الماتىدا بالالاردىڭ ساۋناداعى «جازعى دەمالىسىنان» كەيىن بۇكىل لاگەرلەر تەكسەرىلىپ جاتىر
الماتى قالاسى اكىمدىگىنىڭ مالىمەتىنشە، بالالار دەمالىسىن ۇيىمداستىرۋ ماسەلەسى بويىنشا مامانداندىرىلعان بالالار مەكەمەلەرىنىڭ كۋراتورلارىمەن بىرگە جۇمىس كۇشەيدى.
«ءتيىستى تالاپقا ساي ەمەس ەكى لاگەردەگى جاعدايعا بايلانىستى ءبىلىم باسقارماسى بارلىق بالانى باسقا ەكى لاگەرگە كەزەڭ-كەزەڭىمەن جىبەرۋ جونىندە شەشىم قابىلدادى. وسىلايشا، «بەل ريچي» ج ش س-مەن («ارمان دالا» لاگەرى) كەلىسىمشارتتى بۇزاتىن بولدىق. بۇل كومپانيانى جاۋاپسىز قىزمەت كورسەتۋشى دەپ تانۋ ءۇشىن سوتقا تالاپ ارىز بەرىلدى. اقشا تولەنبەدى»، - دەپ حابارلادى اكىمدىكتەن.
بۇعان قوسا، قالالىق ءبىلىم باسقارماسىنىڭ قىزمەتكەرلەرى بالالاردى «تاۋ سامالى» لاگەرىنە («ايسۇلۋ جانە ت» ج ش س) كىرگىزبەۋ جونىندە شەشىم قابىلدادى.
لاگەرگە جولدىڭ قاشىقتىعىن جانە بالالاردىڭ ەرەكشە قاجەتتىلىگىن ەسكەرە وتىرىپ، ولار قاسكەلەڭ قالاسىنداعى جەكە مەكتەپكە ۋاقىتشا ورنالاستى.
بالالاردىڭ قاۋىپسىزدىگىن قامتاماسىز ەتۋ ءۇشىن مەديتسينالىق قىزمەتكەرلەر تاۋلىك بويى كەزەكشىلىك ەتەدى.
«جانۇيا» مامانداندىرىلعان كەشەنىنىڭ تاربيەلەنۋشىلەرى وسى مەكتەپتە بولعاندا ولارعا التى رەت تاماقتاندىرۋ، مادەني ءىس-شارالار ۇيىمداستىرىلدى.
قازىرگى تاڭدا الماتى قالاسىنىڭ ءبىلىم باسقارماسى بالالاردىڭ جازعى دەمالىسىن ۇيىمداستىرۋ بويىنشا شارتتا بەلگىلەنگەن مىندەتتەمەلەردىڭ ساپاسىز ورىندالۋىنا بايلانىستى «ايسۇلۋ جانە ت» ج ش س-نە شارتتى بۇزۋ تۋرالى ەسكەرتۋ جىبەردى.
الماتىدا دەمالىس كەزىندە كوپبالالى جانە از قامتىلعان وتباسىنان شىققان 3000 عا جۋىق بالا، اتا-انا قامقورلىعىنسىز قالعان 100 بالا، سونىمەن قاتار، ەرەكشە ءبىلىم بەرۋ قاجەتتىلىگى بار بالالاردى قالا سىرتىنداعى لاگەرلەرگە دەمالۋعا جىبەرۋ جوسپارلانىپ وتىر.
بۇگىن الماتى اكىمدىگى باق وكىلدەرىنە بالالار لاگەرلەرى بويىنشا باسپا ءسوز تۋرىن ۇيىمداستىرادى.
بۇعان دەيىن الماتىلىق وقۋشىلاردىڭ دەمالۋعا جازعى لاگەرگە ەمەس، ساۋناعا جىبەرىلگەنىن حابارلاعانبىز.
الماتى پروكۋراتۋراسى ساۋنا عيماراتىندا بالالار لاگەرىن ۇيىمداستىرۋ ءىسى بويىنشا تەرگەۋ باستادى.
كەيىننەن دەپۋتاتتار ساۋنادان بالالار لاگەرىن اشقان كاسىپكەر ۇتىپ العان تەندەردىڭ قۇنى 107 ميلليون تەڭگە ەكەنىنە كوز جەتكىزدى.
