ماجىلىسمەن جايىلىمدى جەكەمەنشىككە اينالدىرۋعا ەشكىمنىڭ قاقىسى جوقتىعىن ايتتى
حالىق قالاۋلىسى الدىمەن جەتىتوبە اۋىلدىق وكرۋگىنە قاراستى كارىقورعان اۋىلىنداعى سپورت مەكتەبىن قايتا جاڭعىرتۋ جۇمىستارىمەن تانىستى. بۇل قۇرىلىس نىسانى بۇرىن امبەباپ دۇكەن بولعان. جوبا قۇنى - 111 ميلليون 330 مىڭ تەڭگە. رەكونسترۋكتسيالاۋ جۇمىسىن جىل سوڭىنا دەيىن اياقتاۋ جوسپارلانىپ وتىر.
مۇقاش ەسكەندىروۆ مەردىگەرلەرگە نىساندى ۋاقتىلى ءارى ساپالى اتقارۋمەن قاتار، اۋلاسىن اباتتاندىرۋ ماسەلەسىنە دە نازار اۋدارۋدىڭ قاجەتتىلىگىن ايتتى.
م. ەسكەندىروۆ جەتىتوبە اۋىلدىق وكرۋگى تۇرعىندارىنىڭ تۇرمىس جاعدايىن اۋىل اكىمى قايناربەك بەدەلبەكوۆتەن سۇراپ ءبىلدى. اتالعان اۋىلدىق وكرۋگتىڭ اكىمى ءوز سوزىندە وكرۋگكە قاراستى 6 اۋىلدىڭ تۇرعىندارى نەگىزىنەن مال جانە ەگىن شارۋاشىلىعىمەن اينالىساتىنىن ايتىپ، جىل باسىنان مۇندا «اۋىل اماناتى» باعدارلاماسى بويىنشا جۇمىستار جۇرگىزىلىپ جاتقانىن جەتكىزدى.
پيلوتتىق جوبانىڭ ءتورت باعىتى اياسىندا 146 ازامات 2,5 پايىزبەن 778 ميلليون تەڭگە نەسيە قاراجاتىنا قول جەتكىزگەن. ناتيجەسىندە اۋىل ازاماتتارى ءتورت تۇلىك مالدىڭ باسىن كوبەيتۋگە جانە ونى اسىلداندىرۋعا كۇش سالىپ جاتىر.
دەگەنمەن، مال باسى ارتقان سايىن بۇل اۋىلدا تۇرعىنداردىڭ جايىلىم جەرگە دەگەن سۇرانىستارى مەن نارازىلىعى دا كوبەيگەن. وسىعان وراي، تۇرعىنداردىڭ وتىنىشتەرىنە سايكەس، اۋىلدىق وكرۋگ اكىمى ق. بەدەلبەكوۆتىڭ باستاماسىمەن كەزىندە جەكە قولعا ءوتىپ كەتكەن مال جايىلىمىنا ارنالعان جەرلەردى تۇرعىنداردىڭ ورتاق يەلىگىنە قايتارۋ جۇمىستارى ءجۇرىپ جاتىر.
حالىق قالاۋلىسى ءوز سوزىندە اۋىلدا اتقارىلىپ جاتقان جۇمىستاردى، ونىڭ ىشىندە تۇرعىنداردىڭ نەگىزگى جانە ماڭىزدى پروبلەماسىنىڭ ءبىرى بولىپ كەلگەن مال جايىلىمى ماسەلەسى تۋرالى ايتىپ، پارلامەنت قابىرعاسىندا جايىلىمعا قاتىستى ارنايى زاڭ قابىلدانىپ، جايىلىمداردى مەملەكەت مەنشىگىنە قايتارۋ ارقىلى اۋىل تۇرعىندارىنىڭ ورتاق پايدالانۋىنا اينالدىرۋعا بولاتىنىن ايتتى. جايىلىمدى ەشكىمنىڭ جەكە مەنشىگىنە اينالدىرۋعا قاقىسى جوق ەكەنىن جەتكىزدى.
مۇنان سوڭ مۇقاش ەسكەندىروۆ رەسپۋبليكالىق ماندەگى «ب. مومىش ۇلى- قوشقاراتا» تاس جولىنىڭ 35-40 شاقىرىم اۋماعىنداعى جوندەۋ جۇمىستارىمەن تانىسىپ، قالعان بولىگىنىڭ جوندەۋ جۇمىستارىن جالعاستىرۋ ءۇشىن رەسپۋبليكالىق بيۋدجەتتەن قاراجات بولدىرۋگە ىقپال ەتەتىنىن ايتتى.
ءماجىلىس دەپۋتاتى وڭىرگە جاساعان جۇمىس ساپارىنىڭ بارىسىندا سونداي-اق، اۋدان ورتالىعىنان شالعايدا ورنالاسقان قوشقاراتا اۋىلدىق وكرۋگىنە دە ارنايى بارىپ، تۇرعىنداردىڭ تۇرمىسىمەن تانىستى. وكرۋگكە قاراستى قىزتوعان اۋىلىن اۋىز سۋمەن قامتاماسىز ەتۋ ءۇشىن قويىلىپ جاتقان كەشەندى بلوك ءمودۋلىن، سونداي-اق، قوشقاراتا اۋىلىنا گاز جۇرگىزۋ جۇمىسىن دا بارىپ كوردى.
جۇمىس ساپارىنىڭ سوڭىندا دەپۋتات اۋدان ورتالىعى ب. مومىش ۇلى اۋىلىندا سالىنىپ جاتقان 18 پاتەرلى كوپقاباتتى تۇرعىن ءۇيدىڭ قۇرىلىسىمەن تانىسىپ، اۋىلدىق وكرۋگ اكىمدەرىمەن كەزدەسىپ، پىكىر الماستى.
«سىزدەردىڭ ەڭ باستى مىندەتتەرىڭىز - جەرگىلىكتى حالىققا ادال قىزمەت ەتۋ. حالىققا جاقىن ءجۇرىپ، تۇرعىندارمەن تىعىز بايلانىستا بولۋ ارقىلى وڭىردە قوردالانعان ماسەلەلەردى وڭاي شەشۋگە بولادى. اۋىلدى وركەندەتۋگە جانە دامىتۋعا قاتىستى باستامالاردى ەڭ بىرىنشىدەن اۋىل اكىمدەرى كوتەرۋلەرى ءتيىس.
بارلىعىمىز حالىقتىڭ اراسىنان شىقتىق، ەندى حالىققا، اۋىلدىڭ دامۋىنا ەڭبەگىمىزدى سىڭىرەيىك. سوندىقتان اۋىلدى وركەندەتۋ جولىندا ءبىز سىزدەرگە كومەكشى بولۋعا دايىنبىز. اۋىل - بارلىعىمىزعا امانات. اۋىلدى بىرگە وركەندەتەيىك»، - دەدى ول كەزدەسۋدە.
بۇعان دەيىن سەنات دەپۋتاتى جامبىل وبلىسىنداعى بىرنەشە كۇردەلى قۇرىلىسقا قارجى بولىنۋىنە ىقپال ەتەتىنىن جازعان بولاتىنبىز.
