اقتوبەدە ءسابيىن ۇرىپ ولتىرگەن اكە سوت الدىندا جاۋاپ بەرىپ جاتىر
اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا قىلمىستىق كودەكستىڭ «ادام ءولتىرۋ» بابى بويىنشا 41 جاستاعى سوتتالۋشىعا ايىپتاۋ اكتىسى وقىلدى. ءىس ماتەريالىنا سۇيەنسەك، ۇشەمنىڭ اناسى اتا- انا قۇقىعىنان ايىرىلعان سوڭ اكەسى ولاردى سوت ارقىلى وزىنە العان. ءسويتىپ، سوتتالۋشى بالالارىن اناسىنىڭ ۇيىنە اپارىپ، سوندا تۇرادى.
«بىرگە تۇرعاندا ارتۋر احۋنوۆ پەن ونىڭ اناسى اراسىندا ۇرىس بولادى. اناسى بالالارىن الىپ، ۇيدەن كەتۋىن تالاپ ەتەدى. 2022 -جىلدىڭ 1-جەلتوقسانى كۇنى احۋنوۆ ءوزىنىڭ بالالارىن «ءۇمىت» سابيلەر ۇيىنە اپارادى. قىزمەتكەرلەر سول كەزدە بالالاردىڭ دەنەسىنىڭ ءار جەرىندە ۇرعاننان قالعان ءىز بار ەكەنىن كورەدى. اڭگىمە كەزىندە بالا ءوزىن اكەسى ۇرعانىن ايتقان. «ءۇمىت» سابيلەر ءۇيىنىڭ قىزمەتكەرلەرى بىردەن پوليتسياعا حابار بەرەدى. №1 قالالىق پوليتسيا ءبولىمى اكىمشىلىك قۇقىقبۇزۋشىلىق تۋرالى كودەكستىڭ 73-بابى بويىنشا ءىس قوزعادى. الايدا، احۋنوۆ ودان ساباق المادى. قالالىق ءبىلىم ءبولىمى مەن №1 قالالىق پوليتسيا ءبولىمى ءوز مىندەتتەرىن تولىق اتقارمادى، بالانى الىپ كەتۋگە اسىقپادى. سالدارىنان احۋنوۆ اسا اۋىر قىلمىس جاسادى»، - دەدى مەملەكەتتىك ايىپتاۋشى اسەل ۋتەنوۆا.
پروكۋروردىڭ ايتۋىنشا، 2022 -جىلدىڭ 23-جەلتوقسانى كۇنى ساعات شاشامەن 21:00 دە احۋنوۆ بالاسىمەن بىرگە جالدامالى پاتەردە بولعان. بالا اۋىرىپ، مازاسىندانعان. سونىمەن بىرگە، باۋىرلارىنىڭ جانىنا بارعىسى كەلەتىنىن ايتقان. ال، باۋىرلارى ول كەزدە اجەسىنىڭ جانىندا بولعان. اكەسى اشۋلانىپ، تەرگەۋ كەزىندە انىقتالماعان زاتپەن بالانى ۇرادى.
«الدىمەن باسىنان، كەيىن كەۋدەسىنەن سوققى جاسايدى. بالا قۇلاپ قالىپ، ەسىنەن تانادى. ول وقيعا ورنىندا كوز جۇمادى. 2022 -جىلى 24-جەلتوقسان كۇنى ساعات 16:45 تە ەكسكاۆاتوردى 20 مىڭ تەڭگەگە جالدايدى. ول «قۇرىلىستان قالعان قالدىقتى كومەمىن» دەپ ايتقان. سول كۇنى ساعات 23:00 دە احۋنوۆ قىلمىسىن جاسىرۋ ءۇشىن ەكى قاباتتى ءۇيدىڭ جانىنا بالانىڭ دەنەسىن كومىپ تاستايدى. كەيىن اناسىنا بارىپ، بالانىڭ جوعالعانىن ايتقان»، - دەدى پروكۋرور.
سوت- مەديتسينالىق ساراپتاما كەزىندە دانيل احۋنوۆتىڭ باس- مي جاراقاتىنان مەرت بولعانى بەلگىلى بولدى. ونىڭ باسىنا قان قۇيىلعان. كەۋدە تۇسىنان العان سوققى دا اۋىر بولعان.
سوت وتىرىسى كەزىندە كۋاگەرلەردەن جاۋاپ الىندى. بالالار ءۇيىنىڭ الەۋمەتتىك قىزمەتكەرى جاننا داستانوۆانىڭ ايتۋىنشا، 2022 -جىلدىڭ 16- قاراشاسىندا ارتۋر احۋنوۆ قورعانشىلىق كەڭەسىنىڭ شەشىمىمەن بالالاردى الىپ كەتۋگە بارعان. قىزمەتكەرلەر ءۇش بالانى باعۋ قيىن ەكەنىن ەسكەرتىپ، تاڭەرتەڭ اكەلىپ، كەشكە الىپ كەتۋگە بولاتىن توپ بارىن ايتتى. ەكى كۇن بويى بالالاردى تاڭەرتەڭ اكەلىپ، كەشكە الىپ كەتكەن اكە كەيىن بايلانىستى ءۇزىپ تاستاعان. كوپ ۇزاماي بالالاردىڭ تۋعان كۇنىندە ولاردى شاقىرىپ الىپ، دەنەسىندەگى كوگەرگەن ىزدەردى انىقتايدى.
«بالالاردا كوگەرگەن ءىز بولعان سوڭ قورعانشىلىق بولىمىنە حابارلاستىق. ولار پوليتسياعا حابار بەرۋدى سۇرادى. مەن 102 تەلەفونىنا حابارلاستىم. ساۋالناما جۇرگىزىپ، جاسوسپىرىمدەر جونىندەگى ينسپەكتور بالالاردى قارادى. تۇسىنىكتەمە الدى. اكىمشىلىك حاتتاما تولتىردى. سوت ساراپتاما جاساۋ ءۇشىن ولاردى اكەسىمەن بىرگە الىپ كەتتى»، - دەدى كۋاگەر جاننا داستانوۆا.
ايتا كەتەيىك، بالانىڭ جوعالعانى تۋرالى حابار تۇسكەن سوڭ عانا اكىمشىلىك ءىس سوتقا ءتۇسىپ، ارتۋر احۋنوۆتى 15 تاۋلىككە قاماۋ تۇرىندەگى جازا قولدانىلعان.
ەسكە سالساق، وقيعا بىلتىر جەلتوقسان ايىندا بولدى. مارقۇم دانيل احۋنوۆتىڭ اكەسى بالاسىنىڭ جوعالىپ كەتكەنىن ايتىپ، پوليتسياعا حابار بەردى. ال، ارادا ەكى كۇن وتكەندە وبلىستىق پ د باسپا ءسوز قىزمەتى بالانىڭ دەنەسى تابىلعانىن، وندا زورلىق بەلگىلەرى بار ەكەنىن حابارلادى.
سوت وتىرىسى جالعاسىپ جاتىر.
