سەرىك كۇدەبايەۆ ءوز كىناسىن تولىق مويىنداپ، جازا رەتىندە ايىپپۇل سالۋدى سۇرادى

ول قازاقستان رەسپۋبليكاسىنىڭ مەملەكەتتىك شەكاراسىن قاساقانا زاڭسىز كەسىپ ءوتتى دەگەن كۇدىككە ىلىنگەن. سوتتالۋشى وكىنىپ، ءوز كىناسىن تولىق مويىندادى، دەپ حابارلايدى قازاقپارات ءتىلشىسى.

«مەن ءوز كىنامدى تولىق مويىندايمىن»، - دەدى س. كۇدەبايەۆ سوتتاعى سوڭعى سوزىندە.

ادۆوكاتتىڭ ايتۋىنشا، ءىستى قاراۋ بارىسىندا ەكس-گەنەرال وزىنە تاعىلعان ايىپتى مويىنداعان.

وسىنى، سونداي-اق سەرىك كۇدەبايەۆتىڭ سوتتالعانىن ەسكەرە وتىرىپ، قورعاۋشى تاراپ وعان 500 ا ە ك (1 ميلليون 725 مىڭ تەڭگە) مولشەرىندە ايىپپۇل تۇرىندە بالاما جازا تاعايىنداۋدى سۇرادى.

ادۆوكات ونىڭ قورعاۋشىسى قىلمىسكەر ەمەس ەكەنىن، ءوز قاتەلىگىن تۇسىنگەنىن اتاپ ءوتتى.

بۇعان دەيىن سوتتالۋشى پروتسەستىك كەلىسىم جاساعىسى كەلەتىنىن ايتىپ ءوتىنىش بىلدىرگەن.

ەستەرىڭىزگە سالا كەتەيىك، سەرىك كۇدەبايەۆ 28-ءساۋىر كۇنى 10 جىلعا سوتتالعان بولاتىن.

وعان لاۋازىمدىق وكىلەتتىگىن اسىرا پايدالانۋ جانە ازاپتاۋ باپتارى بويىنشا ايىپ تاعىلدى.

ول بيىلعى 30-ناۋرىز كۇنگى سوت وتىرىسىنا كەلمەدى. سوندىقتان ونى سوتقا ءماجبۇرلى تۇردە جەتكىزۋ جونىندە قاۋلى شىقتى.

ارتىنشا گەنەرالدىڭ ەلدەن قاشىپ كەتكەنى بەلگىلى بولىپ، تالدىقورعان قالالىق سوتى سەرىك كۇدەبايەۆقا حالىقارالىق ىزدەۋ جاريالادى.

27-ساۋىردە سەرىك كۇدەبايەۆ تۇركيادا ۇستالىپ، ەلگە جەتكىزىلدى.

الماتى وبلىستىق پوليتسيا دەپارتامەنتىنىڭ بۇرىنعى باسشىسى سەرىك كۇدەبايەۆ قاڭتار وقيعاسى بويىنشا كۇدىكتى دەپ تانىلعان ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى