ءانشى اسەتتىڭ زيراتى قالاي تابىلدى؟

زامانىندا «ارعىنمىن اتىم اسەت ارىنداعان...» دەپ ءان شىرقاعان ءانشىنى حالىق كوككە كوتەرگەن. ونىڭ شىرقاعان ءانىن - اتاقتى قايشى جايلاۋى، ونىڭ باتىسىنداعى كولدەنەڭقاز، كولتەكشە جەرى، ەرەنقابىرعانىڭ سولتۇستىك قاپتالىن وراپ جاتقان تاقيا- جىڭ، اياق جاعىنداعى اتاقتى سايرام كولىنىڭ جاعاسى، وڭتۇستىك كۇڭگەيدەگى ۇلانعايىر كوكقامىر جازىعى كۇللى ەل ەلىتىپ تىڭداعان.

بايقاماي الماستى ءمۇساتىر دەپ ءىشىپ، ءوزى ايتقانداي «ءولىمدى اقشاعا ساتىپ العان» ءانشىنى ەل قايشىداعى تاستوبە قورىمىنا جەرلەيدى. سودان ارادا الپىس جىل وتكەن سوڭ، اسەتتانۋشى جۇمادىل مامان باس بولىپ، ءانشىنىڭ باسىنا بەلگى ورناتۋ ءۇشىن زيراتىن ىزدەيدى. تاپپايدى. اركىم ءارتۇرلى توپىراقتى نۇسقايدى. ءسويتىپ ەل دەل-سال بوپ تۇرعاندا، وتە بايسالدى ءبىر توپ ادام كەلىپ، اتتان ءتۇسىپ زيراتتارعا دۇعا جاسايدى. بۇلار كونەنىڭ كوزدەرى - 86 جاستاعى اپسامەت پەن سۇلتان قاريالار جانە 80 جاستاعى مۇقان قاريا ەدى. ءارى اسەتتى جەرلەۋگە قاتىسقاندار بولاتىن. كوكەيلەرىنەن وشپەپتى. «اسەتتىڭ زيراتى مىناۋ» دەپ ءدال كورسەتەدى دە، «قابىردىڭ ىشىندە جۋاندىعى قارا سانداي قاراعاي قازىق بار» دەگەندى ەسكەرتەدى. ىزدەۋشىلەر قابىردى اشىپ كورسە شىنىندا قارا سانداي قاراعاي شىعادى. ءسويتىپ جۇرت اسەتتىڭ قابىرىن تابادى.

ءانشىسىن ەسكە العان حالىق تاسجوتا قورىمىنا تابانى تاستان ورىلگەن، اق سىرلى بەسىك كۇمبەز ورناتادى. وعان «ايگىلى ءانشى اسەت نايمانباي ۇلى 1867-1923» دەپ ويىپ جازادى. قازاق ءانىنىڭ ءبىرتۋار تۇلعاسى اسەتتىڭ زيراتى وسىلاي جاڭعىرعان ەكەن.

بەكەن قايرات ۇلى

دەرەككوز: baq.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى