قىزىلوردا پوليتسيا دەپارتامەنتى نەلىكتەن قىمبات ليۋكس كولىكتەر ساتىپ الاتىنىن ءتۇسىندىردى
الەۋمەتتىك جەلىدە جەرگىلىكتى تۇرعىن سەرىك تەڭىزبايەۆ وبلىستىق پوليتسيا دەپارتامەنتى ءارقايسىسى 40 ميلليون تەڭگە تۇراتىن ليۋكس ساناتىنداعى «كيا» كولىگىن العالى جاتقانىن حابارلاعان ەدى.
وسى جونىندە دەپارتامەنت تاراپىنان ءتيىستى جاۋاپ بەرىلدى.
«ساتىپ الۋعا جوسپارلانعان اۆتوكولىكتەردى جول قاۋىپسىزدىگىن قامتاماسىز ەتۋ، اسا ءقاۋىپتى قىلمىسكەرلەردىڭ ءىزىن كەسۋ، ولاردى ۇستاۋ جانە تاعى باسقا دا جەدەل جۇمىستارعا جۇمىلدىرۋ كوزدەلگەن. سونداي-اق، جۇمىس بابىمەن رەسمي ءىسساپارعا كەلەتىن كۇزەتىلەتىن تۇلعالاردىڭ ومىرىنە، دەڭساۋلىعىنا قارسى باعىتتالعان ءارتۇرلى زاڭ بۇزۋشىلىقتاردىڭ الدىن الۋ مەن ولاردىڭ مىنگەن اۆتوكولىكتەرىنىڭ قاۋىپسىزدىگىن قامتاماسىز ەتۋ جانە ولاردى ارنايى كولوننادا ىلەسىپ الىپ ءجۇرۋدى پوليتسيا قامتاماسىز ەتەدى»، - دەپ ءمالىم ەتتى پوليتسيا دەپارامەنتىنەن.
ۆەدومستۆو مالىمەتىنشە، بۇعان دەيىن ءدال وسىنداي ماقساتتا اۆتوكولىك قۇرالدارى 2013 -جىلى ساتىپ الىنعان. ولاردىڭ پايدالانۋ مەرزىمى - 7 جىل.
ق ر قارجى مينيسترلىگىنىڭ 2010 -جىلعى 3-تامىزداعى بۇيرىعىنا سايكەس ول ەسەپتەن شىعارۋعا جاتادى.
«اتالعان اۆتوكولىكتەردى مەملەكەتتىك ساتىپ الۋ ءراسىمى قولدانىستاعى بۇكىل زاڭنامالىق اكتىلەردىڭ تالاپتارىنا تولىق سايكەس كەلەدى. ساتىپ الىناتىن اۆتوكولىكتەر وتاندىق ءونىم بولسا، وعان قوسا ىشكى ىستەر مينيسترلىگىنە جۇكتەلگەن مىندەتتەردى ءتيىمدى اتقارۋعا وتە قولايلى. اۆتوكولىكتىڭ تەحنيكالىق سيپاتتاماسىنا قاراماستان ەڭ تومەنگى باعاعا ساتىپ الۋ جوسپارلاندى. مەملەكەتتىك ساتىپ الۋ شەڭبەرىندە جيناقتالعان ۇسىنىستار وبلىستىق قوعامدىق كەڭەس مۇشەلەرىمەن تالقىلاندى. ساتىپ الىناتىن اۆتوكولىكتەر ارنايى جابدىقتالعان كولىك بولماعان جاعدايدا قاجەتى جوق ەكەنى ەسكەرتىلدى. دەگەنمەن، بەكىتىلگەن ىشكى ەرەجەلەرگە سايكەس ساتىپ الىنعان اۆتوكولىكتەر تەڭگەرىمگە قابىلدانعاننان كەيىن ءتيىستى جارقىلداۋىق شامدارى، دىبىستىق كۇشەيتكىش قوندىرعىلارى جانە باسقا دا قاجەتتى قۇرالدارىمەن جابدىقتالادى»، - دەپ اتاپ ءوتتى دەپارتامەنتتەن.
