مينيسترلىك بەيبىت شۇمەنوۆتىڭ ارەكەتىنە پىكىر ءبىلدىردى
«بىزدە سپورت ادەبى بار، ول بەكىتىلگەن. بۇل باعىتتا سپورتشىلارمەن، باپكەرلەر مەن جاتتىقتىرۋشىلارمەن جانە جالپى ۇلتتىق قۇراما مۇشەلەرىمەن تۇراقتى جۇمىس جۇرگىزىلەدى. يدەولوگيالىق جۇمىستار اتقارىلىپ جاتىر. بەيبىت شۇمەنوۆ تۋرالى وقيعانى ەستىپ، كورىپ جاتىرمىز. ارينە، تەرىس ارەكەت، ونىڭ ۇستىنە قوعامدىق ورىندا بولىپ وتىر. مۇنداي ارەكەتتەردى ەشقالاي دا قولدامايمىز»، - دەدى ەربول مىرزابوسىنوۆ ەلوردادا وتكەن Qazaq kuresi قاۋىمداستىعىنىڭ جيىنىنان كەيىن تىلشىلەردىڭ ساۋالىنا جاۋاپ بەرە تۇرىپ.
ونىڭ ايتۋىنشا، جالپى العاندا قازاقستاندىق سپورتشىلار بۇقاراعا ۇلگى بولا ءبىلۋى ءتيىس.
بۇعان دەيىن قولىندا بالاسى بار ەر ادامعا جۇدىرىق الا جۇگىرگەن بەيبىت شۇمەنوۆتىڭ قاتاڭ جازاعا تارتىلاتىنى تۋرالى حابارلاعان ەدىك.
«قىزمەتتىك تەكسەرۋ ءجۇرىپ جاتىر. ول قاتاڭ جازاعا تارتىلادى. كۇنى كەشە مينيستر ماسەلەنى كوتەردى، ول جازالانادى»، - دەگەن ەدى ىشكى ىستەر ءمينيسترىنىڭ ورىنباسارى قايرات سۇنتايەۆ ۇكىمەت وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرە تۇرىپ.
