توقايەۆ: قالانىڭ شەتكەرى اۋداندارىنا كوڭىل بولمەۋ ادىلەتتى قوعام يدەياسىنا ساي كەلمەيدى
بۇل تۋرالى استانانىڭ باۋىرلاس قالالارى فورۋمىندا پرەزيدەنت قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«ورتالىق كوشەلەردى عانا جارقىراتىپ قويىپ، قالانىڭ شەتكەرى اۋداندارىنا كوڭىل بولمەۋ ادىلەتتى قوعام يدەياسىنا ساي كەلمەيدى. ۇيلەسىمدى ءارى تەڭگەرىمدى مەگاپوليس ءۇشىن ءتيىمدى كولىك جۇيەسىنىڭ، سونىڭ ىشىندە دامىعان قوعامدىق كولىكتىڭ، ىڭعايلى ۆەلوسيپەد جانە جاياۋ جۇرگىنشىلەر اۋماعىنىڭ بولۋى اسا ماڭىزدى»، - دەدى قاسىم-جومارت توقايەۆ.
پرەزيدەنتتىڭ ايتۋىنشا، تەحنولوگيانىڭ، اتاپ ايتقاندا جاساندى ينتەللەكتتىڭ قارىشتاپ دامۋى قالالاردى بارىنشا ساپالى باسقارۋ ءۇشىن جاڭا مۇمكىندىكتەرگە جول اشادى.
«اقىلدى قالا» تۇجىرىمداماسىن جۇزەگە اسىرۋ ازاماتتارعا جاڭا سيفرلىق قىزمەت ۇسىنۋعا، عيماراتتاردىڭ ەنەرگيا تۇتىنۋ تيىمدىلىگىن ايتارلىقتاي جەتىلدىرۋگە، سونداي-اق كولىك اعىنىن تۇبەگەيلى وڭتايلاندىرىپ، كوشەدەگى قاۋىپسىزدىكتى ارتتىرۋعا مۇمكىندىك بەرەدى. بۇل - ءبىز ءۇشىن وزەكتى مىندەت. سونىمەن قاتار ادامدارعا ءوزارا تىعىز بايلانىس ورناتۋعا كومەكتەسىپ، ازاماتتار مەن بيزنەستىڭ قالاداعى وزەكتى پروبلەمالاردى كوتەرىپ، ولاردى شەشە الاتىن بەلسەندى قوعامداستىق قۇرۋ ىسىنە اتسالىسۋىنا ىقپال ەتەدى. استانا بۇل باعىتتا دامىپ كەلەدى جانە ءبىرقاتار جەتىستىككە جەتتى»، - دەدى مەملەكەت باسشىسى.
