سەرىك كۇدەبايەۆ ەلدەن قاشقانى ءۇشىن جارتى جىلعا باس بوستاندىعىنان ايىرىلدى
«سوت سەرىك مىرزاقۇل ۇلى كۇدەبايەۆتى قر قىلمىستىق كودەكسى 395-بابىنىڭ 1-بولىگىندە كوزدەلگەن قىلمىستىق قۇقىق بۇزۋشىلىق جاساعانى ءۇشىن كىنالى دەپ تانۋعا جانە وعان 6 اي باس بوستاندىعىنان ايىرۋ تۇرىندەگى جازا تاعايىنداۋعا ۇكىم ەتەدى»، - دەپ كەگەن اۋداندىق سوتىنىڭ سۋدياسى ۇكىم وقىدى.
سونىمەن، وعان سوت شەشىمى نەگىزىندە جالپى مەرزىمى 10 جىل 3 ايعا باس بوستاندىعىنان ايىرۋ جازاسى تاعايىندالدى. سونداي- اق، ول قۇقىق قورعاۋ ورگاندارىندا، مەملەكەتتىك قىزمەتتە، جەرگىلىكتى ءوزىن- ءوزى باسقارۋ ورگاندارىندا 10 جىل مەرزىمگە قىزمەت اتقارۋ قۇقىعىنان ايىرىلدى. سەرىك كۇدەبايەۆ جازاسىن ورتاشا قاۋىپسىزدىك قىلمىستىق- اتقارۋ جۇيەسى مەكەمەسىندە وتەيدى.
ەستەرىڭىزگە سالا كەتەيىك، الماتى وبلىستىق پوليتسيا دەپارتامەنتىنىڭ بۇرىنعى باسشىسى سەرىك كۇدەبايەۆ قاڭتار وقيعاسى بويىنشا كۇدىكتى دەپ تانىلعان ەدى.
ول 30 -ناۋرىز كۇنگى سوت وتىرىسىنا كەلمەدى. سوندىقتان، ونى سوتقا ءماجبۇرلى تۇردە جەتكىزۋ جونىندە قاۋلى شىقتى.
ارتىنشا گەنەرالدىڭ ەلدەن قاشىپ كەتكەنى بەلگىلى بولىپ، تالدىقورعان قالالىق سوتى سەرىك كۇدەبايەۆقا حالىقارالىق ىزدەۋ جاريالادى. 27 -ساۋىردە تۇركيادا ۇستالىپ، ەلگە جەتكىزىلدى.
سەرىك كۇدەبايەۆ 28 -ءساۋىر كۇنى 10 جىلعا سوتتالعان بولاتىن. وعان لاۋازىمدىق وكىلەتتىگىن اسىرا پايدالانۋ جانە ازاپتاۋ باپتارى بويىنشا ايىپ تاعىلدى.
