بەيبىت شۇمەنوۆ ءدامحاناداعى وقيعانىڭ قالاي بولعانىن ايتىپ بەردى
كاسىپقوي بوكسشى بەيبىت شۇمەنوۆ استاناداعى ويىن- ساۋىق ورتالىقتارىنىڭ بىرىندە بولعان وقيعاعا قاتىستى TengriSport سايتىنا سۇحبات بەردى.
سپورتشىنىڭ قولىندا بالاسى بار ەر ادامدى سوققىعا جىققان ۆيدەوسى جەلىدە تاراپ، قولدانۋشىلاردىڭ نارازىلىعىن تۋدىرعان ەدى. ال ول وقيعا قالاي باستالعانى جايلى بوكسشىنىڭ ءوزى باسقاشا باياندايدى. قازىرگى تاڭدا وسى ىسكە قاتىستى جابىرلەنۋشى ارىز جازعان. استانا پوليتسيا دەپارتامەنتى قىلمىستىق كودەكستىڭ 293-بابى «بۇزاقىلىق» بويىنشا تەرگەۋ جۇرگىزىلىپ جاتقان تۋرالى حابارلادى.
39 جاستاعى سپورتشى وقيعا بالالاردىڭ كەلىسپەي قالۋىنان جانە اكەسىنىڭ دورەكى جاۋاپ قاتۋىنان باستالعانىن بايانداعان.
- مەن ۇلىمدى قازاقستانعا الىپ كەلگەنمىن، ول - ا ق ش ازاماتى. ول وتانىنا كەلىپ، وسىندا قىدىرىپ قايتسا دەپ كەلگەنبىز. ءبىز Mega Silkway ويىن-ساۋىق ورتالىعىنا باردىق، ول Happylon-دا ويناعاندى ۇناتادى. ودان كەيىن ەكىنشى قاباتىنا كوتەرىلىپ، تاماقتانىپ الماق بولدىق. وندا بالالار وينايتىن جەرى بولدى.
بالام ويناۋعا كەتكەن، ازدان سوڭ ونى بىرەۋ ۇرعانىن ايتىپ شاعىمدانىپ كەلدى. ءبىر بالا ارقاسىنان ۇرىپ، اياعىنان سۇيرەگەن. مەنىڭ ۇلىم ەشتەڭە تۇسىنبەگەن، امەريكادا مۇندايدى مۇلدە كورمەگەن. ونىڭ جاسى 8 دە، ءبىز ونىمەن دوسى سەكىلدى سويلەسەمىز. وعان ەشقاشان داۋىس كوتەرمەگەنبىز، سوندىقتان دا قاتتى قورىققان بولار.
ازدان سوڭ ول بالا قايتا كەلىپ ۇلىمدى باسىنان ۇرا باستاعان، قاشىپ ۇلگەرگەن. ودان كەيىن ۇلىم ونى اكەسى الىپ كەتكەنىن ايتتى. ال ونىڭ جانىندا تاعى ءبىر كىشكەنتاي بالاسى بولدى، - دەيدى بەيبىت شۇمەنوۆ.
سپورتشىنىڭ ايتۋىنشا، پىشاق الىپ ۇمتىلعاننان كەيىن بارىپ اشۋعا بۋلىققان. ال وعان دەيىن دورەكى جاۋاپ قاتقانى شامىنا تيگەن.
- مەن وعان كەلىپ، سەنىڭ بالاڭ با ۇرعان دەپ سۇرادىم. ال ول «ءيا، نە ىستەي الاسىڭ؟» دەدى. مەن مۇندايدى كۇتپەدىم. وعان جاقىنداپ «نە ايتىپ تۇرعانىڭدى بىلەسىڭ بە؟» دەگەندە، ول قولىنا ىلىنگەن زاتپەن ۇمتىلدى. كەيىننەن قولىنداعى پىشاق ەمەس ەكەنىن ۇعىنىپ، اۋىستىرىپ قايتا ۇرۋعا تىرىستى.
ماعان «ونىڭ قولىندا پىشاق بار» دەپ ايقايلادى. ول كىشكەنتاي بالانى تاستاماي، قورعانۋ ءۇشىن پايدالاندى. مەن ونى ارتىنان ۇستاپ، كىشكەنتايىن قولىنان بوساتتىرۋعا تىرىستىم. ول بالانى جىبەرگەن جوق، قايتا ونى قالقان رەتىندە پايدالاندى. قانداي اكە مۇنداي قادامعا بارادى؟ ەگەر مەنىڭ وتباسىمدا سونداي جاعداي بولسا، ولاردى قورعاعان بولار ەدىم. ۆيدەودا ءبارى كورىنىپ تۇر. پىشاقتى كورىپ، ونى قولىنان الىپ تاستاۋعا تىرىستىم. پوليتسيا كەلىپ، ءبىز سوسىن بولىمشەگە باردىق دەيدى بوكسشى.
39 جاستاعى سپورتشى پوليتسيامەن بولعان ديالوگ تۋرالى ايتىپ، وقيعانىڭ تاعى ءبىر قاتىسۋشىسى بارىن مالىمدەگەن.
- ءبىز بولىمشەگە بارعاننان كەيىن ونىڭ قازاقستاندا زاڭسىز جۇرگەنى ءمالىم بولدى. ول قىرعىزستان ازاماتى ەكەن. ال ونىڭ بالانى قولىنان نەگە تاستاماعانىن سوندا ءتۇسىندىم. بالا وزىنىكى ەمەس بولىپ شىقتى. ال ونى قورعانۋ ءۇشىن پايدالانعان.
ۆيدەونى دۇرىستاپ قاراساڭىز، قولىنا ءبىر زاتتى الىپ، كەيىننەن ونىڭ پىشاق ەمەسىن ءبىلىپ تاستاي سالادى. بالانى تاستاي سالىپ پىشاقتى قولعا الىپ، ماعان ۇمتىلدى. دەنى ساۋ ادام وسىلاي جاساي ما؟ - دەيدى بوكسشى.
پوليتسيا بولىمشەسىندە بەيبىت بالالاردىڭ اناسىمەن سويلەسكەن.
- ەكى بالانىڭ اناسى تازا اعىلشىن تىلىندە سويلەيدى ەكەن. ول مەنەن، ايەلىمنەن جانە ۇلىمنان كەشىرىم سۇرادى. ۇلىنىڭ مىنەزىن ايتىپ، اۋتيزممەن اۋىراتىنىن دا جەتكىزدى. ەسىل اۋداندىق پوليتسيا بولىمىندەگى كامەرادا ءبارى جازىلعان.
ۆيدەودا ءبىزدى اجىراتپاق بولعان تاعى ءبىر ەر ادام بار. اق جەيدەدە بولدى. ونىڭ ەسىمى - عاني. ول بولات تەمىروۆتىڭ(جەڭىل سالماقتا ك س ر و، ت م د چەمپيونى) ءىنىسى. بۇل ءىستى سول ۋشىقتىرىپ جاتىر دەپ ويلايمىن.
باسىندا ول ماعان ارىز جازباق بولعان. قاسىنداعىلار تىنىشتاندىرعان ەدى. مەن وعان شابۋىلداعان جوقپىن، قايتا ماعان باسقا ەلدىڭ ازاماتى پىشاقپەن ۇمتىلدى. عانيدىڭ نيەتى باسقا، جانە سونىڭ ادۆوكاتى جۇمىس ىستەپ جاتقان سياقتى، - دەيدى شۇمەنوۆ.
بوكسشىنىڭ ايەلى دە ارىز جازعان. بەيبىتتىڭ ايتۋىنشا، قىرعىزستان ازاماتى ونى وقيعا كەزىندە يتەرىپ جىبەرگەن. قولى كوگەرىپ قالعان.
- ەر ادام ءوزى ءۇشىن ەمەس، بالاسىنا ايقايلاعانى ءۇشىن مۇنداي ارەكەتكە بارعانى جايلى ايتادى. ۆيدەودا مەنىڭ بالامدى ۇرعان ۇلكەنى جوق. ونىڭ قولىنداعى انا ايەلدىڭ كىشكەنتايى بولاتىن.
مەن ونىمەن جاي سويلەسۋگە بارعانمىن، ال ونىڭ جاۋابى تاڭعالدىردى. ول قولىنا تاماقتاناتىن قۇرالدى العاندا دا ۇرعان جوقپىن، ونى ۇستاپ قالۋعا تىرىستىم. بالانى جىبەرگەنىن كۇتتىم. ۆيدەودا ونىڭ پىشاقتى قالاي العانى كورىنىپ-اق تۇر.
ەكىنشى ۆيدەودا ونىڭ سىنعان بوتەلكەنى قولىنا العانىن كورۋگە بولادى. ونى سوسىن تاستاي سالادى. مەنىڭ مىندەتىم وتباسىمدى قورعاۋ. مەن ونىڭ اناۋ ايەلمەن بىرگە تۇرىپ ەلىمىزدە زاڭسىز جۇرگەنىن رەسمي تۇردە مالىمدەيمىن.
مەن قاراپايىم اداممىن، جۇرت نازارىنا تۇسە بەرگىم كەلمەيدى. مەندە شىعار جول جوق، سوندىقتان دا بۇل سۇراقتارعا جاۋاپ بەردىم. ينتەرنەتتە اڭگىمە كوپ ايتىلىپ جاتىر، ءۇشىنشى تاراپ وسىدان حايپ جاساعىسى كەلەدى. ەشبىر اكە ءوز بالاسىن قالقان رەتىندە پايدالانبايدى.
مەن بالاعا ەشقاشان داۋىس كوتەرمەگەن بولار ەدىم. ولار پەرىشتە عوي، سوندىقتان دا مەن ونى اتا-انالارىنا تۇسىندىرگىم كەلگەن. بۇلاي بولارىن كىم بىلگەن.
وقيعادان كەيىن پوليتسيا بولىمشەسىندە بالالاردىڭ اناسىمەن بەيبىت كۇيدە تاراستىق. ال ەندى بۇل وقيعاعا ءۇشىنشى ءبىر تاراپتىڭ قىزىعۋشىلىعى ويانعان سەكىلدى، - دەيدى بەيبىت شۇمەنوۆ.
جەلىدە ەكىنشى تاراپتىڭ كوزقاراسى بويىنشا ادۆوكاتىنىڭ ۆيدەوسى دا جاريالاندى. TengriSport ولاردان دا پىكىر ءبىلدىرۋدى سۇراعان.
ايتا كەتەيىك، بەيبىت شۇمەنوۆ - تانىمال قازاقستاندىق كاسىپقوي بوكسشى. مانسابىن 2007 -جىلى باستاعان. 19 جەكپە-جەك وتكىزىپ، 17 سىندە جەڭىسكە جەتكەن. 2 كەزدەسۋىندە قارسىلاسىنا ەسە جىبەرگەن. 2017 -جىلى جاراقاتىنا بايلانىستى مانسابىن اياقتاعان.
