الماتىلىق جاستار نەسيەنى جەڭىلدىكپەن قالاي الا الادى
بۇل تۋرالى وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتىندا «اگرارلىق كرەديتتىك كورپوراتسيا» ا ق نەسيەلەۋ ءبولىمىنىڭ باس مامانى قانات وماروۆ ايتتى، دەپ حابارلايدى قازاقپارات ءتىلشىسى.
سپيكەردىڭ سوزىنشە، نەگىزگى تالاپتاردىڭ ىشىندە ءوتىنىم بەرۋ ساتىندە جەكە كاسىپكەر رەتىندە تىركەلۋ مەرزىمى 5 جىلدان اسپاۋعا ءتيىس. 21-35 جاس ارالىعىنداعى جاس كاسىپكەرلەر مەن جۇمىسشى جاستار جەڭىلدەتىلگەن نەسيە الۋعا ۇمىتكەر بولا الادى.
«وسى باعدارلامامەن قازاقستان رەسپۋبليكاسى بويىنشا 28,9 ميلليارد تەڭگە ءبولىندى، ونىڭ ىشىندە الماتى جاستارى ءۇشىن 4,8 ميلليارد تەڭگە ءبولىندى. بۇل - مىڭعا جۋىق كاسىپكەر مەن جاستار. الماتى قالاسى بويىنشا 350 كاسىپكەر مەن جاستارعا كەڭەس بەرىلدى، 71 كاسىپكەر بويىنشا وتىنىمدەر قابىلداندى، ولاردىڭ تورتەۋى كوميسسيانىڭ قاراۋىنا جىبەرىلدى»، - دەدى قانات وماروۆ.
ايتۋىنشا، شاعىن نەسيە سوماسى مال شارۋاشىلىعى سالاسىنداعى جوبالار ءۇشىن - 7 جىلعا دەيىن، بيزنەستىڭ باسقا باعىتتارى ءۇشىن - 5 جىلعا دەيىن. نەسيە سوماسى - 5 ميلليون تەڭگە.
«شاعىن نەسيە مەرزىمىنىڭ ۇزاقتىعىنىڭ ۇشتەن بىرىنە دەيىنگى نەگىزگى بورىش پەن سىياقىنى وتەۋ بويىنشا جەڭىلدىكتى كەزەڭ كوزدەلگەن. كەپىلمەن قامتاماسىز ەتۋدىڭ بولۋى مىندەتتى شارت. كەپىلمەن قامتاماسىز ەتۋ تۇرىندە جىلجىمالى جانە جىلجىمايتىن مۇلىك قابىلدانادى. كەپىلمەن قامتاماسىز ەتۋ بولماعان جاعدايدا ءۇشىنشى تۇلعالاردى كەپىل بەرۋشى رەتىندە تارتۋعا بولادى (اتا-انالارى، تۋىستارى جانە تاعى باسقالارى)»، - دەدى ول.
نەسيەلەۋ بويىنشا شەشىمدى قالا اكىمدىگى جانىنان قۇرىلعان ارنايى كوميسسيا قابىلدايدى. كوميسسياعا قالالىق ءماسليحات دەپۋتاتتارى، مەملەكەتتىك ورگانداردىڭ، «اتامەكەن» كاسىپكەرلەر پالاتاسىنىڭ، بيزنەس-قوعامداستىق پەن باق وكىلدەرى كىرەدى.
قاجەتتى قۇجاتتار ءتىزىمى:
1. جەكە باسىن كۋالاندىراتىن قۇجات
2. جوبا بويىنشا بيزنەس- جوسپار
3. شوتتىڭ بولۋى تۋرالى قىزمەت كورسەتەتىن بانكتەن انىقتامالار
4. قارجى ۇيىمدارىنان (كرەديتتەر بولعان كەزدە) كرەديتتىك بەرەشەكتىڭ، ونىڭ ىشىندە مەرزىمى وتكەن بەرەشەكتىڭ بولۋى تۋرالى انىقتامالار
5. قاتىسۋشىنىڭ/ۇمىتكەردىڭ جالاقىسىن جانە (نەمەسە) وزگە دە تابىستارىن راستايتىن قۇجات (جيناقتاۋشى زەينەتاقى قورىنان ءۇزىندى كوشىرمە) بولعان كەزدە
6. كەپىلدى قامتاماسىز ەتۋ رەتىندە بەرىلەتىن مۇلىكتى باعالاۋ تۋرالى ەسەپ
7. كەپىل بەرۋشى جانە كەپىلمەن قامتاماسىز ەتۋ جونىندەگى قۇجاتتار.
قۇجاتتاردى «اگرارلىق نەسيە كورپوراتسياسى» ا ق (ساتبايەۆ كوشەسى، 5) فيليالىنا تاپسىرۋ قاجەت. شاعىن نەسيەلەر بويىنشا تولىق اقپاراتپەن كورپوراتسيا agrocredit.kz سايتىندا تانىسۋعا بولادى.
