قۇمار ويىنداردى جارنامالاۋدا ەشقانداي ءتارتىپ جوق - اسحات ورالوۆ

بۇل تۋرالى مادەنيەت جانە سپورت ءمينيسترى اسحات ورالوۆ ويىن بيزنەسى ماسەلەلەرى بويىنشا وتكەن اپپاراتتىق كەڭەستە ايتتى، دەپ حابارلايدى قازاقپارات.

مادەنيەت جانە سپورت ءمينيسترى اسحات ورالوۆ ۆيتسە- مينيسترلەردىڭ، كوميتەت ءتوراعالارىنىڭ جانە م س م اپپارات باسشىسىنىڭ قاتىسۋىمەن اپپاراتتىق كەڭەس وتكىزدى. كۇن تارتىبىندەگى باستى تاقىرىپ - لۋدومانيامەن كۇرەس.

مادەنيەت جانە سپورت مينيسترلىگى جانىنان زاڭعا وزگەرىستەر ەنگىزۋ ءۇشىن جۇمىس توبى قۇرىلىپ، بەلسەندى جۇمىس اتقارىپ جاتىر. بۇگىنگى تاڭدا قالا كوشەلەرىنە قارايتىن بولساق، ەلوردادان باستاپ شالعايداعى اۋىلعا دەيىن ءاربىر كوشەدە بيلبوردتار، باننەرلەردە قۇمار ويىنداردىڭ جارناماسى تۇر. ەشقانداي ءتارتىپ جوق. سوندىقتان مۇنىڭ ءبارىن توقتاتۋىمىز كەرەك. كەرەك بولسا ارنايى بۇيرىقتارعا، زاڭعا دا وزگەرىستەر ەنگىزۋ قاجەت. بۇل ماسەلەنى شەشۋدى سوزباي، تەز ارادا شەشىم قابىلداۋىمىز ماڭىزدى. وسى باعىتتاعى جۇمىستى كۇشەيتۋىمىز كەرەك، - دەدى اسحات ورالوۆ.

مينيستر بۇگىنگى تاڭدا ەلىمىزدە بۋكمەكەرلىك كەڭسەلەردەگى جاعداي تۇزەلىپ كەلە جاتقانىن ايتتى. سوڭعى 2,5 جىلدا ولاردىڭ سانى 38 دەن 16 عا دەيىن ازايدى. قازىر 4 بۋكمەكەرلىك كەڭسەنىڭ ليتسەنزياسىنىڭ كۇشىن جويۋ بويىنشا جۇمىس ءجۇرىپ جاتىر. جىل باسىنان 5 ليتسەنزيا قايتارىپ الىندى.

ايتا كەتسەك، سەناتور امانگەلدى تولاميسوۆ پرەمەر- مينيستر ءاليحان سمايىلوۆتىڭ اتىنا جولداعان دەپۋتاتتىق ساۋالىندا بۋكمەكەرلىك كەڭسەلەر جارناماسىنىڭ كوبەيىپ كەتكەنى تۋرالى ماسەلە كوتەرگەن بولاتىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى