اڭىز فۋتبولشى سەيىلدا بايشاقوۆ جايىندا نە بىلەمىز

وتكەن عاسىردىڭ 60-80 -جىلدارىندا قازاقستاندىق كلۋبتاردا دوپ تەپكەن فۋتبولشىنىڭ شەبەرلىگىن جانكۇيەرلەر جوعارى باعالايدى. قازاقپارات ءتىلشىسى سەيىلدا بايشاقوۆتىڭ ءومىر جولىنا ءۇڭىلىپ، ەستە قالارلىق دەرەكتەرگە كوز سالىپ كورگەن ەدى.

سەيىلدا بايشاقوۆ 1950 -جىلى 28-تامىزدا سول كەزدەگى جامبىل قالاسىندا دۇنيەگە كەلگەن.

جاستايىنان فۋتبولعا قۇمار بولىپ وسكەن ول جەرگىلىكتى باپكەرلەردەن ءتالىم الدى. العاشقى جاتتىقتىرۋشىسى ەۆگەني پەتروۆيچ روتت بولاتىن.

فۋتبولشىلىق جولىندا ورتالىق قورعاۋشى پوزيتسياسىندا وينادى. 1966-1967 -جىلداردا جامبىلدىڭ «قايرات»، 1968-1970 -جىلداردا «ەنەرگەتيك» كلۋبتارىندا دوپ تەپتى.

1969 -جىلى سەيىلدا بايشاقوۆ قازاق ك س ر ۇلتتىق قۇراماسىنا شاقىرتۋ الدى. سول كەزەڭدەگى قۇرامانىڭ باس باپكەرى بوريس كارەتنيكوۆ ەلىمىزدىڭ ءار ايماعىنان ەڭ جاقسى فۋتبولشىلاردى جينادى.

سەيىلدا بايشاقوۆ ءومىرىن فۋتبولعا ارنادى. 1971-1981 -جىلدار ارالىعىندا الماتىلىق «قايراتتىڭ» نامىسىن قورعادى.

1971 -جىلى كوماندا قۇرامىندا تەمىرجولشىلاردىڭ حالىقارالىق سپورت وداعىنىڭ كۋبوگىن جەڭىپ الدى.

«قايراتتاعى» العاشقى ويىنىن 1971 -جىلدىڭ 27-ناۋرىزىندا ۆوروشيلوۆگراد قالاسىندا جەرگىلىكتى «زاريا» كومانداسىنا قارسى وتكىزدى.

جاتتىقتىرۋشىلار شتابى 20 جاستاعى قورعاۋشىعا سەنىم ارتتى. كەزدەسۋدە ەسەپ اشىلمادى. جاس قورعاۋشى ءۇشىن جاقسى بۇل ۇلكەن تاجىريبە مەكتەبى بولدى.

كەلەسى تۋردا الماتىلىق ۇجىم لەنينگرادتىڭ «زەنيت» كومانداسىن 3:1 ەسەبىمەن تىزە بۇكتىردى.

جاس فۋتبولشى كوماندانىڭ تۇراقتى ويىنشىسىنا اينالىپ، وداق باسپا ءسوزىنىڭ نازارىن وزىنە اۋدارتتى.

1977 -جىلى ك س ر و ۇلتتىق قۇراماسىنا شاقىرتۋ الدى. 1978 -جىلعى FIFA الەم كۋبوگىنىڭ قۇراما ساپىندا ەكى كەزدەسۋدە الاڭعا شىقتى.

تۇڭعىش ويىنىن 30-ساۋىردە ۆەنگرياعا قارسى وتكىزدى.

«ءبىرىنشى تايمنىڭ اياعىنا دەيىن دەرلىك ءبىز ۆەنگرلەردىڭ تىقسىرۋىنا توتەپ بەرە الدىق. ءبىراق ۇزىلىسكە شىعار كەزدە الاڭ يەلەرى ەسەپ اشتى. ولاردىڭ كەزەكتى شابۋىلىنىڭ بىرىندە الىستان تەپكەن دوپقا قارسى اتىلعان ۆلاديمير استاپوۆسكي ءسال-ءپال جاڭىلىسىپ، قاعىپ جىبەرە الماي قالدى. دوپقا ساۋساعىنىڭ ۇشى عانا ءتيدى. ال تيبور نيلاشي تۋرا سول جەردەن تابىلدى. ەكىنشى تايمدا ۆەنگرلەر تاعى دا ءبىر سوعىپ كەتتى. ءبىز قارسى شابۋىل ۇيىمداستىرۋعا تىرىستىق، ءبىراق سولاردىڭ بىرەۋىندە عانا ءوز دەگەنىمىزگە جەتتىك»، - دەگەن ەدى ارداگەر فۋتبولشى ويىن جايىندا.

ودان كەيىن سەيىلدا بايشاقوۆ گرەكيا قۇراماسىمەن ويىندا جاسىل الاڭعا شىقتى.

ەكى كەزدەسۋدە دە ول 90 مينۋتتى تولىق وينادى. 1972 -جىلى وعان «ك س ر و سپورت شەبەرى» اتاعى بەرىلدى.

1982-1988 -جىلدارى الماتىلىق «قايراتتا» باپكەر قىزمەتىن اتقارسا، ودان كەيىن سكيف، رۆشسم كلۋبتارىندا جەمىستى ەڭبەك ەتتى.

2007 -جىلدان بەرى قازاقستان فۋتبول فەدەراتسياسى ۆيتسە-پرەزيدەنتى بولسا، ودان كەيىن فەدەراتسيا باسشىلىعى تىزگىنىن ۇستادى.

كەيىنگى جىلداردا ق ر ارداگەرلەر فۋتبولى وداعىنىڭ پرەزيدەنتى، قازاقستان فۋتبول فەدەراتسياسى پرەزيدەنتىنىڭ كەڭەسشىسى بولدى.

ايتا كەتەيىك، مەملەكەت باسشىسى 72 جاسىندا دۇنيەدەن وتكەن سپورت ارداگەرى سەيىلدا بايشاقوۆتىڭ وتباسى مەن جاقىندارىنا كوڭىل ايتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى