مينيسترلىك وكىلى گرۋزيادا قازا تاپقان وتاندىق جۋرناليسكە قاتىستى ىسكە پىكىر ءبىلدىردى
«ءبىزدىڭ بۇل ماسەلەدەن حاباردارمىز، وقيعا بىرنەشە اي بۇرىن بولعان. ول كەزدە ءبىز ونىڭ جۋرناليست ەكەنىن مۇلدەم بىلمەدىك. ازاماتشا اتالعان ەلگە جەكە ءوزى ساياحاتتاپ بارعان. ونىڭ كاسىبي قىزمەتىنە اتالعان وقيعانىڭ ەشقانداي قاتىسى جوق. ول قاراپايىم قازاقستان ازاماتى رەتىندە ءوزىنىڭ تانىسىمەن گرۋزياعا اتتانعان. گرۋزيا ىشكى ىستەر مينيسترلىگىنىڭ مالىمەتىنشە، قازىرگى تاڭدا كۇدىكتى ۇستالدى. تەرگەۋ شارالارى ءجۇرىپ جاتىر. سوت شەشىمى شىققان ۋاقىتتا گرۋزيا بيلىگى بىزگە حابار بەرەدى. ازىرگە گرۋزيا ازاماتى كۇدىكتى دەپ تانىلىپ وتىر»، - دەدى ايبەك سمادياروۆ.
ۆەدومستۆونىڭ رەسمي وكىلى تەرگەۋ پروتسەسىنە ەشكىمنىڭ، ونىڭ ىشىندە مارقۇمنىڭ جاقىندارى دا ارالاسپايتىنىن اتاپ ءوتتى.
«ولار تەرگەۋ شارالارىنا قاتىسا المايدى. ءبىزدىڭ ەلىمىزدە دە تەرگەۋ ءىس- شارالارىنا قاتىسۋعا رۇقسات ەتىلمەيدى. كونسۋل مارقۇمنىڭ تۋىستارىمەن ۇنەمى بايلانىستا. ءبىراق سوتقا كىم قاتىساتىنىن بىلمەيمىن» ، - دەپ تۇيىندەدى ول.
بۇرىن حابارلاعانىمىزداي، وتكەن ايدا قازاقستاندىق جۋرناليست جانبوتا تولەگەن گرۋزيادا كىسى قولىنان قازا تاپتى.
