ماڭعىستاۋدا دالاعا توگىلگەن مۇنايدان مال قىرىلدى - مينيسترلىك وقيعانىڭ ءمان- جايىن ءتۇسىندىردى
وسى وقيعاعا بايلانىستى ەكولوگيا جانە تابيعي رەسۋرستار مينيسترلىگى تۇسىنىك بەردى، دەپ حابارلايدى قازاقپارات ءتىلشىسى.
«ۆيدەودادا كورسەتىلگەن ماڭعىستاۋ اۋدانى قاراقيا اۋدانىنىڭ جەتىباي اۋىلىنىڭ شىعىس بولىگىنە شامامەن 10-15 شاقىرىم جەردە ورنالاسقان «شالبا» ۋچاسكەسىندەگى «NSH - P1» ۇڭعىماسىنان 2020 -جىلى توگىلگەن مۇنايدىڭ ەمۋلسياسى. ول ۇڭعىمانىڭ يەسى جوق. ەنەرگەتيكا مينيسترلىگى «NSH - P1» ۇڭعىماسىن قايتا اۋكسيونعا شىعارىپ، ونى «ARK Petroleum» جاۋاپكەرشىلىگى شەكتەۋلى سەرىكتەستىگى ۇتىپ العان. تيىسىنشە، تاعايىندالعان وپەراتورعا قاتىستى جەر قويناۋىن پايدالانۋعا ارنالعان كەلىسىمشارتپەن تازالاۋ جانە رەكۋلتيۆاتسيالاۋ جۇمىستارى قاراستىرىلۋى ءتيىس»، - دەپ جاۋاپ بەردى مينيسترلىكتىڭ باسپا ءسوز قىزمەتىنەن.
ۆەدومستۆو مالىمەتىنشە، اتالعان ۇڭعىما بويىنشا ەكولوگيا دەپارتامەنتى بىرنەشە رەت ەنەرگەتيكا مينيسترلىگىنە، ماڭعىستاۋ وبلىستىق پروكۋراتۋراسىنا جانە پوليتسيا دەپارتامەنتىنە ءتيىستى حات جولدانعان.
«جاڭا ۇڭعىما وپەراتورىنىڭ جەر قويناۋىن پايدالانۋعا ارنالعان كەلىسىمشارتى دايىندالعان ۋاقىتقا دەيىن دەپارتامەنتتىڭ ۇسىنىسىمەن ادام دەنساۋلىعىنا زيان كەلتىرمەۋ ماقساتىندا جانە ءۇي جانۋارلارىنىڭ قاۋىپسىزدىگىن قامتاماسىز ەتۋ ءۇشىن قاراقيا اۋدانى اكىمدىگىمەن توگىلگەن مۇناي ەمۋلسيالارىنا ۋاقىتشا قورشاۋ جۇمىستارى ۇيىمداستىرىلعان بولاتىن. سونداي- اق ءۇي جانۋارىنىڭ يەسى ءتورت تۇلىكتىڭ دەنساۋلىعىنا ءقاۋىپ توندىرۋگە، اينالاداعىلارعا زيان كەلتىرۋگە جول بەرمەيتىن جاعدايلاردى قامتاماسىز ەتۋگە مىندەتتى»، - دەپ ءمالىم ەتتى ەكولوگيا مينيسترلىگىنەن.
قاراۋسىز قالعان ۇڭعىماعا جاڭا وپەراتور بەكىتىلگەننەن كەيىن تازالاۋ جۇمىستارىن جۇرگىزىلەدى. تالاپتاردىڭ قاتاڭ ساقتالۋىن ماڭعىستاۋ وبلىستىق ەكولوگيا دەپارتامەنتى باقىلاۋدا ۇستايدى.
مينيسترلىكتەن مالىمدەگەندەي، قازىر وقيعا ورنىندا ماماندار تەكسەرۋ جۇمىستارىن جۇرگىزىپ جاتىر. مال شىعىنى ازىرگە بەلگىسىز.
