الماتى زووباعىنىڭ اكىمشىلىگى جانۋارلاردى اپتاپ ىستىقتان قالاي قورعايتىنىن ايتتى

ولار اپتاپ ىستىقتان قالاي قورعانۋدا؟ زووباق اكىمشىلىگى قىزىق ۆيدەومەن ءبولىستى، دەپ قازاقپارات ءتىلشىسى.

«كۇن ىستىق، قاپىرىق. كوپ ادام زووباقتاعى جانۋارلار اپتاپ ىستىققا قالاي شىدايدى دەپ سۇراق قويادى. بىزدەگى جانۋارلاردىڭ بارلىعى قاجەتتى سۋمەن قامتاماسىز ەتىلگەن. ءبىراق حايۋاناتتار باعىنا كەلۋشىلەر جانۋارلارعا ارنالعان سۋ قۇياتىن ىدىستاردى بايقاي بەرمەيدى. مىسالى، ياگۋار، لەوپارد، پۋما، تۇلكى، قاسقىرلارعا بەرىلەتىن سۋ تەحنيكالىق ايماقتا ورنالاستىرىلعان ىدىستاردا بولادى. ول جەر سۋدى ءجيى اۋىستىرىپ تۇرۋعا قاۋىپسىز ءارى ىڭعايلى. تەحنيكالىق ايماقتاعى سۋلار تازا ءارى سالقىن بولىپ تۇرادى. سوندىقتان سۋلاردى ءبىز نەگىزىنەن ۇيشىكتەرگە، كولەڭكەگە قويامىز. سۋ قۇيىلعان ىدىستار سىرتتاعى قورشاۋدا تۇرسا ىسىپ، بۇزىلىپ كەتەدى. بورسىق، اق ايۋ، جولبارىستار باسسەيىندە شومىلعاندى جاقسى كورەدى. ال پىلدەر ءۇشىن ارنايى سەنسورلى دۋش ورناتىلعان»، - دەلىنگەن حابارلامادا.

بەينەجازبادان زووباق جانۋارلارىنىڭ قالاي شومىلىپ، دۋش قابىلداعانىن، سونداي-اق شيمپانزەنىڭ بالمۇزداقتى قالاي جەيتىنىن كورۋگە بولادى.

«الماتى زووباعىنا تاڭەرتەڭگى ۋاقىتتا جانە كەشكى مەزگىلدە كەلۋگە قولايلى. زووباق تاڭعى 09.00-دەن كەشكى 20.00-گە دەيىن جۇمىس ىستەيدى. كاسسالار ءبىر ساعات بۇرىن جابىلادى»، - دەپ اتاپ ءوتتى زووباقتان.

بۇعان دەيىن الماتىدا اپتاپ ىستىق 20-شىلدەگە دەيىن ساقتالاتىنى تۋرالى جازعان ەدىك.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى