ا ق ش-قا اياق باسقان العاشقى قازاقتار

سوناۋ ХV عاسىردا حريستوفور كولۋمب ماتەريكتى اشقاننان كەيىن ەۋروپا حالقى مۇندا لەك-لەگىمەن اعىلعانىن تاريحتان جاقسى بىلەمىز. كەيىن ا ق ش قۇرىلىپ، مەملەكەت اياققا تۇرا باستاعاننان كەيىن الەمنىڭ ءتورت بۇرىشىنان كەلۋشىلەردىڭ سانى ارتتى. قازىرگى تاڭدا اتالعان ەلدە قازاقتاردىڭ دا دياسپوراسى بار.

امەريكا قازاقتارىنىڭ اسسوسياسياسى دەپ اتالاتىن ۇيىمنىڭ نەگىزىن قالاعان - دارحان نۇرماعامبەتوۆ. ونىڭ ايتۋىنشا، ا ق ش-تاعى قازاق قانداستارىمىزدىڭ سانى شامامەن 40 مىڭ ادامدى قۇرايدى ەكەن. ال، ولاردىڭ كوپشىلىگى قۇرلىققا ءۇشىنشى لەكپەن، ياعني قازاقستان ەگەمەندىگىن جاريالاعاننان كەيىن كەلگەن.

جالپى، ەۋروپاعا كوشىپ كەلگەن سەكىلدى امەريكاعا دا قازاقتار ءۇش كەزەڭمەن قونىس اۋدارىپتى. العاشقى لەكتى اشارشىلىق پەن ۇجىمداستىرۋدىڭ سالدارىنان ەلدەن كەتكەن قانداستارىمىز قۇرايدى. ولار الدىمەن يران مەن پاكىستانعا، ودان تۇركياعا كوشكەن. تۇركيادان ەۋروپا ەلدەرىنە قونىس اۋدارىپ، كەيىن جۇمىس ىستەۋ ءۇشىن ا ق ش-قا قاراي ءجۇزىپ وتكەن. الايدا، كەيبىر تاريحي دەرەكتەرگە سۇيەنسەك، امەريكاعا ەڭ العاشقى قازاقتىڭ اياعى سوناۋ ХІХ عاسىردىڭ جەتپىسىنشى جىلدارىندا-اق جەتكەن ەكەن.

قازاقتار كوشىنىڭ ەكىنشى تولقىنى ەكىنشى دۇنيەجۇزىلىك سوعىس جىلدارىمەن سايكەس كەلەدى. مايدان دالاسىنان قايتقان كەيبىر باۋىرلارىمىز وزگە جاۋىنگەرلەرمەن بىرگە ا ق ش-قا كەتىپ قالعان. ال، ءۇشىنشى كەزەڭ ك س ر و قۇلاپ، ونىڭ قۇرامىنداعى مەملەكەتتەر تاۋەلسىزدىگىن العاننان كەيىن باستالدى دەيدى دارحان نۇرماعامبەتوۆ.

قازاقتار اسسوسياسياسىن قۇرۋداعى باستى ماقسات جات ەلدە تۇرىپ جاتقان قانداستارىمىزدىڭ اراسىندا انا ءتىلى مەن سالت-ءداستۇرىمىزدى جانداندىرۋ. «ا ق ش ۇلكەن قازان بولسا، ونداعى ۇلتتاردىڭ بارلىعى سول قازاننىڭ ىشىندە قايناپ جاتىر. ءبىز قايناپ جوعالىپ كەتپەۋىمىز كەرەك» دەيدى مۇنداعى قازاقتار.

بۇگىنگى تاڭدا ا ق ش-تا بىرنەشە قازاق مادەني ورتالىقتارى بار، ەلدىڭ باتىسىندا جانە نيۋ-يوركتىڭ وزىندە. ەندىگى ماقسات شىعىستاعى قانداستاردىڭ باسىن قوسىپ، قازاق ءتىلى مەن مادەنيەتىن ۇيرەتەتىن جالپىعا بىردەي مەكتەپتەر اشۋ. قازىردىڭ وزىندە ينتەراكتيۆتى ءادىس ارقىلى ءتىل ۇيرەتىپ جاتقان سىنىپتار بار. ەلشىلىك جانىنان وقىتۋ كۋرستارى دا جۇمىسىن ىستەپ تۇر. امەريكاداعى قازاق اسسوسياسياسىنىڭ پرەزيدەنتى دارحان نۇرماعامبەتوۆ قازاق بالالارىنا تەك ءتىلدى عانا ەمەس، وتانىمىزدىڭ تاريحىن، ۇلتتىق قۇندىلىقتارىن دا ساناسىنا سىڭىرسەك دەيدى. بۇگىندە امەريكاندىق قازاقتار ۇلتىمىزدىڭ ءتول مەرەكەلەرىن دە تويلاپ كەلەدى.

دەرەككوز: baq.kz

2012-جىل

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى