توقايەۆ استانا تۋرالى: «جاسىل قالا» يدەياسىن جۇزەگە اسىرۋعا ايرىقشا ءمان بەرەمىز

«استانا - بولاشاعى زور قالا. وسى ورايدا، ءبىز «جاسىل قالا» يدەياسىن جۇزەگە اسىرۋعا ايرىقشا ءمان بەرەمىز. ەلوردامىز، ەڭ الدىمەن، تۇرعىندارعا ىڭعايلى قالا بولۋى كەرەك. استانا - ايماقتاعى ءىرى قارجى ورتالىعى. الەمنىڭ 75 ەلىنىڭ 2 مىڭنان اسا كومپانياسى بيزنەس جۇرگىزۋ ءۇشىن استانا حالىقارالىق قارجى ورتالىعىن تاڭدادى. بۇگىندە قارجى ورتالىعى ەلىمىزگە 8 ميلليارد دوللار ينۆەستيتسيا تارتتى. بۇل - جاقسى كورسەتكىش»، - دەدى قاسىم- جومارت توقايەۆ ەلوردادا ءوتىپ جاتقان استانانىڭ باۋىرلاس قالالار فورۋمىندا.

پرەزيدەنتتىڭ ايتۋىنشا، الەمدىك ساياساتشىلار استانانى بەيبىتشىلىك الاڭى دەيدى.

«ۇستانىمى بولەك، مۇددەلەرى كەرەعار ەلدەر وسىندا بىتىمگە كەلدى. كەلەشەكتە دە استانا ءبىزدىڭ گەوساياسي ايماقتاعى ماڭىزدى ورتالىق رەتىندە دامي بەرمەك. مەن بۇعان كامىل سەنەمىن»، - دەيدى مەملەكەت باسشىسى.

ەلوردادا ەڭ ماڭىزدى شەشىمدەر قابىلدانىپ جاتىر.

«استانا - ءدىننىڭ باسىن قوسقان، ءدىنباسىلاردىڭ ءداستۇرىن توعىستىرعان شاھار. بۇدان بولەك، ەلوردا تورىندە تالاي مارتە ءدۇبىرلى دودالار مەن حالىقارالىق سايىستار ءوتتى. ءبىر سوزبەن ايتقاندا، استانانى بىرلىك پەن بەرەكەنىڭ بەسىگى دەۋگە تولىق نەگىز بار.

«قازىر استانادا الماتى، اقمەشىت، ورىنبور، تۇركىستان، ساۋران، سىعاناق، سارايشىق كوشەلەرى بار. بۇل - ەلدىك پەن مەملەكەتتىلىك تاريحىنىڭ ناقتى كورىنىسى. استانا - ەلىمىزدىڭ جۇرەگى. بۇل قالادا ەڭ ماڭىزدى شەشىمدەر قابىلدانىپ جاتىر. كەلەشەكتە دە لايىم سولاي بولماق»، - دەدى قاسىم- جومارت توقايەۆ ەلوردادا ءوتىپ جاتقان استانانىڭ باۋىرلاس قالالار فورۋمىندا.

بۇعان دەيىن مەملەكەت باسشىسى استانا جاڭارۋ مەن جاڭعىرۋعا جول اشىپ، بۇگىندە جان- جاقتى ءارى قارقىندى دامىپ جاتقانىن ايتقان ەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى