استانادا حالىقارالىق فەستيۆال باستالدى
فەستيۆال - قازاق شاحماتسۇيەر قاۋىمى ءۇشىن بىرەگەي وقيعا.
قاتىسۋشىلار الدىندا ق ر مادەنيەت جانە سپورت ءمينيسترى اسحات ورالوۆ ءسوز سويلەدى. ول ەلىمىزدە سپورتتىڭ، ونىڭ ىشىندە شاحمات سياقتى زياتكەرلىك ويىننىڭ دامۋىنا قولداۋ كورسەتىلىپ، ىلگەرىلەپ كەلە جاتقانىن اتاپ ءوتتى. ءمينيستردىڭ ايتۋىنشا، سوندىقتان دا مۇنداي فەستيۆالدار قازاقستاندىق سپورت مادەنيەتىنىڭ اجىراماس بولىگى بولىپ قالا بەرەدى، بۇل جاس دارىنداردى انىقتاۋعا جانە قولداۋعا، جاڭا ۇرپاقتى جەتىستىككە جەتۋگە شابىتتاندىرادى جانە بارلىق شاحماتشىلاردىڭ مۇمكىندىكتەرىنىڭ كوكجيەگىن كەڭەيتەدى.
قوناقتاردى ەلىمىزدەگى مىڭداعان جاس شاحماتشىلارعا، اسىرەسە سپورتشى قىزدارعا ۇلگى- ونەگە بولعان دينارا ءسادۋاقاسوۆانىڭ ءوزى قارسى الدى.
«شاحمات - بۇل ونەر، ستراتەگيا جانە ينتەللەكتۋالدىق جارىس قانا ەمەس، سونىمەن قاتار پىكىر الماسۋ، داعدىلاردى جەتىلدىرۋ جانە جاڭا دوستار تابۋ مۇمكىندىگى. ءبىزدىڭ فەستيۆال الەمنىڭ 16 ەلىنەن 800 دەن استام شاحماتشىنىڭ باسىن قوستى. تىركەلۋشىلەردىڭ ەداۋىر بولىگىن بالالار قۇرايدى. قازاقستاندا وتە تالانتتى جانە قابىلەتتى شاحماتشىلار بار، ولار فەستيۆال كەزىندە رەيتينگتەرىن كوتەرۋگە، حالىقارالىق شەبەر، FIDE شەبەرى، حالىقارالىق گروسسمەيستەر نورمالارىن ورىنداۋعا بىرەگەي مۇمكىندىك الادى. بۇل ءبىزدىڭ ەلىمىزدەگى شاحماتتى دامىتۋعا قوسقان ۇلەسىمىز»، - دەدى ول.
فەستيۆال اياسىندا ءتورت تۋرنير وتەدى: ەرلەر مەن ايەلدەر اراسىنداعى قازاقستان كۋبوگىنىڭ كەزەڭى، اۋەسقويلار، بالالار اراسىنداعى باسەكە جانە بليتس- ويىن.
قازاقستاندىق شاحماتشىلارعا بەرىلگەن كەرەمەت مۇمكىندىك - ولار جارىستى ەركىن تاماشالاي الادى، تاجىريبە جيناقتايدى، كەيبىرەۋلەرى ءتىپتى فەستيۆالگە قاتىساتىن 20 دان استام گروسسمەيستەرلەرمەن تۋرنيرلەر كەزىندە ويناي الادى.
فەستيۆالدىڭ جوعارى مارتەبەگە يە بولۋى قاتىسۋشىلاردىڭ دەڭگەيىنە ەرەكشە ءمان بەرەدى. امەريكالىق شاحماتشى، گروسسمەيستەر حانس موكە نيمانن، ارمياندىق گروسسمەيستەرلەر شانت سارگسيان جانە مانۋەل پەتروسيان استاناداعى «رەيتينگ فاۆوريتتەرى» قاتارىندا. فەستيۆالگە قازىرگى ايەلدەر اراسىنداعى ازيا چەمپيونى ديۆيا دەشمۋح تا قاتىسۋدا. ءۇندىستان، يزرايل، ۋكراينا، ازەربايجان جانە باسقا مەملەكەتتەردەن دە مىقتى ويىنشىلار بار.
اسەرلى ءارى قىزۋ ەموتسياعا تولى فەستيۆال كەزىندە، اسىرەسە جاڭادان كەلگەن ويىنشىلار مەن بالالار ءۇشىن گروسسمەيستەرلەرمەن سينحروندى ويىندار ۇيىمداستىرىلادى.
«استانا جۇلدىزدارىنىڭ» ەرەكشەلىگى مەن ماڭىزى - «FIDE ۇيىمداستىرۋشىسى» (FIDE - حالىقارالىق شاحمات فەدەراتسياسى، ۇلتتىق فەدەراتسيالاردى بىرىكتىرەدى) اتاعىنا ارنالعان سەمينار. مۇنداي ءىس- شارا قازاقستاندا العاش رەت وتكىزىلىپ وتىر.
لەكتور حالىقارالىق اربيتر، FIDE حالىقارالىق ۇيىمداستىرۋشىسى، كانادادان كەلگەن ۆاديم تسىپين بولادى.
ونىڭ ايتۋىنشا، سەمينارعا قاتىسۋشىلار الەمدىك شاحمات تۋرنيرلەرىن وتكىزۋدىڭ بارلىق ستاندارتتارىن - ۇستەلدى ورنالاستىرۋدان باستاپ قاتىسۋشىلاردىڭ ويىن ءتارتىبىن جانە «الاياقتىققا قارسى» شارالارعا دەيىن بىلە الادى. سەمينار اياقتاعاننان كەيىن بىلىكتىلىگىن ارتتىرۋشىلار ەمتيحان تاپسىرىپ، بارلىق تالاپتارعا ساي حالىقارالىق FIDE ۇيىمداستىرۋشىسىنىڭ رەسمي مارتەبەسىن الۋعا ءوتىنىش بەرە الادى.
شارا بارىسىندا ءتورت تۋرنيرگە دە تورەلىك ەتەتىن ۆاديم تسىپين فەستيۆال تۋرالى ايتتى.
«مەن ءتورت قۇرلىقتا دا جۇمىس ىستەدىم جانە ءوز تاجىريبەمنەن قازاقستاننىڭ شاحمات كارتاسىندا جەتەكشى ەلدەردىڭ ءبىرى رەتىندە ءابسوليۋتتى كوشباسشىعا اينالۋعا تولىق مۇمكىندىگى بار دەپ ايتا الامىن. قازاقستان ۇلتتىق دايىندىقتىڭ پروپورتسيونالدى پيراميداسىن قۇردى، ءوزىنىڭ ۇزدىك ويىنشىلارىن، تورەشىلەرىن، تۋرنير ۇيىمداستىرۋشىلارىن ورگانيكالىق تۇردە ءوسىردى جانە ءوزىنىڭ شاحمات مەكتەبىن قالىپتاستىردى. «استانا جۇلدىزدارى» سياقتى فەستيۆالدار ءبىلىم مەن الەۋمەتتەنۋدىڭ ماڭىزدى ەلەمەنتى رەتىندە قازاقستاننىڭ شاحماتقا ۇلكەن كوڭىل بولەتىنىن راستايدى. فەستيۆالگە قاتىسقان جۇزدەگەن بالالار ەرەسەك ويىنشىلاردان ۇلگى الىپ، مىنەزدەرى مەن تالداۋ قابىلەتتەرىن دامىتىپ، بولاشاقتا الەمنىڭ زياتكەرلىك ەليتاسىنا اينالادى»، - دەدى ول.
تۋرنيرلەردىڭ جۇلدە قورى رەكوردتىق سوما - 40 ميلليون تەڭگەنى قۇرادى. ۇيىمداستىرۋشىلاردىڭ ايتۋىنشا، بۇل قاتىسۋشىلار ءۇشىن قوسىمشا ىنتالاندىرۋ. ايتا كەتۋ كەرەك، بۇل سوما اياسىندا ارنايى جۇلدەلەر ايەلدەرگە دە، شاحمات ارداگەرلەرى مەن بالالارعا دا قاراستىرىلعان.
