جەڭىس نۇرلىبايەۆ دجيۋ- دجيتسۋدان الەمنىڭ ەكى دۇركىن چەمپيونى اتاندى
اتىراۋ وبلىستىق دەنە شىنىقتىرۋ جانە سپورت باسقارماسى باسپا ءسوز قىزمەتىنىڭ اقپاراتىنا سۇيەنسەك، موڭعوليادا دجيۋ- دجيتسۋدان الەم چەمپيوناتى ءوتىپ جاتىر.
«موڭعوليادا جالاۋى جەلبىرەگەن ەرەسەكتەر مەن ارداگەرلەر سپورتشىلار اراسىنداعى الەم چەمپيوناتى 15-شىلدە باستالدى. الەمدىك دوداعا 41 ەلدىڭ 500 سپورتشىسى باق سىناپ جاتىر. سپورتشىلاردىڭ اراسىندا قازاقستان نامىسىن قورعاعان اتىراۋلىق جەڭىس نۇرلىبايەۆ 56 كەلىدە سىنعا ءتۇستى. ول قارسىلاستارىنىڭ بارىنەن باسىم ءتۇسىپ، دجيۋ- دجيتسۋدان الەمنىڭ ەكى دۇركىن الەم چەمپيونى اتاندى»، - دەپ حابارلادى باسقارمانىڭ باسپا ءسوز قىزمەتى.
بۇل - جەڭىس نۇرلىبايەۆتىڭ الەمدىك دوداداعى ەكىنشى جەڭىسى. ول 2021 -جىلى بىرىككەن اراب امىرلىگىنىڭ استاناسى ابۋ- دابي قالاسىندا سپورتتىڭ وسى تۇرىنەن وتكەن الەم چەمپيوناتىندا العاشقى التىن مەدالگە يە بولعان ەدى
ال موڭعوليادا ءوتىپ جاتقان الەم چەمپيوناتىندا اتىراۋلىق تاعى ءۇش سپورتشى تابىستى ونەر كورسەتتى. ونىڭ ءبىرى - ايەلدەر اراسىندا سىنعا تۇسكەن ايگەرىم تورەعوجينا كۇمىس مەدالدى يەلەندى.
سونداي- اق اتىراۋلىق ارداگەر سپورتشى رۋسلانحان مادىحانوۆ تا الەم چەمپيونى اتاعىنا قول جەتكىزدى. تاعى ءبىر ارداگەر سپورتشى - اتىراۋ وبلىستىق دجيۋ- دجيتسۋ فەدەراتسياسىنىڭ پرەزيدەنتى ەسەنعاليەۆ ايبار قولا جۇلدەگە يە بولدى.
ەسكە سالا كەتەلىك، بۇدان بۇرىن اتىراۋلىق جاس شاحماتشى قىز الەمنىڭ ءۇش دۇركىن چەمپيونى اتانعانىن حابارلاعان بولاتىنبىز.
جاسوسپىرىم شاحماتشى زارينا نۇرعاليەۆا 2019 -جىلى بەلارۋس رەسپۋبليكاسىندا وتكەن الەم چەمپيوناتىندا 12 جاسقا دەيىنگى جاسوسپىرىمدەر اراسىندا الەم چەمپيونى اتانعان. بىلتىر رۋمىنياداعى الەم چەمپيوناتىندا ەكىنشى رەت چەمپيون اتاعىن جەڭىپ الدى. ال بيىلعى 5-11 - ماۋسىمدا گرۋزيانىڭ باتۋمي قالاسىندا شاحماتتان جاسوسپىرىمدەر اراسىنداعى الەم چەمپيوناتىندا ءۇشىنشى رەت چەمپيوندىق تۇعىرعا كوتەرىلدى.
