لاۋازىمدى قىزمەتكەرلەرىمىزدىڭ ۇيىمداسقان قىلمىستىق توپقا قاتىسى جوق - قورعانىس مينيسترلىگى
«قازاقستان رەسپۋبليكاسىنىڭ سىبايلاس جەمقورلىققا قارسى ءىس- قيمىل اگەنتتىگى جۇرگىزگەن سوتقا دەيىنگى تەرگەپ- تەكسەرۋ ناتيجەلەرى بويىنشا قورعانىس مينيسترلىگىنىڭ لاۋازىمدى ادامدارىنىڭ ۇيىمداسقان قىلمىستىق توپقا قاتىسى جوق ەكەنى انىقتالعانىن مالىمدەيمىز.
قازىر قىلمىستىق جاۋاپكەرشىلىككە تارتىلعان لاۋازىمدى تۇلعالاردىڭ قۇقىققا قايشى ارەكەتتەرىنىڭ سالدارىنان «اسكەري قۇرىلىس» ا ق- نىڭ قارجىلىق جاعدايى ايتارلىقتاي تومەندەدى، وسىعان بايلانىستى كرەديتورلىق بەرەشەگى بولدى.
كەز كەلگەن سىبايلاس جەمقورلىق فاكتىلەرىن بولدىرماۋ ماقساتىندا قورعانىس مينيسترلىگى ءبىرقاتار قاتاڭ شارا قابىلدادى. اتاپ ايتساق، «اسكەري قۇرىلىس» ا ق باسشىلىعى تولىق اۋىستىرىلدى، جالپى ۆەدومستۆولىق باعىنىستى ۇيىمنىڭ قىزمەتىنە باقىلاۋ كۇشەيتىلدى.
بۇل زاڭسىز ارەكەتتەردى 2019-2020 -جىلدار ارالىعىندا اكسيونەرلىك قوعامنىڭ لاۋازىمدى تۇلعالارى جاساعانىن ايتا كەتۋ كەرەك.
بارلىق زاڭبۇزۋشىلىقتار بويىنشا جەدەل اقپاراتتاندىرۋ مەن تەرگەۋ ءىس- شارالارى سىبايلاس جەمقورلىق قىلمىستارمەن كۇرەس جونىندەگى باعدارلامانى ىسكە اسىرۋ اياسىندا قر قورعانىس مينيسترلىگىنىڭ قازىرگى باسشىلىعىنىڭ باستاماسىمەن قولعا الىندى.
2022 -جىلدىڭ باسىنان باستاپ «اسكەري قۇرىلىس» ا ق قىزمەتىن رەفورمالاۋ جانە كرەديتورلىق بەرەشەكتى وتەۋ جۇمىستارى جۇرگىزىلىپ جاتىر.
بۇگىنگى تاڭدا 100-دەن اسا كومپانيا مەدياتيۆتىك كەلىسىمدەرگە قول قويدى.
كاسىپكەرلەر الدىنداعى كرەديتورلىق بەرەشەكتىڭ نەگىزگى بولىگىن 2023 -جىلدىڭ سوڭىنا دەيىن مىندەتتى تۇردە وتەۋ جوسپارلانىپ وتىر»، - دەلىنگەن رەسمي مالىمدەمەدە.
بۇعان دەيىن حابارلاعانىمىزداي، «اسكەري قۇرىلىس» ا ق باسشىسى تۋىسقاندارىمەن بىرگە 596 ميلليون تەڭگە جىمقىردى دەپ ايىپتالدى.
سىبايلاس جەمقورلىققا قارسى ءىس- قيمىل اگەنتتىگى «اسكەري قۇرىلىس» اكسيونەرلىك قوعامىنان قارجى جىمقىرۋ ارەكەتى بويىنشا قىلمىستىق ءىس بويىنشا تەرگەۋدى وتكەن جىلى باستاعان.
