امەريكالىقتار اسىراپ العان قازاق قىزى ءبىر كەزدەرى ءوزى پانالاعان بالالار ۇيىنە كومەك بەردى
بالالار ءۇيىنىڭ تاربيەلەنۋشىسى ءسابينانىڭ (قازىرگى ەسىمى - سكايلار) نيەتى مەن سابيلەرگە سىيلاعان قۋانىشى بۇكىل ۇجىمنىڭ جۇرەگىن ەلجىرەتتى.
«9 اي قۇرساقتا كوتەرىپ تۋعان انا انا ما؟ تۋعانىنداي قاراپ، تاربيەلەپ جەتكىزگەن انا انا ما؟ بۇل سۇراقتىڭ جاۋابىن بۇگىن ءبىز تاپقانداي بولدىق. قالاي دەيسىز بە؟ بۇگىن بىزگە وسى بالالار ۇيىندە تاربيەلەنىپ، ءوز ەلىنەن جىراققا كەتكەن قىزىمىز كەلدى. ارادا قانشاما جىلدار وتسە دە، ەلىنە دەگەن ىستىق ماحابباتىن جۇدىرىقتاي جۇرەگىنە سالىپ، ساعىنىشپەن وسكەن ورتاسىنا كەلدى. ءسابينا (سكايلار) جاي عانا كەلمەي، دوستارىمەن بىرىگىپ، ەلىمە ءبىر پايدام تيسە ەكەن دەگەن نيەتپەن ءوزىنىڭ ەلگە دەگەن ماحابباتىن قايىرىمدىلىق جوباسىن ۇيىمداستىرۋ ارقىلى ءبىلدىردى. بۇل نيەتى ءبارىمىزدىڭ جۇرەگىمىزدى ەلجىرەتىپ، كوزىمىزدەن جاس اعىزدى» دەپ جازادى بالالار ءۇيىنىڭ باسپا ءسوز قىزمەتى Instagram پاراقشاسىندا.
ءسابينا دوستارىمەن بىرگە كيىم- كەشەك ساتىپ، قوماقتى كولەمدە اقشا جيناعان.
ول قاراجاتقا مۋزىكالىق اسپاپتار، ويىنشىقتار مەن بالانىڭ دامۋىنا ارنالعان زاتتار ساتىپ الىپ، بالالار ءۇيىنىڭ بۇلدىرشىندەرىنە سىيعا تارتتى.
«ادامنىڭ جاسى ەمەس، ەلىنە دەگەن ىستىق ىقىلاسى مەن ويى ادامدى كوپتەگەن جەتىستىكتەرگە جەتكىزەتىنىنىڭ دالەلى بولعانداي. جانە دە بۇل تەك ءسابينانىڭ ەڭبەگى ەمەس، ونى ايالاپ باققان، تۋعانىنان كەم ەتپەي وسىرگەن جانە تۋعان ەلىنە دە جەتكىزگەن اناسى سيۋزاننىڭ ەڭبەگى ەرەن. ءسابينانىڭ ۇياڭدىعى مەن سۇلۋلىعى، تاربيەسى مەن اسەمدىگى ءبىر- بىرىمەن ۇيلەسىم تاۋىپ، اناسىنىڭ ەسىمىن اسقاقتاتىپ، بەرگەن تاربيەسىن اقتاعانداي. وسىنشاما ۇلتجاندىلىققا، ماحابباتقا تولى ەڭبەكپەن تاربيەلەگەن اناسىنا مىڭ العىس. ءسابينانىڭ ارمانىن ورىنداۋعا كومەكتەسكەن دوستارىنا ريزاشىلىعىمىزدى بىلدىرەمىز» دەيدى بالالار ءۇيىنىڭ ۇجىمى.
