دينارا زاكيەۆا بوكسشى بەيبىت شۇمەنوۆ تۋرالى: قىلمىستىق جاۋاپقا تارتۋ كەرەك
«ىشكى ىستەر مينيسترلىگىنە قىلمىستىق ارەكەت جاساعان تۇلعانىڭ جابىرلەنۋشىنىڭ قولىندا بولعان بالانىڭ ءومىرى مەن دەنساۋلىعىنا قاۋىپ توندىرگەنىن ەسكەرۋ قاجەتتىگى تۋرالى جۇگىندىم. بالاعا قاۋىپ ءتونۋ فاكتىسى الەۋمەتتىك جەلىلەردە جاريالانعان بەينەكادرلاردا انىق كورىنەدى»، - دەپ جازدى ۋاكىل Facebook پاراقشاسىندا.
سونداي-اق، ول ءوز لاۋازىمى اياسىندا ۇلتتىق زاڭناماعا بالا قاۋىپسىزدىگىمەن بايلانىستى وزگەرتۋلەر ەنگىزۋدى جوسپارلاپ وتىرعانىن ءمالىم ەتتى.
«بۇل جاعدايدا تۇلعانى قىلمىستىق كودەكستىڭ 115-بابى («قورقىتۋ») بويىنشا دا جاۋاپقا تارتۋ قاجەت دەپ ويلايمىن. قولدانىستاعى زاڭنامادا بالانىڭ قاۋىپسىزدىگى مەن دەنساۋلىعىنا قاۋىپ توندىرەتىن جاعداي تۋعىزۋ ارەكەتىنە جاۋاپكەرشىلىك كوزدەيتىن باپ جوق. بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا زاڭناماعا دايىندالعان وزگەرىستەر بلوگىنا ءتيىستى ۇسىنىس ەنگىزەمىن. جالپى، ءبىز، ەرەسەكتەر، كەز-كەلگەن جاعدايدا بالالار تۋرالى ويلاۋىمىز كەرەك»، - دەپ جازدى دينارا زاكيەۆا.
