وزبەكستانداعى كەزەكتەن تىس پرەزيدەنت سايلاۋى: داۋىس بەرۋ باستالدى

و س ك مالىمەتىنشە، سايلاۋشىلار تىزىمىنە 19 ميلليون 593 مىڭ 838 ازامات ەنگىزىلىپ، 14 وكرۋگتىك سايلاۋ كوميسسياسى، 10784 سايلاۋ ۋچاسكەسى قۇرىلدى. شەتەلدەگى وزبەكتەر ءۇشىن 39 ەلدە 56 سايلاۋ ۋچاسكەسى اشىلعان. ال قازاقستان اۋماعىندا وزبەكستاننىڭ استانا، الماتى جانە اقتاۋ قالالارىنداعى ديپلوماتيالىق وكىلدىكتەرىندە بولىمدەر اشىلدى.

كەزەكتەن تىس پرەزيدەنتتىك سايلاۋدى وتكىزۋگە 174,1 ميلليارد سۋم (15 ميلليون دوللار) جۇمسالعان. بۇل 2021 -جىلى وتكەن پرەزيدەنتتىك سايلاۋدى ۇيىمداستىرۋعا بولىنگەن قارجىدان 41 پايىزعا از.

سايلاۋدى ت م د، ش ى ۇ، ۇ ت ك، ە ق ى ۇ، يۋنەسكو جانە باسقا دا حالىقارالىق ۇيىمداردان 797 شەتەلدىك بايقاۋشى، سونداي- اق ساياسي پارتيالار مەن ازاماتتاردىڭ ءوزىن- ءوزى باسقارۋ ورگاندارىنان 53677 جەرگىلىكتى بايقاۋشى باقىلايدى. سايلاۋ تۋرالى اقپاراتتى 1,4 مىڭنان استام شەتەلدىك جانە جەرگىلىكتى جۋرناليست جاريالايدى.

سايلاۋدا ءتورت ۇمىتكەر بار. ەكولوگيالىق پارتيا ءوز كوشباسشىسى ابدۋشۇكۇر حامزايەۆتى، حالىقتىق- دەموكراتيالىق پارتيا ۇلىقبەك ينوياتوۆتى، «ادولات» سوتسيال- دەموكراتيالىق پارتياسى جوعارعى سوت ءتوراعاسىنىڭ بۇرىنعى ءبىرىنشى ورىنباسارى روباحون ماحمۋدوۆانى جانە بيلىكتەگى «ۋزليدەپ» پارتياسى قازىرگى پرەزيدەنت شاۆكات ميرزيەيەۆتى ۇسىندى.

سايلاۋدا جەڭىسكە جەتۋ ءۇشىن كانديدات 50 پايىزدان استام داۋىس جيناۋى كەرەك. سايلاۋشىلاردىڭ قاتىسۋ شەگى - 33 پايىز. وسك سايلاۋدىڭ الدىن الا ناتيجەلەرىن 10 شىلدەدە جاريالاۋعا ۋادە بەرىپ وتىر.

بۇل - وزبەكستاننىڭ جاڭا كونستيتۋتسياسى كۇشىنە ەنگەننەن كەيىنگى العاشقى سايلاۋ. ەندى پرەزيدەنتتىك مەرزىم بەس جىلدان جەتى جىلعا دەيىن ۇزارتىلدى. وزبەكستاننىڭ جاڭا نەگىزگى زاڭى رەسپۋبليكانىڭ قازىرگى باسشىسى شاۆكات ميرزيەۆكە بۇل قىزمەتكە قايتا سايلانۋعا مۇمكىندىك بەرەدى.

بۇعان دەيىن حابارلانعانداي، وزبەكستان پرەزيدەنتى شاۆكات ميرزيەۆ 2023 -جىلدىڭ 9 -شىلدەسىنە بەلگىلەنگەن مەملەكەت باسشىسىنىڭ كەزەكتەن تىس سايلاۋى تۋرالى مالىمدەگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى