قۇتىرعان تۇلكى اۋىل تۇرعىنىن تالاپ، ەلدى مەكەنگە كارانتين ەنگىزىلدى

«ۆيرۋسولوگيالىق قۇتىرۋعا تاپسىرىلعان مي سىناماسىنىڭ ي ف ا، د پ ر، بيوسىنامانىڭ باكتەريولوگيالىق زەرتتەۋلەر قورىتىندىسى بويىنشا وڭ ناتيجە كورسەتۋىنە بايلانىستى قوبدا اۋدانى جارىق اۋىلدىق وكرۋگى جامانكول اۋىلىنىڭ «ەر-تەمىر» شارۋا قوجالىعىنىڭ اۋماعىندا شەكتەۋ ءىس-شارالارى بەلگىلەنسىن»، - دەلىنگەن اشىق ن ق ا پورتالىندا جاريالانعان جارىق اۋىلدىق وكرۋگىنىڭ اكىمى ە. يمانگازيننىڭ شەشىمىندە.

قۇجاتتا كورسەتىلگەندەي، اتالعان اۋىل تۇرعىنىن سۋ جاعاسىندا جۇرگەن كەزدە قۇتىرعان تۇلكى قاۋىپ العان.

«جامانكول اۋىلىنىڭ تۇرعىنى مارات ەر-تەمىر كەنجەش ۇلىن سۋ جاعاسىندا جۇرگەن ۋاقىتتا تۇلكى تىستەپ العان. ازاماتقا «ماڭداي-مۇرىن ايماعىنىڭ تۇلكى تىستەگەن جاراقاتى، بالتىر جانە ساننىڭ جىرىلعان جاراقاتتارى» دياگنوزى قويىلدى. كەيىن تۇلكىنى زارداپ شەككەن تۇرعىننىڭ اكەسى ءولتىرىپ، مال دارىگەرلەرىنە حابار بەرگەن. ونىڭ ولەكسەسى مال قورىمىنا اپارىپ كومىلدى (زالالسىزداندىرۋ جۇمىستارى جۇرگىزىلدى) جانە جانۋاردان مي سىناماسى الىندى. ول قۇتىرماعا وڭ ناتيجە كورسەتتى. قازىر «ەر-تەمىر» شارۋا قوجالىعىنىڭ باسشىسى ك. م. بايجۇمانوۆتىڭ يەلىگىندە 130 باس ءىرى قارا، 742 باس ۇساق مال، 144 باس جىلقى جانە 3 ءيت بار»، - دەپ جازىلعان شەشىمگە قوسىمشا بەرىلگەن تۇسىندىرمەدە.

پروفيلاكتيكالىق ماقساتتا اتالعان ەلدى مەكەندەگى 1948 باس مالعا قۇتىرماعا قارسى ۆاكسينا جاسالعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى