اتىراۋدا بالالار ۇيىنەن تاعى داۋ شىقتى: تاربيەلەنۋشىلەرگە ۋنيتازداعى سۋدى ماجبۇرلەپ ىشكىزگەن
بيىل «شاڭىراق» بالالار اۋىلىنا قاتىستى ءالسىن-ءالسىن داۋ تۋىنداپ تۇر. ەندى مۇندا بالالاردى دارەتحانا سۋىن ىشۋگە ماجبۇرلەگەنى تۋرالى اقپارات تارادى.
الەۋمەتتىك جەلىدە وسى جايلى ۆيدەو تارادى.
«اتىراۋ قالالىق پوليتسيا باسقارماسىنىڭ قىزمەتكەرلەرى «شاڭىراق» بالالار اۋىلىنا قاتىستى جاريالانعان دەرەك بويىنشا ق ر قىلمىستىق كودەكسىنىڭ 140-بابىنىڭ 2-بولىگىمەن (كامەلەتكە تولماعان ادامدى تاربيەلەۋ جونىندەگى مىندەتتەردى ورىنداماۋ) تەرگەۋ امالدارى جۇرگىزىلىپ جاتىر. وزگە اقپارات ق ر قىلمىستىق- پروتسەستىك كودەكسىنىڭ 201-بابىنا سايكەس جاريالانبايدى»، - دەپ ءمالىم ەتتى وبلىستىق پوليتسيا دەپارتامەنتىنىڭ باسپا ءسوز قىزمەتىنەن.
ەسكە سالا كەتەلىك، بۇعان دەيىن اتىراۋدا بالالار اۋىلىنىڭ ديرەكتورى جۇمىسىنان شەتتەتىلگەن ەدى.
اتىراۋ وبلىستىق ءبىلىم باسقارماسى باسشىسىنىڭ بۇيرىعىمەن وتباسىلىق ۇلگىدەگى «شاڭىراق» بالالار اۋىلىنىڭ ديرەكتورى گۇلسارا بوتاتايەۆا اتقاراتىن قىزمەتىنەن تەرگەۋ جۇرگىزۋ كەزىندە ۋاقىتشا شەتتەتىلگەن.
ال، جاقىندا الەۋمەتتىك جەلىدە نۇرداۋلەت ەسىمدى بالاعا قاتىستى ۆيدەو جۇكتەلدى.
وسىعان بايلانىستى وبلىس اكىمىنىڭ ورىنباسارى جاسۇلان بيسەمبيەۆ پىكىر ءبىلدىردى.
اتىراۋ وبلىسى اكىمىنىڭ ورىنباسارى جاسۇلان بيسەمبيەۆتىڭ ايتۋىنشا، قازاقستان پرەزيدەنتى جانىنداعى بالا قۇقىقتارىن قورعاۋ جونىندەگى ۋاكىل دينارا زاكيەۆامەن بىرگە وتباسى ۇلگىسىندەگى «شاڭىراق» بالالار اۋىلىنداعى جاعداي زەردەلەنگەن.
«تۇيگەن ويىم - سوڭعى كەزدە الەۋمەتتىك جەلىدە تالقىلانىپ جاتقان جايتتار ۇجىمدا بۇرىن قىزمەت ەتىپ كەتكەن جۇمىسشى مەن بۇرىنعى باسشى اراسىنداعى كەلىسپەۋشىلىكتىڭ ناتيجەسى. سونىڭ سالدارىنان بالالار زارداپ شەگىپ وتىر. جەلىدە جاريالانعان ءتۇرلى جازبالاردان ەكى تاراپ ءوزىن اقتاپ الۋعا تىرىسىپ جاتقانىن كورۋگە بولادى. بالانى وزىنە تارتىپ، ءتۇرلى ۆيدەو تاراتۋدىڭ ارتىندا بالانىڭ قۇقىعىن شەكتەۋ ماسەلەسى تۇر. مۇنداعى بالالار - مەملەكەتتىڭ ەرەكشە قورعاۋىنداعى بالالار. سوندىقتان بالالاردىڭ قۇقىعىن قورعاۋعا ارنالعان بارلىق شارا قابىلداناتىن بولادى. وعان قوسا، الەۋمەتتىك جەلىدە تاراعان جايتتار بالالاردىڭ وزدەرىن قاتتى الاڭداتىپ، بولاشاعىنا كەرى اسەرى تيەتىنىن ويلاپ وتىرعانىن بايقادىم»، - دەپ حابارلادى جاسۇلان بيسەمبيەۆ.
