بالانى گادجەتكە تاۋەلدىلىكتەن قالاي ارىلتۋعا بولادى
قورشاعان ورتامەن قارىم-قاتىناسى ازايادى. قازىر 4-5 جاستاعى بۇلدىرشىندەردىڭ اراسىندا گادجەتكە تاۋەلدىلىك بار.
بۇل تۋرالى قازاقپارات تىلشىسىنە پسيحيكالىق دەنساۋلىق ورتالىعىنىڭ ماماندارى ايتتى.
الماتىداعى پسيحيكالىق دەنساۋلىق ورتالىعىنىڭ دارىگەرلەرى بالالاردى گادجەتتەن تەز ارادا اجىراتىپ الماسا، سوڭى جاقسىلىققا اپارمايدى، دەپ دابىل قاعىپ وتىر.
ايتۋلارىنشا، گادجەتكە تاۋەلدىلىك ەمدەلەدى. ەڭ باستىسى، بالاعا ونىڭ زيان ەكەنىن ايتىپ، كوزىن جەتكىزە ءبىلۋ كەرەك.
«بىرىنشىدەن، بالاعا گادجەتتەن اتا- اناسى ماڭىزدى بولۋى كەرەك. ياعني اكە- شەشە پەرزەنتىن وزىنە قاراتا ءبىلۋى كەرەك. ۇرپاعىنىڭ پسيحيكاسىنىڭ دۇرىس بولۋى الدىمەن سولاردىڭ مىندەتى. ءبىز كەلىسۋىمىز كەرەك بالامەن. قازىرگى بالانى الداۋدىڭ كەرەگى جوق. بالانى الداساڭىز، ول كەرىسىنشە ءسىز بەرمەگەن مالىمەتتىڭىزدى دالادان نەمەسە عالامتوردان تاۋىپ الادى. سوندىقتان، بالامەن ءبىز اشىق سويلەسىپ كەلىسىمشارتقا وتىرۋىمىز كەرەك»، - دەيدى پسيحيكالىق دەنساۋلىق ورتالىعىنىڭ ديرەكتورى ساپار راحمانشەيەۆ.
سپيكەردىڭ سوزىنشە، پسيحيكالىق دەنساۋلىق ورتالىعى قالالىق ءبىلىم باسقارماسىمەن بىرگە 3 مىڭنان اسا وقۋشىعا ساۋالناما جۇرگىزدى. قازىر ماماندار ساراپتاما جاساپ جاتىر. سونىڭ ناتيجەسىندە بالالاردى گادجەتتەن اجىراتىپ الۋ جولدارىن قاراستىرادى.
پسيحياتر دارىگەر سوفيا ابىلدايەۆا اتا-انا مەن بالا اراسىنداعى كەلىسپەۋشىلىككە وسى تەلەفون سەبەپ ەكەنىن ايتتى.
«ادام كىنانى الدىمەن وزىنەن ىزدەۋى كەرەك. گاجەتتى اپەرگەن، ينتەرنەتتى قوسقان، وعان قوسا قاداعالاۋدى ازايتقان بالانىڭ اكە- شەشەسىنىڭ ءوزى ەمەس پا؟ ياعني، بارلىق جاعدايدى جاساپ قويادى. گادجەتكە تاۋەلدىلىك دەگەن دياگنوز جوق، ارينە. ءبىراق بىلەسىز بە، دۇرىس ۇيىقتاماۋ، دۇرىس تاماقتانباۋ، قوزعالىستىڭ جوقتىعى دەنساۋلىققا نۇقسان كەلتىرەدى. سوڭى سوزىلمالى اۋرۋلارعا اپارادى»، - دەيدى دارىگەر.
ونىڭ ايتۋىنشا، بالالار گادجەتتى ءبىلىم الۋ ءۇشىن عانا قولدانۋى ءتيىس. سونىڭ وزىندە 7 جاستان 12 جاسقا دەيىن 1 ساعات قولدانۋى كەرەك. ال، 12 جاستان 18 جاسقا دەيىن 2 ساعات ۇستاعانى ءجون.
«تەلەفوننىڭ ەكرانى وتە كىشكەنتاي. اسىرەسە، ودان ويىندار وتە ۇساق كورىنەدى. ميعا ۇنەمى سالماق ءتۇسىپ تۇراتىندىقتان، دەمالىپ ۇلگەرمەيدى. قازىر پسيحيكالىق دەنساۋلىق ورتالىعىندا 2 جارىم مىڭعا جۋىق بالا مەن جاس ءوسپىرىم تىركەۋدە تۇر. ءجيى كەزدەسەتىن دياگنوز اۋتيزم مەن شيزوفرەنيا»، - دەدى ول.
