ەكومين زاڭسىز بالىق اۋلايتىندارمەن قالاي كۇرەسپەك
تولىعىراق ەكولوگيا جانە تابيعي رەسۋرستار مينيسترلىگى بالىق شارۋاشىلىعى كوميتەتى ءتوراعاسىنىڭ ورىنباسارى ايان باحيانوۆ ايتىپ بەردى، دەپ حابارلايدى قازاقپارات ءتىلشىسى.
«بۇگىندە بالىق شارۋاشىلىعى كوميتەتى بالىق جانە بالىق ونىمدەرىن قاداعالاۋدىڭ اقپاراتتىق جۇيەسىن ازىرلەپ جاتىر. ماقسات - ەلىمىزدەگى جانە شەتەلدەن اكەلىنەتىن بالىق سالاسىن جۇيەلەۋ. باقىلاۋ جۇيەسى بالىق اۋلاۋدان باستاپ، ساتۋعا جىبەرۋگە دەيىنگى بارلىق پروتسەستى تولىق قاداعالايدى. بالىقتى ەل ىشىندە ساتۋ ءۇشىن ۆەتەرينارلىق انىقتاما بولۋ كەرەك. ال بالىق جانە ونىڭ ونىمدەرى ەلدەن تىس جەرلەرگە كەتەتىن بولسا وندا ۆەتەرينارلىق سەرتيفيكات بولۋى مىندەتتى»، - دەدى ايان باحيانوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ماماننىڭ مالىمەتىنشە، جوعارىدا اتالعان قۇجاتتاردى باسسەيندىك بالىق شارۋاشىلىعى ينسپەكتسيالارى بالىقتىڭ زاڭدىلىعىن راستاعان سوڭ بەرەدى.
«ەگەر بالىقتى ساتىلىمعا جىبەرۋ بارىسىنىڭ زاڭدىلىعىن تەكسەرۋدە قانداي دا كەمشىلىك انىقتالسا، ۆەتەرينارلىق قىزمەت رۇقسات قۇجاتىن ۇسىنا المايدى. ونداي جاعدايدا بالىق اۆتوماتتى تۇردە براكونەرلىك، ياعني زاڭسىز جولمەن اۋلاندى دەپ سانالادى. قازىر جاڭا جۇيە ازىرلەنىپ، سىناقتان ءوتىپ جاتىر. 2024 -جىلدىڭ ءبىرىنشى توقسانىندا اتالعان اقپاراتتىق جۇيەنى ەنگىزۋ جوسپارلانىپ وتىر»، - دەيدى ول.
