىنا حابارلاۋدى ءجون كورگەن.

الايدا، كوپ ۇزاماي بىرنەشە اقپاراتتىق اگەنتتىك بۇل ادامنىڭ اتى ترەۆيس كينگ جانە ول ا ق ش اسكەرىنىڭ ەكىنشى كلاستى قاتارداعى جاۋىنگەرى ەكەنىن جاريالادى.

جۋرناليستەردىڭ «مەملەكەتتىك دەپارتامەنت سولتۇستىك نەمەسە وڭتۇستىك كورەيامەن بايلانىسقا شىقتى ما؟» دەگەن سۇراعىنا ميللەر «وڭتۇستىك كورەيالىقتارمەن بايلانىستا ەكەنىمىزگە سەنىمدىمىن» دەدى.

ول مەمدەپارتامەنتتىڭ سولتۇستىك كورەيامەن حابارلاسپاعانىن، ءبىراق ونىڭ بىلۋىنشە پەنتاگوننىڭ پحەنيانمەن ءبىراز بايلانىسى بار ەكەنىن ايتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى