شۆەيتساريا سىرتقى ىستەر ءمينيسترى قازاقستانعا رەسمي ساپارمەن كەلدى
ق ر پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ شۆەيتساريالىق دەلەگاتسيامەن اشىق ءارى ناتيجەلى كەلىسسوزدەر وتكىزگەنىن ايتتى.
وعان قوسا، مينيستر قازاقستان مەن شۆەيتساريا اراسىندا ءوزارا سىيلاستىق، بارلىق دەڭگەيدە تولىق تۇسىنىستىك ورناتىلعانىنا ەرەكشە نازار اۋداردى.
«ءبىز ەۋروپاداعى ماڭىزدى ارىپتەسىمىز - شۆەيتساريامەن سوڭعى جىلدارى شىنىمەن دە ايتارلىقتاي بەلەستەردى ەڭسەردىك. مەملەكەت باسشىسىنىڭ 2021 -جىلعى قاراشاداعى شۆەيتسارياعا ساپارى ۇلگىلى ارىپتەستىگىمىزدى تىڭ باعىتتارمەن تولىقتىرۋعا مۇمكىندىك بەرگەنى ايقىن.
ال شۆەيتساريا باسشىسى 2019 -جىلعى قاراشادا، زاڭ شىعارۋشى ورگانىنىڭ ءتوراعاسى 2021 -جىلعى تامىزدا قازاقستانعا كەلگەنى وزدەرىڭىزگە جاقسى ءمالىم. سوندىقتان، ءبىز ساياسي ديالوگ دەڭگەيىن ساقتاپ، پارلامەنتارالىق ىنتىماقتاستىقتى نىعايتۋدىڭ، ساۋدا- ەكونوميكالىق ارىپتەستىك اياسىن كەڭەيتۋدىڭ جانە مينيسترلىكتەر اراسىنداعى بايلانىستاردى تۇراقتى قولداۋدىڭ ماڭىزىن اتاپ وتتىك»، - دەدى مۇرات نۇرتىلەۋ ق ر سىرتقى ىستەر مينيسترلىگىندە.
ونىڭ ايتۋىنشا، كەلىسسوزدەر بارىسىندا قازاقستاننىڭ ەكسپورت نومەنكلاتۋراسىن كەڭەيتۋگە، ەلىمىزدىڭ كولىك- لوگيستيكا بايلانىسىن ودان ءارى دامىتۋعا مۇددەلى ەكەنى ايتىلعان.
«ارداقتى مينيستر مىرزامەن مادەني- گۋمانيتارلىق، عىلىمي- تەحنيكالىق جانە ءوڭىرارالىق ىنتىماقتاستىقتى دامىتۋعا، سۋ ديپلوماتياسى مەن سۋ رەسۋرستارىن باسقارۋ ماسەلەلەرى بويىنشا ءوزارا شارالاردى قولداۋعا كەلىستىك. سونىمەن قاتار تۋريزم سالاسىندا جارنامالىق ناۋقانداردى ۇيىمداستىرۋ ارقىلى بىرلەسكەن ءىس- شارالاردى جۇزەگە اسىرۋدىڭ ماڭىزدىلىعىن اتاپ وتتىك»، - دەدى ق ر سىرتقى ىستەر ءمينيسترى.
ءوز كەزەگىندە شۆەيتساريالىق ديپلومات وتكەن جىلى قوس ەلدىڭ ديپلوماتيالىق قارىم- قاتىناس ورناتقانىنا 30 جىل تولعانىن، بۇل ارالىقتا تىعىز بايلانىس قالىپتاسقانىن اتاپ ءوتتى.
«بۇگىنگى ساپارىم قارىم- قاتىناسىمىزدى ودان ءارى نىعايتادى دەپ ۇمىتتەنەمىن. مەنىمەن بىرگە دەلەگاتسيا قۇرامىندا بازەل، بەرن، لۋگانو قالالارىنىڭ وكىلدەرى، پارلامەنت مۇشەلەرى كەلدى. كەشە الماتىدا شۆەيتساريانىڭ قۇرمەتتى كونسۋلدىعىن اشتىق، مۇنى دا جاقسى بەلگى دەپ ەسەپتەيمىز»، - دەدى ي. كاسسيس.
