يراندا ايەلدەردىڭ حيدجاب كيۋىن قاداعالايتىن پوليتسيا جۇمىسىن قايتا باستادى

جەكسەنبى كۇنى يراننىڭ ادەت- عۇرىپ ءدىني پوليتسياسى ايەلدەردىڭ يسلامي كيىم ۇلگىسىن، سونىڭ ىشىندە حيدجاب كيۋىن قاداعالاۋ ءۇشىن كوشەلەردى پاترۋلدەي باستادى.

پاترۋل جۇمىسى ماحسا اميني ەسىمدى جاس قىز ورامالدى دۇرىس تاقپاعانى ءۇشىن تۇتقىندالىپ، پوليتسيادا سوققىعا جىعىلىپ كوز جۇمعاننان كەيىن ارادا بار- جوعى 10 اي وتكەندە قايتا باستالىپ وتىر.

ونىڭ ءولىمى بۇكىل ەلدە جاپپاي نارازىلىق تۋعىزىپ، ءپاترۋلدىڭ ۋاقىتشا توقتاۋىنا سەبەپ بولعان ەدى.

ماحسا اميني قايتىس بولعاننان كەيىن ەلدىڭ تۇكپىر- تۇكپىرىندە ەرەۋىلدەر كوپ بولدى، ءبىراق وعان بۇكىل حالىق جاپپاي قوسىلا قويعان جوق.

يران وتكەن قىركۇيەكتەن بەرى ءوز تاريحىنداعى ەڭ ۇزاق ازاماتتىق نارازىلىقتىڭ ءبىرىن باستان وتكەردى.

بيلىك «اميني جۇرەك تالماسىنان قايتىس بولدى» دەگەن سوزىنەن تانبادى. ءبىراق كوپ يراندىقتار بۇعان سەنگەن جوق.

بيلىك رەجيمدى وزگەرتۋگە جانە زايىرلى دەموكراتياعا شاقىرعان ەرەۋىلشىلەردى اياۋسىز باسىپ- جانشىپ تاستادى.

قۇقىق قورعاۋ ۇيىمدارىنىڭ مالىمەتىنشە، 500-دەن استام دەمونسترانت ولتىرىلگەن، ونىڭ ىشىندە كامەلەتكە تولماعان 70 بالا بار. 20 مىڭعا جۋىق ادام قاماۋعا الىنعان.

يران رەسمي جاريالاعان ستاتيستيكا قاۋىپسىزدىك قىزمەتكەرلەرىن قوسقاندا 200 ادام مەرت بولدى دەيدى. رەسمي نۇسقا بويىنشا تارتىپسىزدىكتى شەتەلدىك بارلاۋ اگەنتتىكتەرى ارانداتقان.

شاريعاتقا نەگىزدەلگەن يران زاڭى بويىنشا ايەلدەر شاشىن حيدجابپەن (ورامالمەن) جاۋىپ، دەنە ءبىتىمىن جاسىرۋ ءۇشىن ۇزىن ءارى كەڭ كيىم كيۋى كەرەك.

ادەت- عۇرىپ پوليتسياسىنا وسى ەرەجەلەردى ساقتاۋ جانە وعان ساي كيىنبەگەن ايەلدەردى ۇستاۋ مىندەتى جۇكتەلگەن.

«پاترۋل كەزىندە وفيتسەرلەر اۋەلى ءتارتىپ ساقتاماعان ايەلدەرگە ەسكەرتەدى، - دەيدى پوليتسيا وكىلى سايد مونتازەرولماحدي. - ەگەر ولار بۇيرىققا باعىنباسا، پوليتسيا سوتقا جۇگىنۋى مۇمكىن».

نارازىلىق شەرۋلەرى باسىلىپ، وعان قاتىسقان ءبىراز ادام ءولىم جازاسىنا كەسىلگەنىنە قاراماستان كوپ ايەلدەر حيدجاب كيۋدى مۇلدە قويدى.

بۇل 1979 -جىلعى توڭكەرىستەن كەيىنگى يراندا ءدىني بيلىككە جاسالعان ەڭ ۇلكەن سىناق بولدى.

الەۋمەتتىك جەلىدە جاريالانعان ۆيدەولار - يران كوشەلەرىندە حيدجابسىز ايەلدەردىڭ كوبەيگەنىنىڭ ايقىن دالەلى.

وسى ناۋقانعا جاۋاپ رەتىندە يران بيلىگى يسلام كيىم ۇلگىسىن بۇزعاندارعا جازانى كۇشەيتتى، سونىڭ ىشىندە حيدجاب تۋرالى زاڭعا باعىنباعان كاسىپورىنداردى ماجبۇرلەپ جاباتىن بولدى.

ەلدە ءالى دە كونسەرۆاتيۆتى ادامدار كوپ.

مىسالى وسى جىلدىڭ باسىندا ەر ادامنىڭ كاسسادا كەزەكتە تۇرعان ەكى ايەلدىڭ باسىنا ايران قۇيىپ جاتقان ۆيدەوسى ينتەرنەتتە تارادى.

ەكەۋىنىڭ دە باسىندا ورامال جوق ەدى.

ولارعا شابۋىل جاساعان ەر ادامدى ساتۋشى دۇكەننەن يتەرىپ شىعارعان.

ميزان سوت اگەنتتىگىنىڭ حابارلاۋىنشا، ەكى ايەل دە شاشىن جايىپ كوپشىلىك الدىنا شىققانى ءۇشىن ۇستالعان، ال دۇكەن يەسىنە زاڭعا باعىنۋ كەرەكتىگى ەسكەرتىلگەن.

شابۋىل جاساعان ەركەك تە «قوعامدىق ءتارتىپتى بۇزعانى ءۇشىن» قاماۋعا الىندى.

ريەۆوليۋتسيادان كەيىن يراندا مورالدىق پوليتسيانىڭ ءارتۇرلى فورماسى بولدى. ادەت- عۇرىپ پاترۋلى ءوز جۇمىسىن 2006 -جىلى باستادى.

كۇش قۇرىلىمدارىندا قانشا ەر مەن ايەل جۇمىس ىستەيتىنى بەلگىسىز، ءبىراق ولاردىڭ قارۋ- جاراق ۇستاۋعا رۇقساتى بار، ۇستالعانداردى تۇرمەگە قاماي الادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى