اتوم ەلەكتر ستانسياسى سەكىلدى قىمبات جوباعا دايىنبىز با، اۋەلى سونى شەشىپ الايىق - سامۇرىق- قازىنا باسشىسى
«ا ە س بولا ما، جوق پا دەگەن شەشىم قابىلداۋ ءۇشىن كوپتەگەن فاكتورلاردى ەسكەرۋ كەرەك. وسى شەشىمدى قابىلداعاننان كەيىن قانداي وندىرۋشىمەن نەمەسە ساتۋشىمەن بىرىگىپ جۇمىس ىستەيتىنىمىزدى ايتا الامىز. بۇگىنگى تاڭدا ا ە س ورنالاساتىن جەرگە قاتىستى ماسەلە بار ەكەنىن كورىپ وتىرمىز. ورىن تاڭداعاندا سۋ بويىنشا، ەكولوگيا بويىنشا ءبىرقاتار تالاپ قويىلاتىنىن دا ءتۇسىنۋىمىز كەرەك. قازاقستاندا سۋ تاقىرىبى وتە وزەكتى بولىپ وتىر، ترانسشەكارالىق وزەندەر، بالقاش پەن كاسپي تارتىلىپ كەلەدى»، - دەدى نۇرلان جاقىپوۆ باسپا ءسوز ءماسليحاتىندا.
«سامۇرىق- قازىنا» باسشىسى اتوم ەلەكتر ستانسياسىنىڭ ارزانعا تۇسپەيتىنىن، ونىڭ قۇنى ونداعان ميلليارد دوللاردى قۇرايتىنىن اتاپ ءوتتى.
«بۇل اتوم ەلەكتر ستانسياسى ءوز قۇنىن اقتاۋ ءۇشىن تاريف قانداي بولۋى كەرەك؟ ءبىز مەملەكەت رەتىندە ونداي تاريفتى كوتەرە الامىز با؟ ءبارىمىز جارىق قولدانامىز، ۇيالى تەلەفوندارىمىزدى قۋاتتايمىز، ينتەرنەتكە كىرەمىز، تەلەديدار كورەمىز. ا ە س ورناتساق، ەلەكتر ەنەرگياسىنىڭ قۇنى قانداي بولادى؟ بارلىق فاكتورلاردى ەسكەرۋ قاجەت»، - دەيدى ول.
ن. جاقىپوۆ مۇنداي قىمبات جوباعا دايىنبىز با، اۋەلى سونى شەشۋ كەرەگىن ايتتى.
«ءيا، بىزدە ەنەرگيا تاپشىلىعى بار. ەگەر ا ە س سالساق، بۇل تاپشىلىق جابىلادى دەپ بولجانعان، ءبىراق قۇرىلىس شامامەن 10 جىلعا سوزىلادى، قوماقتى قاراجات كەتەدى. بۇل ەلەكتر ەنەرگياسىنا اقىنى كىم تولەيدى؟ ءبىز، ءبىزدىڭ بالالارىمىز... سوندىقتان بارلىق تۇرعىدا دۇرىس تالداۋ جۇرگىزۋ قاجەت»، - دەپ تولىقتىردى ول.
«سامۇرىق- قازىنا» باسشىسى اتاپ وتكەندەي، اتوم ەلەكتر ستانسياسىن سالۋ كەزىندەگى تالاپتاردىڭ ءبىرى - جاقسى ۇلكەن سۋ قويماسىنىڭ بولۋى.
«قازىر ەسەپتەردى وقىپ جاتىرمىن. قازىردىڭ وزىندە كاسپي مەن بالقاش تارتىلىپ جاتىر. ەگەر قازىر بىرەۋىن تاڭداپ، ا ە س تۇرعىزساق، 10 جىلدان كەيىن سۋ تاعى تارتىلۋى مۇمكىن. جەرگىلىكتى سيپاتتاعى سۇراقتار دا بار. كوپتەگەن ادامدار ا ە س قاسىندا تۇرعىسى كەلمەيدى»، - دەپ تولىقتىردى نۇرلان جاقىپوۆ.
