ا ق ش حيميالىق قارۋدى تولىق جويدى - بايدەن

حيميالىق قارۋعا تىيىم سالۋ جونىندەگى حالىقارالىق ۇيىم دا مالىمەتتى راستادى. دەرەككە سۇيەنسەك، امەريكادا بۇل يگى باستاما 1990 -جىلدارى باستالىپ، 30 جىلعا سوزىلدى. ا ق ش وسى قارۋعا تىيىم سالۋ تۋرالى كونۆەنسياعا قاتىسۋشى ەلدەر ىشىندە ەڭ ءىرى ارسەنالى بار مەملەكەت ەدى. الايدا كونۆەنسياعا مىسىر، سولتۇستىك كورەيا جانە وڭتۇستىك سۋدان ءالى قول قويعان جوق.

***

حيميالىق قارۋ — ۋلاندىرعىش زاتتار مەن قۇرالداردى قولدانۋعا ارنالعان ماشينالار، پريبورلار، قارۋ- جاراقتار. حيميالىق قارۋ جاۋدىڭ ادام كۇشىن جاپپاي قىرىپ- جويۋعا ارنالعان. سونداي- اق بەلگىلى ءبىر جەرلەردى، قارۋ- جاراقتى، اسكەري تەحنيكانى، ءار ءتۇرلى تىل نىساندارىن ۋلاندىرۋ ءۇشىن دە قولدانىلۋى مۇمكىن. حيميالىق قارۋدىڭ تيىمدىلىگى، كوبىنەسە مەتەورولوگيالىق جاعدايلارعا، جەردىڭ جايىنا بايلانىستى. مىسالى، اۋا رايى جەلدى بولسا، ۋلاندىرعىش زاتتاردىڭ تارالاتىن ايماعى ۇلعايىپ، جەل تىمىق بولسا، ۋلاندىرعىش زاتتار ءبىر جەردە ۇزاق تۇرىپ قالادى.

حيميالىق قارۋدى العاش نەمىستەر 1915 -جىلى 22 -ساۋىردە شپرەدەگى (بەلگيا) شايقاستا قولداندى. سودان كەيىن باسقا ارميالار دا قولدانا باستادى. 1-دۇنيەجۇزىلىك سوعىس جىلدارىندا تەك اعىلشىن، فرانسۋز جانە ا ق ش ارميالارىندا عانا حيميالىق قارۋدان 450 مىڭداي ادام شىعىن بولدى. 1925 -جىلى جەنيەۆا حاتتاماسى بويىنشا حيميالىق قارۋدى قولدانۋعا تىيىم سالىنىپ، وعان بىرنەشە مەملەكەتتەر قوسىلدى. ءبىراق كەيبىر مەملەكەتتەر بۇل حاتتامانى بۇزىپ (يتاليا ەفيوپياعا قارسى سوعىستا (1935 - 36)، حيميالىق قارۋدى قولداندى.

تىيىم سالىنعانىنا قاراماستان 1- جانە 2-دۇنيەجۇزىلىك سوعىس ارالىعىندا حيميالىق قارۋ كوپتەپ شىعارىلدى. 1943 -جىلعا قاراي فاشيستىك گەرمانيا ۋلاندىرعىش زاتتار ازىرلەيتىن حيميالىق ونەركاسىبىنىڭ قۋاتىن جىلىنا 180 مىڭ توننا ءونىم شىعاراتىنداي دارەجەگە جەتكىزدى. دەگەنمەن، كوپ ۇزاماي گەرمانيا قارسىلاستارىنىڭ دا حيميالىق قارۋدى قولداناتىنىن ەسكەرىپ، بۇدان باس تارتتى. 2-دۇنيەجۇزىلىك سوعىستان كەيىن گەرمانيانىڭ تروفەيلىك حيميالىق قارۋى (300 مىڭ تونناعا جۋىق) تەڭىزگە باتىرىلۋ ارقىلى جويىلدى.

سوعىستان كەيىن كوپتەگەن ەلدەر حيميالىق قارۋدىڭ جاڭا نەعۇرلىم اپاتتى تۇرلەرىن شىعاردى. حيميالىق قارۋ، اسىرەسە، ارتيللەريا، اۆياتسيا سالاسىندا ودان ءارى ورىستەدى. ارتيللەريا حيميالىق قارۋعا جاۋدىڭ جەردەگى كۇشتەرىن اتقىلاۋعا ارنالعان حيميالىق سناريادتار، مينالار؛ اۆياتسيالىق حيميالىق قارۋعا ءار ءتۇرلى ۋلى زاتتارمەن تولتىرىلعان بومبالار، ت. ب. قۇرال- جابدىقتار جاتادى. بەلگىلى ءبىر ايماقتى ۋلاۋ ءۇشىن ارناۋلى حيميالىق ماشينالار قولدانىلادى. حيميالىق قارۋدان قورعانۋ ءۇشىن اسكەرلەر مەن تۇرعىن حالىق ارناۋلى دايىندىقتان ءوتۋى ءتيىس.

پاريج كونۆەنسياسىنا (1993) سايكەس، حيميالىق قارۋ تابيعات پەن ادامزاتقا تيگىزەتىن اسا اۋىر زاردابىنا بايلانىستى جويىلۋعا جاتقىزىلعان. حيميالىق قارۋدى جويۋ ارنايى نىسانداردا جۇزەگە اسىرىلادى. 1993 -جىلى رەسەيدىڭ حيميالىق قارۋ قورى 40 مىڭ توننانى، ال ا ق ش 29 مىڭ توننانى قۇرادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى