قوسشىدا قازاقتىڭ اتاقتى ەرلى-زايىپتى قايراتكەرلەرىنە كوشە بەرىلدى
شوقىر بولتەك ۇلى 1916 -جىلى 29-قازاندا ماڭعىستاۋ وبلىسى، جارمىش اۋىلىنىڭ ماڭىندا، سارقاۋاق دەگەن جەردە تۋعان. ول وتكەن عاسىردىڭ 30-جىلدارداعى اشارشىلىق، الاساپىران تۇستا فورت- شيەۆچەنكو قالاسىنداعى جەتىمدەر ۇيىندە وقىپ، ورتا مەكتەپتى ءبىتىردى. II دۇنيەجۇزىلىك سوعىسقا قاتىسىپ، 1944 -جىلى جاراقاتتانىپ، ەلگە ورالادى.
شوقىر بولتەك ۇلى رينگتە 223 كەزدەسۋ وتكىزىپ، ونىڭ 199 ىندا جەڭىسكە جەتكەن. 1947 -جىلى كيەۆتەگى كوركەمسۋرەت اكادەمياسىن جانە دەنە تاربيەسى ينستيتۋتىن بىتىرگەن. 50-جىلدارى قازاق ك س ر-ىنىڭ ءۇش دۇركىن چەمپيونى اتانعان.
1937 -جىلى شوقىر بولتەك ۇلىنىڭ باسشىلىعىمەن بوكستان الماتى قالاسىنىڭ رەسمي بىرىنشىلىگى بولدى. وعان 50 سپورتشى قاتىسقان.
1947 -جىلى شوقىر بولتەك ۇلى ماسكەۋدە وتكەن كەڭەس وداعىنىڭ بىرىنشىلىگىنە قازاق كسر- ءنىڭ قۇراما كومانداسىن باستاپ باردى. ونىڭ مەكتەبىنەن ماقسۇت وماروۆ، ءابدىسالان نۇرماحانوۆ، سەرىك ابدىناليەۆ، ۆيكتور جانە ۆلاديمير كاريموۆتار، اسقار ق ۇلىبايەۆ سەكىلدى تالانتتى شاكىرتتەر تاربيەلەنىپ شىقتى.
شوقىر بولتەك ۇلى 1994 -جىلى 78 جاسىندا الماتى قالاسىندا دۇنيەدەن وزدى.
ونىڭ سۇيىكتى جارى - قازاقتىڭ تۇڭعىش بالەريناسى نۇرسۇلۋ تاپالوۆانىڭ اتىنا بەرىلگەن كوشەلەر ءبىر- بىرىمەن قاتار ورنالاسقان.
نۇرسۇلۋ ەلۋباي قىزى تاپالوۆا 1923 -جىلى 13-قىركۇيەكتە اقتوبە وبلىسىنىڭ ويىل اۋدانىندا تۋعان. 1998 -جىلى 13-قاراشادا الماتىدا دۇنيە سالعان. ول - قازاقتىڭ تۇڭعىش بالەريناسى. 1947 -جىلى، 24 جاسىندا قازاقستاننىڭ ەڭبەك سىڭىرگەن ءارتيسى اتاندى.
1936-1938 -جىلدارى قازاق اكادەميالىق وپەرا جانە بالەت تەاترىندا بالەت ءارتىسى رەتىندە ساحنادا ونەر كورسەتكەن. داريعا (ي. ن. ناديروۆتىڭ «كوكتەمىندە»)، زارەما (ب. ۆ. اسافيەۆتىڭ «باكشاساراي فونتانىندا»، 1942-43 -جىلدارى، گ. س. ۋلانوۆامەن بىرگە)، يسپان ءبيى (پ. ي. چايكوۆسكيدىڭ «اققۋ كولىندە») مەن باسقا دا بالەتتىك پارتيالاردى بيلەدى. سونداي-اق ۇلتتىق وپەرالارداعى (ە. گ. برۋسيلوۆسكيدىڭ «قىز جىبەگى»، ا. جۇبانوۆ پەن ل. حاميديدىڭ «ابايى»، م. تولەبايەۆتىڭ «ءبىرجان- ساراسى») جەكە بيلەردى ناقىشىنا كەلتىرە ورىندادى.
1939-1941 -جىلدارى قازاق اكادەميالىق وپەرا جانە بالەت تەاترىندا بالەت ءبيشىسى، 1941-1945 -جىلدارى قازاق اكادەميالىق وپەرا جانە بالەت تەاترىندا ءبيشى، جاۋاپتى ءبيشى، 1945-1953 -جىلدارى قازاق اكادەميالىق وپەرا جانە بالەت تەاترىندا پريما-بالەرينا بولدى.
1975 -جىلعا دەيىن ساحنادان تۇسپەگەن ن. تاپالوۆا «كينوكونسەرت»، «بەلايا روزا»، «جامبىل» جانە باسقا دا 20 شاقتى كينوعا تۇسكەن.
كەزىندە باۋىرجان مومىش ۇلى ءبيشىنىڭ جۇبايى شوقىر بولتەك ۇلى تۋرالى «ەكى-اق ناعىز قازاق بار، ءبىرى - مەن، ءبىرى - شوقىر»، - دەگەن ەكەن.
ول بوكسشىنىڭ فاميلياسىن قازاقشا جازدىرعانى ءۇشىن ايتسا كەرەك. شوقىر بولتەك ۇلى مەن نۇرسۇلۋ تاپالوۆانىڭ ايسۇلۋ، توتى دەگەن ەكى قىزى بار.
جالپى، انام مەن اكەمنىڭ ماحابباتى وتە كەرەمەت ەدى، ءتىپتى، ءبىر-ءبىرىنسىز ءومىر سۇرە المايتىن. انام اكەمدى ۇنەمى شوق دەپ وتىراتىن، ال اكەم انامدى بارىنەن دە سەن سۇلۋ دەپ ەركەلەتەتىن. ولار تىرشىلىكتەگى جوقشىلىققا، جۇرتتىڭ الىپقاشپا اڭگىمەلەرىنە ءمان بەرمەيتىن. ءوزىنىڭ سۇلۋلىعى مەن ونەرى ءۇشىن قىزعانىشتىڭ قىزىل وتىنا كوپ كۇيدى. نەبىر ايتقىشتار بولادى عوي، نە دەسە دە مەن ولاردى ءبىر جاراتقانعا تاپسىردىم، ءيت ۇرەدى كەرۋەن كوشەدى دەمەي مە قازاق، قايداعى ءبىر شاۋىلدەگەن دىبىسقا بولا كەرۋەن جۇرىسىنەن جاڭىلماس دەپ وتىرۋشى ەدى. انام تۋرالى سىر اعىتۋ ماعان وتە اۋىر، جۇرەگىمدەگى ماحابباتىمدى سوزبەن جەتكىزۋ مۇمكىن ەمەس. اكەم ومىردەن كەتكەندە قاتتى قايعىرىپ، ءوزى دە ايىقپاس دەرتكە شالدىعىپ، 5 جىلدان سوڭ كوز جۇمدى، - دەگەن ەدى توتى شوقىر قىزى.
اقمولا وبلىسىنىڭ قوسشى قالاسىندا قازاقتىڭ اتاقتى ەرلى-زايىپتى قايراتكەرلەرى - شوقىر بولتەك ۇلى مەن نۇرسۇلۋ تاپالوۆانىڭ قۇرمەتىنە ءبىر-بىرىنە جاقىن كوشەلەردىڭ بەرىلۋى قازاق ونەرى مەن سپورتىنا، جالپى اتتارى تاريحتا التىن ارىپپەن جازىلعان ازاماتتارعا كورسەتىلگەن قۇرمەت دەپ بىلەمىز.
