انگەلينا لۋكاس: دورەكى جىگىتتىڭ ءتىسىن قاعىپ العان كەزىم بولدى
مامىر ايىندا ول مەكسيكالىق انا اراسولانى جەڭىپ، WBC ساناتى بويىنشا الەم چەمپيونى اتاندى. بوكسشى قازاقپارات تىلشىسىنە بەرگەن سۇحباتىندا الداعى جوسپارى مەن جەكە ءومىرى، الەۋمەتتىك جەلىدەگى جانكۇيەرلەرى مەن داتتاۋشىلار تۋرالى پايىمىن ايتتى.
- انگەلينا، WBC ساناتى بويىنشا العان تيتۋلىڭىز قۇتتى بولسىن! ەندى قانداي جوسپارىڭىز بار؟
- تامىز ايىندا الەم چەمپيونى اتاعى ءۇشىن ۇلكەن جەكپە- جەك وتكىزەمىن. بۇل كاسىپقوي بوكستاعى بەسىنشى جەكپە- جەگىم، ءتورتىنشى تيتۋلدىق ايقاسىم بولادى. كاسىپقوي بوكس الەمىندەگى ۇيىمدارعا ماعان سەنىم ارتقانى ءۇشىن العىسىم كوپ. مامىر ايىندا WBC International تيتۋلىنا قول جەتكىزدىم. مۇنداي تيتۋل وتانداسىمىز، وليمپيادا چەمپيونى ۆاسيلي جيروۆتا بولعان ەدى. ايگىلى مەنني پاكياونىڭ دا وسىنداي تيتۋلى بولعان. مەن دە سولاردىڭ ءىزىن جالعاپ، ايەلدەر بوكسىندا الەمدىك دەڭگەيدەگى جۇلدىز بولىپ، قازاقستاننىڭ اتىن شىعارعىم كەلەدى.
- جاقىن ارادا قانداي بوكسشىلارعا قارسىلاس اتانعىڭىز كەلەدى؟
- 52 كەلىدەن 54 كەلىگە دەيىنگى سالماق دارەجەسىندەگى ءبىرىنشى ءنومىرلى بوكسشىلارمەن جۇدىرىقتاسقىم كەلەدى. كەز كەلگەنىمەن شىعۋعا دايىنمىن. ماعان مىقتى قارسىلاستار بولعانى كەرەك. ونداي بوكسشىلار مەنىمەن جۇدىرىقتاسۋعا دايىن با، ماسەلە سوندا. ويتكەنى بۇعان دەيىن بىرنەشەۋى باس تارتتى. الەم چەمپيونى اتانىپ جۇرگەن قىزداردىڭ كوبى مەكسيكادان شىققان. تاريحقا ءوز اتىڭدى جازۋ ءۇشىن كىل مىقتىلارمەن شىعۋ كەرەك.
- وتانداستارىڭىزدىڭ كوبى ءسىزدى ەڭ كورىكتى سپورتشى دەپ باعالايدى. مۇنداي نازار ءسىزدىڭ بوكسقا دەگەن ىنتا- ىقىلاسىڭىزعا كەدەرگى كەلتىرمەي مە؟
- جىلى سوزىڭىزگە راحمەت. مەنىڭ ويىمشا، كەز كەلگەن قىز بالاسى سپورتتىڭ قانداي تۇرىمەن شۇعىلدانسا دا، قىزعا ءتان قىلىعىن جوعالتپاۋى كەرەك. بۇل - ءبىزدىڭ تابيعاتىمىز، قۇداي ءبىزدى نازىك ەتىپ جاراتقان. رينگتە مەن سوڭىنا دەيىن ايقاساتىن جاۋىنگەرگە اينالام. ال ومىردە نازىكپىن. بوكس - مەنىڭ جۇمىسىم ءارى ومىرلىك ءىسىم. سوندىقتان رينگتە ءبارىن ءمىنسىز ىستەگىم كەلەدى. ءبىراق قارسىلاستارىما جاماندىق تىلەمەيمىن. مەن ءۇشىن ەڭ باستىسى - ۇيىمە امان- ەسەن ورالۋ. ول ءۇشىن وتە كوپ دايىندالىپ، قورعانىسىمدى بەكەمدەي ءتۇسۋ كەرەك. مىسالى، انا اراسولامەن وتكەن ايقاس 10 راۋندتىق بولدى. وسى 10 راۋندقا شىداۋ ءۇشىن جاتتىعۋ كەزىندە 20-24 راۋندتىق سپارينگتەرگە شىقتىم. سوندىقتان 10 راۋندتى قينالماي ەڭسەرگەندەي بولدىم. اراسولا سپورتتىق مانسابىندا 48 جەكپە- جەك وتكىزگەن. وعان 10 راۋندتىق ايقاس دەگەن ۇيرەنشىكتى دۇنيە بولدى. مەنىڭ قالاي شىداپ شىققانىمدى بىلسەڭىز عوي. جاتتىعۋلاردا، سپارينگتەردە جۇكتەمەنى اسىرىپ جۇمىس ىستەدىم. اراسولا مەنىڭ العاش رەت 10 راۋندتىق ايقاسقا شىعىپ، ونى وڭاي ەڭسەرگەنىمە تاڭعالدى. ايقاستان كەيىن ءوزى سولاي دەدى.
ال كەلبەتىم سپورتتاعى مانسابىما كەرى اسەر ەتىپ جاتقان جوق. كلۋبتاردا قىدىرىپ، ىشىمدىك ىشپەيمىن. سالاۋاتتى ءومىر سالتىن ۇستانام. كەلبەتىمنىڭ بىلايعى ومىردە كومەگى بار. Instagram-عا ادەمى سۋرەتتەر سالۋعا تىرىسام. سول ارقىلى اۋديتوريامدى قۋانتقىم كەلەدى. ومىردە كوبىنە سپورتتىق كيىممەن جۇرەم. ويتكەنى ۋاقىتىمنىڭ كوبى جاتتىعۋمەن بايلانىستى. ءبىز قازىر كوپتەگەن الەمدىك برەندتەرمەن كەلىسسوز جۇرگىزىپ جاتىرمىز. مەنى وزدەرىنىڭ بەتكەۇستار تۇلعاسى رەتىندە كورگىسى كەلەتىن كومپانيالار بار. ولار مەنى كۇش پەن كەلبەتتى ءبىر بويىنا توعىستىرا بىلگەن ادام رەتىندە جارنامالاعىسى كەلەدى. سوندىقتان كەلبەتىم كەدەرگى ەمەس. باستىسى قۇداي بەرگەن كورىكتى ورىنمەن پايدالانا ءبىلۋ كەرەك شىعار.
- بۇعان دەيىنگى سۇحباتتاردىڭ بىرىندە بوكسقا العاش اجەڭىز جەتەلەپ اكەلگەنىن ايتىپ ەدىڭىز. بوكس سياقتى قارا كۇش پەن تەگەۋرىندى مىنەز قاجەت ەتە ءتىن سپورتتى تاڭداۋىڭىزعا نە سەبەپ بولدى؟
- بالا كەزىمنەن تىنىمسىز ەدىم، كۇش- قايراتىم تاسىپ تۇراتىن. اجەم دە قايراتتى ادام. سوندىقتان مەنىڭ ەشكىمگە دەس بەرمەيتىنىمە سەنسە كەرەك. وتە كىشكەنتاي كۇنىمدە بيگە، جۇزۋگە بارىپ ءجۇردىم. تىم بەلسەندى ەدىم. ءسويتىپ ءجۇرىپ بوكسقا اۋەستىگىم وياندى. العاشقى سوققىلاردى اكەمنەن ۇيرەندىم. ول - قويان- قولتىق ۇرىستان نۇسقاۋشى. اكەمنىڭ كورسەتكەن ادىستەرى قاتتى ۇناپ قالدى. وسىدان باستاپ اكە- شەشەمە بوكسقا اپارىڭدار دەپ ايتا باستادىم. ءبىراق ولار قۇپتامادى. ءسويتىپ جۇرگەندە اجەم قوناققا كەلدى. وعان ايتىپ ەدىم، «شىن قالاساڭ، باراسىڭ» دەپ شورت كەستى. العاشقى قولعابىم مەن شلەمىمدى سول كىسى ساتىپ اپەردى. ءار تاڭ سايىن اۆتوبۋسپەن باراتىنمىن. جولدا اجەم كۇتىپ الىپ، زالعا ءوزى اپاراتىن. ءومىرىم وسىلايشا باسقا ارناعا بۇرىلدى. ەسەيە كەلە ايگىلى بوكسشىلاردىڭ جەكپە- جەكتەرىن تاماشالايتىندى شىعاردىم، فيلمدەر كوردىم. مۇحامەد ءالي، مايك تايسون، مەنني پاكياو سياقتى بوكسشىلاردىڭ ءومىر تاريحىمەن تانىستىم. مەنني پاكياونىڭ WBC International تيتۋلىن ۇتقان جەكپە- جەگىن بالا كەزىمدە تەلەديداردان كورگەن ەدىم. ەندى سول تيتۋلدى ءوزىم دە الدىم. قىزىق ەمەس پە؟ !
تارازدان شىققان قارشاداي قىز بۇل جولدا تالاي قيىندىقتان، تالاي ادامنىڭ كەرى پىكىرىنەن ءوتتى. مەنىڭ بوكستان كەتۋىمە ارەكەت جاساعاندار كوپ بولدى. ءبىراق مەن سىنعان جوقپىن. ىزىمدەگى ءىنى- سىڭلىلەرىم مەنىڭ سپورتتاعى جولىمدى كورىپ، مۇمكىن ەمەس دۇنيە جوق ەكەنىن تۇسىنسە دەيمىن. قيىندىققا مويىماي ارمانعا سەنۋ كەرەكتىگىن بىلسە دەيمىن. بوكس تۋرا ءومىردىڭ ءوزى سياقتى. قالاعانىڭا قول جەتكىزگىڭ كەلسە، ۇرىستان قاشپاۋىڭ كەرەك. بوكس مەنىڭ مىنەزىمدى شىڭدادى. رينگتە كورگەن قيىندىقتارىممەن سالىستىرعاندا ومىردەگى وزگە قيىندىقتار تۇك ەمەس بولىپ قالادى ەكەن. بوكستىڭ ارقاسىندا جاۋاپتى بولىپ، تارتىپكە ۇيرەندىم. ويتكەنى جاتتىعۋدى جىبەرىپ الساڭ، رينگتە ماڭدايىڭا سوققى بولىپ قايتادى.
- وقىرمان قاۋىمعا ءسىزدىڭ جەك ە ومىردەگى ستاتۋسىڭىز قىزىق بولۋى مۇمكىن. قۇپيا بولماسا، سول جاعىنا توقتالا كەتسەڭىز …
- قازىر باسىم بوس. ارينە كوز سالىپ، ءسوز سالىپ جۇرگەن ەرلەر بار. ءبىراق سولاردىڭ ءبارى مەنى بىردەن جار ەتكىسى كەلەدى. ياعني، بوكستان قول ۇزگەنىمدى قالايدى. ال مەن جارىمنىڭ مەنى قولداپ، سۇيىكتى ىسىمە توسقاۋىل قويمايتىن ادام بولعانىن قالايمىن. ولاردىڭ نەگە مەنى بىردەن جار ەتكىسى كەلەتىنىن تۇسىنبەيمىن. اۋەلى جاقىن تانىسىپ، قىر- سىرىمىزدى ءبىلىسىپ بارىپ، سودان كەيىن عانا نەكە سياقتى سالماقتى بايلانىس تۋرالى ويلانا باستاۋعا بولادى عوي. مەن ۇدايى دامىپ، جاڭا دۇنيەلەردى مەڭگەرگەندى ۇناتامىن. سوندىقتان سەرىگىم اقىلدى، ادال ادام بولسا دەيمىن. ارينە، كوركى دە ماڭىزدى.
- ءسىزدى الەۋمەتتىك جەلىدە سىنايتىندار كوپ پە؟ جاعىمسىز پىكىر جازعىشتاردىڭ ءسوزى كوڭىلىڭىزگە قاتتى تيمەي مە؟
- قازىر حەيتەرلەرگە قارسى يممۋنيتەتىم بار. بۇرىن جاعىمسىز پىكىرلەر بولسا، ءوشىرىپ تاستايتىنمىن. قازىر ويتپەيمىن. ادامنىڭ باسقا بىرەۋگە نەگە جاعىمسىز پىكىر جازاتىنىن تۇسىنگەندەيمىن. ىشكى الەمىندە ادىلدىگى از ادامدار سونداي سوزگە قۇمار كەلەدى. ءوزىنىڭ ءومىرى ءمانسىز بولعاندىقتان وزگەنىڭ ومىرىنە تورەلىك ايتىپ وتىرادى.
- بوكستاعى قابىلەتىڭىزدى بىلايعى ومىردە قولدانعان كەزىڭىز بولدى ما؟
- ءيا، ءبىر رەت سونداي جاعداي بولدى. ءبىر جەردە كەشكى اس ءىشىپ وتىرعانمىن. تانىمايتىن جىگىت كەلىپ مازامدى الدى. ارينە، ونىڭ بەتىن قايتارىپ تاستادىم. سول ءىسىم ۇناماي قالسا كەرەك، جانىما وتىرىپ الىپ، ايعايلاي باستادى. ءبىر كەزدە وڭ قولىن سىلتەپ قالعانداي بولدى. مەن ونىڭ قولى سەرمەلگەن كەزدە اۆتوماتتى تۇردە قارىمتا سوققى جاساپ ۇلگەردىم. ءسويتىپ ويلاماعان جەردەن ونىڭ ەرنىن جىرىپ، ءتىسىن قاعىپ تاستادىم. اقىرى الگى جىگىتتى جۇباتىپ الەك بولعانىم بار. ءتىپتى ءتىس دارىگەرىنە دەيىن جەتكىزىپ سالدىم. كەتەرىمدە قىزدى قاراتۋ ءۇشىن تىك سويلەمەي، ءتىلىن تابا ءبىلۋ كەرەكتىگىن ايتتىم. قىزدارعا ايتارىم، ءوز نامىستارىڭدى قورعاي بىلىڭدەر. ومىردە ءبارى بولۋى مۇمكىن. سول وقيعادان كەيىن قولعاپسىز سوققىمنىڭ اۋىر ەكەنىن شىن مانىندە ۇقتىم. ەندى رينگتەن تىس جەردە جۇدىرىق سىلتەۋىمە تۋرا كەلمەسە ەكەن دەپ تىلەيمىن.
- سۇحبات بەرگەنىڭىزگە راحمەت!
اۆتور:
ەسىمجان ناقتىباي
