ۇلتتىق بانك الاياقتىقتىڭ جاڭا سحەمالارى تۋرالى ەسكەرتتى
ۇلتتىق بانك ينۆەستيتسيالىق قىزمەتپەن جانە فيشينگتىك شابۋىلدارمەن بايلانىستى الاياقتىق سحەمالاردىڭ كوبەيىپ كەلە جاتقاندىعى تۋرالى ەسكەرتەدى. الاياقتار قارجىلىق دامۋدىڭ جالعان باعدارلامالارىن، سونداي-اق بيرجالىق ساۋدادا تەز اقشا تابۋدىڭ قاراپايىم تاسىلدەرىن سيپاتتايتىن جارناما روليكتەرى بار سايتتار مەن ۇيالى قوسىمشالاردى ىسكە قوسادى. مۇنداي الاياقتىق سايتتاردا بەلگىلى تۇلعالاردان، اتاپ ايتقاندا وزدەرىن ۇلتتىق بانكتىڭ «قىزمەتكەرلەرىمىز» دەپ تانىستىراتىن قارجى ۇيىمدارىنىڭ ماماندارى تاراپىنان جالعان اقپارات، قولدان جاسالعان ليتسەنزيالار مەن باسقا دا قۇجاتتار ۇسىنىلۋى مۇمكىن. تاعى باسقا الاياقتار توپتارى فيشينگتىك شابۋىلدار بويىنشا جاسىرىن دەرەكتەردى زاڭسىز جيناۋمەن اينالىسادى.
وسىعان بايلانىستى، ۇلتتىق بانك قر ازاماتتارىن وزدەرىن ۇلتتىق بانكتىڭ وكىلدەرىمىز نەمەسە قۇقىق قورعاۋ ورگاندارىنىڭ قىزمەتكەرلەرىمىز دەپ اتايتىن ادامداردان كۇماندى قوڭىراۋ نەمەسە ەلەكتروندىق حاتتار قابىلداعان كەزدە اباي بولۋعا شاقىرادى.
«وسى ورايدا ۇلتتىق بانك تەلەفون نەمەسە ەلەكتروندىق پوشتا ارقىلى ازاماتتاردىڭ جەكە مالىمەتتەرىن سۇرامايتىنىن ەسكە سالامىز. سوندىقتان اقپاراتتىڭ شىنايىلىعىنا كوز جەتكىزبەي دەربەس دەرەكتەرىڭىزدى بوگدە ادامدارعا ەشقاشان بەرمەڭىز. جوعارىدا ايتىلعانداردى ەسكەرە وتىرىپ، ۇلتتىق بانك ينۆەستيتسيا ارقىلى جىلدام تابىس تابۋ جونىندەگى اقپاراتتى قامتيتىن سايتتاردا الاياقتىق ارەكەتتىڭ ايقىن بەلگىلەرى بار ەكەنىن جەتكىزەدى. سەبەبى:
ۇلتتىق بانك جەكە تۇلعالاردىڭ شوتتارىنا قىزمەت كورسەتپەيدى، اقشالاي ەسەپ ايىرىسۋلار مەن مامىلەلەر جۇرگىزبەيدى؛
ۇلتتىق بانك مەملەكەتتىك قورلاردان تابىس تابۋ ءۇشىن قانداي دا ءبىر پلاتفورمالاردى ازىرلەۋگە قاتىسپايدى؛
الاياقتىق رەسۋرستار قىسقا ۋاقىت ىشىندە جوعارى پايداعا جالعان كەپىلدىك بەرەتىن اقپاراتتى قامتيدى، سونداي-اق بايلانىس قۇرالدارى كورسەتىلمەيدى؛
الاياقتار بەيرەسمي نومىرلەردەن بەلسەندى تۇردە قوڭىراۋ شالىپ، جالعان قۇقىق بەلگىلەيتىن قۇجاتتاردى ۇسىنادى؛
ءىس جۇزىندە اكتيۆتەردى ينۆەستيتسيالىق باسقارۋعا ليتسەنزياسى بار ۇيىمداردىڭ تىزبەسى قازاقستان رەسپۋبليكاسى قارجى نارىعىن رەتتەۋ جانە دامىتۋ اگەنتتىگىنىڭ رەسمي سايتىندا جاريالانعان»، - دەپ جازدى ۆەدومستۆودان.
سونىمەن قاتار، ۇلتتىق بانك ۇيالى قوسىمشالاردى ورناتپاۋدى، دەربەس دەرەكتەرىڭىزدى جاريا ەتپەۋدى، ۇيالى تەلەفونعا قاشىقتان قول جەتكىزۋدى ۇسىنباۋدى جانە تەلەفون ارقىلى سويلەسۋ بارىسىندا الىنعان نۇسقاۋلار بويىنشا اقشالاي قاراجاتتى ءۇشىنشى تۇلعالاردىڭ شوتتارىنا اۋدارماۋدى وتىنەدى.
