قازاقستان ەۋروپا كەڭەسىنىڭ كومپيۋتەرلىك قىلمىستار جونىندەگى كونۆەنتسياسىنا قوسىلادى
بۇل تۋرالى ءى ءى م كريمينالدىق پوليتسيا دەپارتامەنتى كيبەرقىلمىسقا قارسى كۇرەس ورتالىعىنىڭ باستىعى جاندوس ءسۇيىنباي دەپ ءمالىم ەتتى، دەپ حابارلايدى قازاقپارات ءتىلشىسى.
«قىلمىس جاساۋدا ينتەرنەتتىڭ پايدالانىلۋىنا بايلانىستى كۇدىكتى ادامداردى انىقتاۋ قيىندىق تۋدىرادى. شەتەلدىك بايلانىس پروۆايدەرلەرى مەن ينتەرنەت- رەسۋرستار يەلەرىنىڭ مەنشىگىندەگى اقپاراتپەن جەدەل الماسۋ قاجەتتىلىگى تۋىندايدى. وسىعان بايلانىستى شەت مەملەكەتتەردىڭ قۇقىق قورعاۋ ورگاندارىمەن جانە ءتۇرلى حالىقارالىق قۇرىلىمدارمەن حالىقارالىق ىنتىماقتاستىققا ۇلكەن ءرول بەرىلەدى. بۇگىنگى تاڭدا وسى سالاداعى حالىقارالىق ىنتىماقتاستىقتى كوزدەيتىن جالعىز قۇجات - ول ەۋروپا كەڭەسىنىڭ كومپيۋتەرلىك قىلمىستار جونىندەگى كونۆەنتسياسى. مينيسترلىك كونۆەنتسياعا قوسىلۋ جونىندە ءبىرقاتار شارالار قابىلدادى، سونىڭ ناتيجەسىندە بيىل ءساۋىر ايىندا قازاقستانعا ەۋروپا كەڭەسىنىڭ وعان قوسىلۋعا شاقىرۋى كەلىپ ءتۇستى»، - دەپ ءتۇسىندىردى جاندوس ءسۇيىنباي.
ورتالىق باسشىنىڭ مالىمدەۋىنشە، بۇل شارا قۇقىق قورعاۋ ورگاندارىنا شەتەلدىك قۇزىرەتتى ورگاندارمەن جەدەل اقپارات الماسۋعا، سونداي- اق ينتەرنەت جەلىسىندە جەدەل- ىزدەستىرۋ ءىس- شارالارىن جۇرگىزۋ مۇمكىندىكتەرىن كەڭەيتۋگە ىقپال ەتپەك. بۇعان قوسا، زاڭنامانى كونۆەنتسيانىڭ نورمالارىنا سايكەس كەلتىرۋ جانە ونى راتيفيكاتسيالاۋ جۇمىستارى قولعا الىنادى.
