بالالار كىتاپحاناسى جوباسى اياسىندا كوركەم ادەبيەتتەر ءتىزىمى جاسالدى
وسىعان بايلانىستى وقۋ- اعارتۋ مينيسترىلىگىنىڭ رەسپۋبليكالىق عىلىمي- پەداگوگيكالىق كىتاپحاناسىندا «بالالار كىتاپحاناسى» باعدارلاماسىنا ۇسىنىلاتىن كىتاپتاردىڭ ءتىزىمى جاساقتالدى. وعان قازاق ادەبيەتى تاريحىنىڭ بارلىق ءداۋىرى مەن كەزەڭىن، جانرلىق باعىتىن قامتيتىن 1770 شىعارما ەندى. ونىڭ %76— وتاندىق،%24— الەم ادەبيەتىنىڭ تاڭداۋلى ەڭبەكتەرى.
وتاندىق شىعارمالار قاتارىنا اباي قۇنانبايەۆ، احمەت بايتۇرسىنوۆ، تاحاۋي احتانوۆ، شەرحان مۇرتازا، بەردىبەك سوقپاقبايەۆ سىندا قالامگەرلەردىڭ شىعارمالارى ەندى. ال الەم ادەبيەتىنىڭ تىزىمىندە ەرنەست حەمەنگۋەي، دجەك لوندون، رابيندرانات تاگور، الەكساندر وستروۆسكي، ۆالتەر سكوت، ميحايل لەرمونتوۆتىڭ ەڭبەكتەرى بار.
ءتىزىمدى جاساقتاۋ ءۇشىن ارنايى قۇرىلعان كوميسسيا قازاق ءتىلى مەن ادەبيەتى ءپانى وقىتۋشىلارى، مەكتەپ كىتاپحاناشىلارى اراسىندا جۇرگىزىلگەن ساۋالناما ناتيجەلەرىن ەسكەردى.
«بالالار كىتاپحاناسى» باعدارلاماسىنا ۇسىنىلاتىن كىتاپتاردىڭ ءتىزىمىن جاساقتاۋ ءۇشىن ارنايى تاۋەلسىز قوعامدىق كوميسسيا قۇرامىنا ق ر ۇلتتىق عىلىمي اكادەمياسى، م. اۋەزوۆ اتىنداعى ادەبيەت جانە ونەر ينستيتۋتى، ر. سۇلەيمەنوۆ اتىنداعى شىعىس تانۋ ينستيتۋتىنىڭ عىلىمي قىزمەتكەرلەرى، ق ر ۇلتتىق اكادەميالىق كىتاپحانا، قر وقۋ- اعارتۋ مينيسترلىگىنىڭ رەسپۋبليكالىق عىلىمي- پەداگوگيكالىق كىتاپحاناسى مەن ق ر ۇلتتىق مەملەكەتتىك كىتاپ پالاتاسىنىڭ ماماندارى كىردى. ولار بىرنەشە كەزەڭ بويىنشا تالقىلاۋلار جۇرگىزىپ، بارلىق جانرلىق باعىتتاردى قامتىدى. جاساقتالعان ءتىزىمنىڭ %40 ى- كونە كلاسسيكالىق ادەبيەت، %30 ى «تاۋەلسىزدىك كەزەڭىندەگى ادەبيەت» ، %24 ى الەمدىك ادەبيەتتىڭ ۇزدىك ۇلگىلەرىنەن تۇرادى»، — دەيدى رەسپۋبليكالىق عىلىمي- پەداگوگيكالىق كىتاپحانا ديرەكتورى ءاليا سايدەمبايەۆا.
«بالالار كىتاپحاناسى» باعدارلاماسىنىڭ باستى ماقساتى مەكتەپ كىتاپحانالارىن ماڭىزدى بالالار ادەبيەتىمەن قامتاماسىز ەتۋ. بالالار ادەبيەتى ءتىزىمىن قالىپتاستىرۋ جانە ۇرپاقتىڭ كىتاپقا قۇشتارلىعىن وياتۋ. ايتا كەتەيىك، قازىرگى كۇنى مەكتەپتەردەگى بالالار ادەيبەتىنىڭ قورى 40 ميلليونعا جۋىق. ەلەكتروندىق مەملەكەتتىك كىتاپحانا قورىنىڭ كاتالوگىنا 150 جازۋشىنىڭ ەڭبەگى ەنگىزىلدى.
