ەلوردادا ءۇشىنشى كوپسالالى اۋرۋحانا سالۋ ۇسىنىسىن قولداۋ ماڭىزدى دەپ سانايمىن - توقايەۆ
«استانادا حالىق سانىنىڭ باقىلاۋسىز ءوسۋى قازىرگى زامانعى ەمحانالاردىڭ، ساپالى جانە قولجەتىمدى قىزمەتتەرى بار مامانداندىرىلعان مەديتسينالىق مەكەمەلەردىڭ تاپشىلىعىنا الىپ كەلەدى. بىلىكتى مەديتسينالىق كادرلاردىڭ تاپشىلىعى بايقالادى. كوبىنە ادامدار ەمحانالارداعى كەزەك پەن جەكە كلينيكالارداعى قىزمەتتەردىڭ قىمبات بولۋىنا بايلانىستى مەديتسينالىق كومەككە جۇگىنبەيدى. مۇنىڭ ءبارى قالا تۇرعىندارىنىڭ دەنساۋلىعىنا تەرىس اسەر ەتەدى. جاعدايدى تۇزەتۋ ءۇشىن ەلوردادا ءۇشىنشى كوپسالالى اۋرۋحانا سالۋ ۇسىنىسىن قولداۋ ماڭىزدى دەپ سانايمىن»، - دەدى پرەزيدەنت.
سونىمەن قاتار، مەملەكەت باسشىسى قاسىم- جومارت توقايەۆ تۇرعىنداردىڭ قالالىق ينفراقۇرىلىمعا ءتيىستى دەڭگەيدە قولجەتىمدىلىگىن ارتتىرۋ ماسەلەسىنە ەرەكشە توقتالدى.
«ەلوردادا ءومىر ءسۇرۋ ساپاسىن تۇراقتى نەگىزدە ارتتىرۋ قاجەت. استانانىڭ بارلىق تۇرعىندارى قالالىق ينفراقۇرىلىمعا - ءبىلىم بەرۋ، دەنساۋلىق ساقتاۋ، مادەنيەت جانە سپورت وبەكتىلەرىنە، سونداي- اق ساياباقتار مەن قوعامدىق كەڭىستىكتەرگە تەڭ قولجەتىمدىلىككە يە بولۋى ءتيىس. بۇل بارلىق ازاماتتاردىڭ ءومىرى ءۇشىن جايلى جانە قولايلى ورتا قۇرۋدىڭ نەگىزى»، - دەپ ءمالىم ەتتى پرەزيدەنت.
