ەرىكتى قونىس اۋدارۋ: سولتۇستىككە كوشكەندەرگە بەرىلگەن ماتەريالدىق كومەك بۇعاتتالمايدى
بۇل جايىندا سەنات دەپۋتاتتارىنىڭ ساۋالىنا پرەمەر- مينيستر ءاليحان سمايىلوۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«مينيسترلىك (ەڭبەك جانە حالىقتى الەۋمەتتىك قورعاۋ مينيسترلىگى) «قۋاتتى وڭىرلەر - ەل دامۋىنىڭ درايۆەرى» ۇلتتىق جوباسى اياسىندا ىسكە اسىرىلاتىن ەرىكتى تۇردە قونىس اۋدارۋشىلاردىڭ ەسەبىن جىل سايىن قازاقستان رەسپۋبليكاسى ۇلتتىق ەكونوميكا مينيسترلىگىنە جولدايدى، سايكەسىنشە اتالعان مەملەكەتتىك ورگان ءبىرىڭعاي وپەراتور رەتىندە ۇكىمەتكە ەسەپ بەرەدى. سونىمەن قاتار، اتالعان باعدارلامانىڭ ىسكە اسىرىلۋى قازاقستان رەسپۋبليكاسى پرەزيدەنتى اكىمشىلىگىنىڭ، ۇكىمەتتىڭ، جوعارى اۋديتورلىق پالاتانىڭ جانە مۇددەلى مەملەكەتتىك ورگانداردىڭ تۇراقتى باقىلاۋىندا»، - دەيدى ۇكىمەت باسشىسى جاۋابىندا.
پرەمەر- مينيستر وسى جىلدىڭ مامىرىندا سولتۇستىك قازاقستان وبلىسىندا مەملەكەت باسشىسىنىڭ ەرىكتى تۇردە قونىس اۋدارۋ باعدارلاماسىن ىسكە اسىرۋ ماسەلەلەرى بويىنشا تاپسىرمالارىنىڭ ورىندالۋىنا قاتىستى جەرگىلىكتى اتقارۋشى ورگانداردىڭ قىزمەتىنە كەشەندى تەكسەرۋ جۇرگىزىلگەنىن اتاپ وتەدى.
«تەكسەرۋ ناتيجەسىندە جاڭا جەردە جۇمىسقا ورنالاسۋ، بەرىلەتىن تۇرعىن ءۇيدىڭ ساپاسى، قونىس اۋدارۋشىلار اتىندا كرەديتتىڭ كوپ بولۋى، جەرگىلىكتى جەرلەردە اقپاراتتىق- ءتۇسىندىرۋ جۇمىستىڭ ءالسىز بولۋى سياقتى ماسەلەلەر انىقتالدى. بۇگىنگى كۇنى اتالعان باعىتتا ماسەلەلەردى شەشۋ بويىنشا جۇمىستار جۇرگىزىلىپ جاتىر. ماسەلەن، ەرىكتى تۇردە قونىس اۋدارۋشىلاردىڭ وتباسىنا تۇرعىن ءۇي الۋ ءۇشىن ەكونوميكالىق ۇتقىرلىق سەرتيفيكاتىن بەرۋ تەتىگى ىسكە قوسىلدى. اتالعان سەرتيفيكات تۇرعىن ءۇيدى ساتىپ الۋعا، سالۋعا نەمەسە ەكىنشى دەڭگەيلى بانكتەردە العاشقى جارنا رەتىندە پايدالانۋ ءۇشىن قونىس اۋدارۋشىلاردىڭ وتباسىنا تۇرعىن ءۇي قۇنىنىڭ 50 پايىزى، الايدا 4 ميلليون تەڭگەدەن اسپايتىن كولەمدە بەرىلەدى. بۇل تەتىك قونىس اۋدارۋشىلارعا تۇرعىن ءۇيدى وزدىگىنەن تاڭداۋعا جانە ساپاسىز ۇيلەردىڭ شەشۋگە مۇمكىندىك بەرەدى»، - دەدى ول.
ءاليحان سمايىلوۆتىڭ دەرەگىنشە، قونىس اۋدارۋدى ىنتالاندىرۋ ماقساتىندا وڭتۇستىك وڭىرلەردە سولتۇستىك وڭىرلەردىڭ جۇمىس بەرۋشىلەرىن تارتا وتىرىپ، بوس جۇمىس ورىندارى جارمەڭكەسى وتكىزىلەدى. مىسالى، بيىل تۇركىستان، قىزىلوردا، ماڭعىستاۋ وبلىستارىندا جانە الماتى قالاسىندا «AMANAT» پارتياسىنىڭ فيليالى وكىلدەرىنىڭ قاتىسۋىمەن بوس جۇمىس ورىندارى جارمەڭكەسى ۇيىمداستىرىلدى.
«سونىمەن قاتار، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كوشى- قون سالاسىنداعى زاڭنامالاردى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسى زاڭىنىڭ جوباسى ازىرلەنىپ، بۇگىنگى كۇنى قازاقستان رەسپۋبليكاسى پارلامەنتى ءماجىلىسىنىڭ قاراۋىندا. بۇل زاڭ جوباسى قابىلدانعان جاعدايدا سولتۇستىك وڭىرلەرگە قونىس اۋدارۋشىلارعا جەرگىلىكتى اتقارۋشى ورگاندار تاراپىنان بەرىلگەن ماتەريالدىق كومەك قاراجاتىن بۇعاتتاماۋ ماسەلەسى شەشىلەدى»، - دەدى ۇكىمەت باسشىسى.
