تاراز كافەسىندە شوشقا ەتى دەپ ءيتتىڭ ەتىن ۇسىنعان
تاراز قالاسى قولباسشى قويگەلدى كوشەسى №283-مەكەنجايدا ورنالاسقان «انترەكوت» كافەسىنىڭ بۇقتىرىلعان شوشقا قابىرعالارىنان سىناما العان وبلىستىق سانيتارلىق-ەپيدەميولوگيالىق باقىلاۋ دەپارتامەنتىنىڭ ماماندارى استىڭ ءيتتىڭ ەتىنەن دايىندالعانىن انىقتاعان.
دەپۋتات سەرگەي سنيگيريەۆتىڭ ايتۋىنشا، جوسپاردان تىس تەكسەرۋ ناتيجەلەرى بويىنشا انىقتالعان اكىمشىلىك قۇقىق بۇزۋشىلىقتار تۋرالى حاتتامالار جاسالىپ، كافە ەگەسىنە ايىپپۇل سالىنىپ، كەمشىلىكتى جويۋ تۋرالى سانيتارلىق نۇسقاما بەرىلگەن. سونداي-اق، تاراز قالالىق پوليتسيا باسقارماسىنا حاتتار جىبەرىلگەن.
اتالعان وقيعادان سوڭ «زاريا»، «سۋشي لاۆ»، «ديرد» كافەلەرى دە سانيتارلىق-ەپيدەميولوگيالىق باقىلاۋ دەپارتامەنتى ماماندارىمەن تەكسەرىلىپ، ولار جانۋارلاردىڭ د ن ق-سىنا دايىن ءونىم مەن شيكىزاتتىڭ 20 سىناماسىن الدى.
ايتا كەتەيىك، بۇعان دەيىن تارازدا ەسىرتكى وندىرەتىن فيتولابوراتوريا انىقتالعانىن حابارلاعان بولاتىنبىز. كۇدىكتى رەتىندە رەسەي فەدەراتسياسىنىڭ 61 جاستاعى ازاماتىنىڭ تۇرعىلىقتى مەكەنجايىنا ءتىنتۋ شارالارى جۇرگىزىلگەن.
تەكسەرۋ بارىسىندا باقشادا كولىك شيناسىنان 4 كاننابيس بۇتاسى تابىلادى. سونداي-اق، قىزمەتكەرلەر فيتولابوراتورياعا اينالدىرىلعان مونشانى انىقتايدى. وندا 2 كاننابيس بۇتاسى تابىلعان. مۇنىمەن قوسا، ءۇيدىڭ ءار جەرىنەن كەپتىرىلگەن ماريحۋانا ەسىرتكى زاتتارى تابىلادى.
