اسكەرگە كىمدەر شاقىرىلمايدى - مينيسترلىك جاۋابى
قولدانىستاعى زاڭناماعا سايكەس، مەرزىمدى اسكەري قىزمەتكە شاقىرۋ بويىنشا مەرزىمىن كەيىنگە قالدىرۋ نەمەسە بوساتۋ شەشىمى اسكەرگە شاقىرۋ كوميسسياسىنىڭ قۇزىرەتىندە.
«بۇل تۇرعىدا كەيىنگە قالدىرۋ وتباسى ءارى دەنساۋلىق جاعدايىنا، وقۋىن جالعاستىرعاندارعا، كاسىبي قىزمەتىن اتقارىپ جۇرگەن پەداگوگتەرگە، اۋىلداعى دارىگەرلەرگە، پارلامەنتتىڭ نەمەسە جەرگىلىكتى وكىلدى ورگانداردىڭ دەپۋتاتتارىنا قاتىستى بولادى»، - دەلىنگەن قورعانىس مينيسترلىگىنىڭ «قازاقپارات» اگەنتتىگىنە بەرگەن جاۋابىندا.
سونىمەن قاتار، الدىن الا تەرگەۋ امالدارىنا تارتىلعان نەمەسە قىلمىستىق ءىسىن سوت قاراپ جاتقان ادامدار جاۋىنگەرلىك جيىندارعا شاقىرتىلمايدى.
بۇدان بولەك، ازاماتتىق اۋە كەمەلەرىنىڭ ۇشۋ ەكيپاجىنىڭ مۇشەلەرىنە، ءتيىستى ءبىلىمى بار ازاماتتىق اۆياتسيا ينجەنەرلەرى، مەحانيكتەرى جانە تەحنيكتەرىنە، سونداي- اق قۇقىق قورعاۋ ورگاندارىنىڭ ءبىلىم بەرۋ ۇيىمدارىندا العاشقى كاسىپتىك دايارلىقتان ءوتىپ جاتقاندارعا قاتىستى اسكەرگە شاقىرۋدى كەيىنگە قالدىرۋ ءتارتىبى قاراستىرىلعان.
بەيبىت ۋاقىتتا اسكەري قىزمەتكە شاقىرۋدان مىنا ازاماتتار بوساتىلادى:
1) دەنساۋلىق جاعدايى بويىنشا اسكەري قىزمەتكە جارامسىز دەپ تانىلعان؛
2) جيىرما جەتى جاسقا تولعان، زاڭدى نەگىزدەر بويىنشا مەرزىمدى اسكەري قىزمەتكە شاقىرىلماعان؛
3) تۋىستارىنىڭ بىرى (اكەسى، اناسى، اعا- ىنىلەرى نەمەسە اپا- سىڭلىلەرى) اسكەري قىزمەتتى وتەۋ كەزەڭىندە مىندەتىن ورىنداۋ بارىسىندا قازا تاپقاندا نەمەسە ءبىرىنشى نەمەسە ەكىنشى توپتاعى مۇگەدەكتىك بەلگىلەنگەندە؛
4) اسكەري قىزمەتتى باسقا مەملەكەتتە وتكەندەر؛
5) قازاقستان رەسپۋبليكاسىنىڭ ارناۋلى مەملەكەتتىك ورگاندارىندا قىزمەت وتكەرگەندەر؛
6) عىلىمي دارەجەسى بار ازاماتتار؛
7) تىركەلگەن ءدىني بىرلەستىكتەردىڭ ءدىن قىزمەتكەرلەرى.
بۇدان باسقا، بەيبىت ۋاقىتتا اسكەري قىزمەتكە سوتتالعان ادامدار شاقىرىلمايدى.
ايتا كەتەيىك، ەلىمىزدە مەرزىمدى اسكەري قىزمەتكە شاقىرتۋ ءۇشىن ىزدەستىرىلىپ جاتقان جاستار سانى ەكى ەسە ازايدى.
