يزرايل دارىگەرلەرى الەمگە قاۋىپ ءتوندىرىپ تۇرعان دەرت تۋرالى الاڭدايدى
ماماندار كەۋلەگەن ىندەتتەن ارىلۋدىڭ جولى بارىن ايتادى. ادەتتە ناۋقاس ءوز بويىندا وبىردىڭ بارىن بىلگەندە ايىقپاس دەرتكە شالدىقتىم دەپ ويلايدى. ءبىراق قازىرگى مەديتسينا ونكولوگيالىق اۋرۋلارمەن كۇرەستە ەداۋىر جەتىستىككە جەتكەن. قاتەرلى ىسىكتىڭ كوپ ءتۇرىن ەمدەي الادى. ال يزرايلدىك مامانداردى بۇدان كورى الەمدە ميلليونداعان جانعا قاۋىپ ءتوندىرىپ تۇرعان مەتابوليزمدىك سيندروم ماسەلەسى الاڭداتادى.
يۋري رانكوۆ، مەديتسينالىق ورتالىقتىڭ ديرەكتورى:
- بۇل كەساپات ادام اعزاسىندا ليپيدتەردىڭ، ياعني مايعا ۇقساس ورگانيكالىق زاتتاردىڭ الماسۋىنىڭ بۇلىنۋىنە اكەلەدى. سالدارىنان ينسۋلت، ينفاركت، قانت ديابەتى سىندى اۋرۋلار پايدا بولادى. كەلەشەكتە بۇل قاۋىپتى دەرتتەردىڭ كوبەيۋىنە اكەلەتىن باستى سەبەپتەردىڭ بىرىنە اينالۋى دا مۇمكىن.
مەتابوليزمدىك سيندروم تۋعىزاتىن باستى جايت - سالاۋاتتى ءومىر سالتىن ۇستانباۋ. كەڭسە جۇمىسى، دۇرىس تاماقتانباۋ، سەمىزدىك، ىشىمدىككە سالىنۋ، تەمەكى شەگۋ. اعزادا قاۋىپتى پروتسەستى ورشىتەتىن نەگىزگى فاكتورلار وسىلار. ءبىراق مۇنىڭ ءبارى باياۋ جۇرەتىن ۇدەرىس بولعاندىقتان ادامدار اسا ءمان بەرمەيدى.
يۋري رانكوۆ، مەديتسينالىق ورتالىقتىڭ ديرەكتورى:
- ناۋقاستار مۇنداي كەسەلدەن فيزيكالىق بەلسەندىكلىكتى ارتتىرىپ، دۇرىس تاماقتانۋ ارقىلى ارىلۋعا بولاتىنىن بىلگەندە تاڭدانىسىن جاسىرمايدى. ياعني ازاماتتار وسى ءبىر ەكى ماسەلەگە ءمان بەرىپ، قاۋىپتى اۋرۋلاردىڭ الدىن الۋعا بولاتىنىن بىلمەيدى. مىسالى، قاراپايىم ادامدارعا قاراعاندا مەملەكەتتىك قىزمەتكەرلەردە بۇل سيندروم 25 پايىزعا كوبىرەك كەزدەسەدى.
قازىر بۇل ماسەلە الەم ەلدەرىنىڭ بارىندە وزەكتى. ايتالىق ەۋروپادا 60 ميلليون ازاماتتىڭ وسىنداي دەرتكە شالدىعۋ قاۋپى بار. قۇراما شتاتتاردا بۇل كورسەتكىش 34 پايىزعا تەڭ. اسىرەسە، بۇل اۋرۋ ءتۇرى جاسى 55-تەن اسقان تۇرعىندار اراسىندا ءجيى كەزدەسەدى. ال يزرايلدە قاۋىپتى ۇدەرىس ءبىرشاما باسەڭدەپ، 30-دان 26 پايىزعا تومەندەگەن.
www.24.kz
