اتىراۋداعى «شاڭىراق» بالالار اۋىلىنىڭ ەكى تاربيەشىسى تاربيەلەنۋشىلەردى ۇرعان
وتكەن اپتادا بالا قۇقىقتارى جونىندەگى ۋاكىل دينارا زاكيەۆا «شاڭىراق» بالالار اۋىلىنداعى احۋالمەن تانىسىپ، تاربيەلەنۋشىلەرمەن كەزدەسكەن.
«اتىراۋ قالاسىنداعى «شاڭىراق» بالالار ۇيىندە تۇراتىن بالالارمەن كەزدەسىپ، اڭگىمەلەستىك. بالالار اراسىندا ءانونيمدى ساۋالناما جۇرگىزدىم. ارقايسىسىمەن سويلەسىپ شىقتىم، بەينەكامەرالاردىڭ جازبالارىن زەرتتەدىم. ناتيجەسىندە ەكى تاربيەشىنىڭ قول كوتەرۋى، بالالار اس ۇيدە ۋاقىتتىڭ باسىم بولىگىن انا- تاربيەشىنىڭ قاتىسۋىنسىز وتكىزگەن، كەيبىر تاربيەلەنۋشى بالالاردىڭ اراسىنداعى كونفليكتىلەر، ۇيدە بوتەن ەرەسەك ادامنىڭ بولۋى، بەينەكامەرالار جازبالارىنىڭ ساقتالۋى مەن مەرزىمى سەكىلدى كەمشىلىكتەر انىقتالدى. وسىعان بايلانىستى تەكسەرۋ جانە ودان ءارى شارالار قابىلداۋى ءۇشىن وبلىس اكىمىنىڭ ورىنباسارىنا اقپارات بەردىم. ەندى باس پروكۋراتۋراعا جىبەرەمىن»، - دەيدى دينارا زاكيەۆا الەۋمەتتىك جەلىدەگى پاراقشاسىندا.
ونىڭ ايتۋىنشا، بالالار كىم بولعىسى كەلەتىنى جايلى ايتىپ، كوكەيدەگى ۋايىمدارىمەن بولىسكەن. ۋاكىلدىڭ ءنومىرىن جازىپ الىپ، حات الماسىپ تۇرۋعا كەلىسكەن.
«بالالار ۇيىندە جانە ودان كەيىن اكىمدىكتە وبلىستىڭ قوعام بەلسەندىلەرىمەن، ۇ ە ۇ كەزدەستىك. قوعام وكىلدەرىنىڭ پىكىرلەرى مەن كوزقاراسى ءار ءتۇرلى ەكەنىنە قاراماستان، ءبارىنىڭ ماقساتى ءبىر - بالالاردىڭ ءال- اۋقاتى مەن قاۋىپسىزدىگى جانە ولاردى مانيپۋلياتسيادان، ەرەسەكتەر اراسىنداعى كيكىلجىڭنەن قورعاۋ. ءقازىر ەڭ باستىسى - تەكسەرىستىڭ وبەكتيۆتىلىگى، بالالاردىڭ مۇددەلەرىن قورعاۋدى قامتاماسىز ەتۋ ماقساتىندا زاڭعا سايكەس شارالار قابىلداۋ. سونىمەن قاتار، جاقىندا بالالار ءۇيىنىڭ ديرەكتورلىعىنا بايقاۋ جاريالانادى، كامەرالار سانى كوبەيتىلىپ، ولاردى ۇنەمى باقىلاۋ جۇرگىزىپ وتىرۋ ءۇشىن ءبىلىم باسقارماسىنا قوسادى»، - دەيدى دينارا زاكيەۆا.
ەسكە سالا كەتەلىك، بۇعان دەيىن اتىراۋدا بالالار اۋىلىنىڭ ديرەكتورى جۇمىسىنان شەتتەتىلگەن ەدى.
كەيىن وبلىس اكىمىنىڭ ورىنباسارى جاسۇلان بيسەمبيەۆ بالالار اۋىلىنداعى جايتقا وراي پىكىر بىلدىرگەن بولاتىن.
