قىز الىپ قاشۋ دۇرىس پا؟
سوندىقتان دا قانشا قىز بۇل ءۇردىستىڭ قۇربانى بولىپ جاتقانىن بىلە المايمىز. الەۋمەتتىك جاعدايعا بايلانىستى ءوزارا كەلىسىممەن «قاشاتىندار» دا، ەركىنەن تىس قۇقىعى تاپتالىپ جاتقاندار دا بار. مۇنى اتا ءداستۇر دەپ سانايتىندار دا از ەمەس.
اۋىزدان اۋىزعا تاراعان جىرلار مەن اڭىز اڭگىمەلەردە قوس عاشىق ءوز ەلىنەن الىسقا قاشقان. ونىڭ سەبەبى - ەكى جاستىڭ قوسىلۋىنا تۋعان-تۋىستىڭ قارسى بولۋى. كوبىنە جاستار سەرت بايلاسىپ، سوڭى الىپ قاشۋعا ۇلاسقان. ءبىر ەرەكشەلىگى: ول كەزدە ەكى جاقتىڭ كەلىسىمى، شەشىمى ەسكەرىلگەن.
بۇگىنگە دەيىن جەتكەن ءداستۇردى حالىق اسىرەلەپ جىبەرگەنى سونشا، ءتىپتى، تانىمايتىن ادامدى الىپ قاشاتىن بولدى. كونبەي، قايتقىسى كەلگەن ارۋدىڭ جولىنا اجەلەر جاتىپ الىپ، «تەرىس باتامدى بەرەمىن» دەپ كوندىرگەن.
تەرىس باتا، قارعىس، ەلدىڭ وسەگىنەن قورىققان ياكي ۇيالعان قىز ەگدە جاستاعى ايەلدىڭ ۇستىنەن اتتاي الماعان. اتا-اناسى دا كونگەن وقيعالار از ەمەس.
ۇلكەندەردىڭ ەستەلىكتەرىن تىڭداساڭىز، بىرەۋدىڭ باعى اشىلعان. ال ءبىرتالاي قىزدىڭ بولاشاعىنا بالتا شابىلعان.
ۋاقىت وتە كەلە ەلدىڭ بۇل «داستۇرگە» دەگەن كوزقاراسى وزگەردى. ارتى قايعىلى وقيعاعا ۇلاسقان «الىپ قاشۋلار» كوپكە ساباق بولعان سەكىلدى.
دەسەك تە، بەس ساۋساق بىردەي ەمەس. وعان ەلىمىزدىڭ كەيبىر وڭىرىندە الىپ قاشاتىن جاعدايلار بولىپ تۇراتىنى دالەل بولا الادى. كورشى قىرعىزستان مەن رەسەي قۇرامىنداعى شەشەنستان سەكىلدى ەلدەردە قىز الىپ قاشۋ وقيعالارى بولىپ تۇرادى.
وزگەنىڭ الا ءجىبىن اتتاماعان قازاق حالقىنا، بىرەۋدىڭ الپەشتەپ وسىرگەن قىزىن، جەكە تۇلعانىڭ قۇقىعىن اياق استى ەتۋ دە جاراسپايتىنى انىق.
