الماتى تۇرعىندارى موپەد جۇرگىزۋشىلەرىنىڭ ارەكەتىنە شاعىمداندى
ايتۋلارىنشا، ولار جاياۋ جۇرگىنشىلەر جولىمەن قاتتى جىلدامدىقپەن قوزعالادى، بۇل وتە قاۋىپتى، دەپ حابارلايدى قازاقپارات ءتىلشىسى.
«نەگە موپەدتەردىڭ جاياۋ جۇرگىنشىلەر جولىمەن جۇرۋىنە تىيىم سالا المايسىز؟ ارباتتا جۇرۋگە بولمايدى، ءبىراق مۇندا ولار بار جىلدامدىقپەن جۇرەدى. ءبىزدىڭ باراتىن جەرىمىز جوق. ءبىز ولاردان جولعا شىعۋىن سۇرايمىز، الايدا ولار ءمان بەرمەيدى. پوليتسەيلەر ەشتەڭە ىستەمەيدى»، - دەدى بوستاندىق اۋدانىنىڭ تۇرعىنى.
بۇل ساۋالعا جاۋاپ بەرگەن الماتى اكىمى ەربولات دوسايەۆ موپەد جۇرگىزۋشىلەرىن رەتتەۋ ءۇشىن زاڭنامالىق نورمالاردىڭ قابىلدانۋىنىڭ اياقتالۋىن كۇتۋ كەرەك دەپ جاۋاپ بەردى.
«ەلەكترساموكاتتاردىڭ قوزعالىسى زاڭ جۇزىندە رەتتەلدى. كەلەسى كەزەكتە موپەدشىلەر تۇر. بىزدە موپەدتەرگە، ەلەكترساموكاتتارعا جانە جالپى قوزعالتقىشى 50 تەكشە مەترگە دەيىنگى كولىكتەرگە قاتىستى كەلەسى وزگەرتۋلەر پاكەتى بار. ولار زاڭ جۇزىندە كولىك قۇرالى رەتىندە تانىلعان كەزدە ولارعا ايىپپۇل سالۋعا بولادى. ال اربات بويىندا - ءبىز وتۋگە تولىق تىيىم سالدىق. مەرزىمدى تۇردە المالى اۋدانىندا بولعانىمدا تۇندە كولىك جۇرگىزەدى دەگەن وتىنىشتەر تۇسەدى، سوعان وراي شارا قولدانامىز. بۇل ماسەلە بارلىعىن مازالايدى. موپەدپەن نەگىزىنەن ازىق-تۇلىك تاسيتىن جۇمىسشىلار جۇرەتىنىن بىلەسىزدەر. ولار جەتكىزۋدى، تاپسىرىستى ورىنداۋعا ۇلگەرۋ ءۇشىن كەز كەلگەن ءتارتىپتى بۇزۋعا دايىن»، - دەدى اكىم.
الماتى قالالىق پوليتسيا دەپارتامەنتىنىڭ باسشىسى ارىستانعاني زاپپاروۆ موپەد جۇرگىزۋشىلەرىمەن پروفيلاكتيكالىق جۇمىستار جۇرگىزىلىپ جاتقانىن ايتتى.
«ءبىز جەتكىزۋ قىزمەتىمەن بىرلەسە وتىرىپ، موپەد جۇرگىزۋشىلەرىنە شارا قولدانۋعا مۇمكىندىك بەرەتىن ارنايى باعدارلاما ازىرلەدىك. ەگەر ءبىزدىڭ قىزمەتكەرلەر ازىق- تۇلىكتى جەتكىزۋ بولىگىندە زاڭبۇزۋشىلىقتاردى انىقتاسا، اتاپ ايتقاندا، 3-تەن 5-كە دەيىن زاڭبۇزۋشىلىقتار بولسا، باعدارلاما بۇعاتتالادى، بۇل ولارعا ىقپال ەتۋدىڭ ءبىر ءتۇرى»، - دەدى پوليتسيا دەپارتامەنتىنىڭ باسشىسى.
ەربولات دوسايەۆتىڭ سوزىنشە، ماسەلەنى شەشۋدىڭ وڭتايلى جولى - زاڭدى شەكتەۋلەر ەنگىزۋ. كۇزگە دەيىن بۇل ماسەلە شەشىلەدى.
بۇعان دەيىن اربات ماڭىندا جينالىپ، تۇرعىنداردىڭ تىنىشتىعىن بۇزعان موپەد جۇرگىزۋشىلەرىنىڭ اكىمشىلىك جاۋاپقا تارتىلعانى تۋرالى جازعان ەدىك.
